საწინააღმდეგო პროგნოზების მიუხედავად ბინების ფასი კვლავ გაიზარდა

გასული წლის განმავლობაში უძრავი ქონების დარგის ექსპერტები და რეალტორები ვარაუდობდნენ, რომ მომდევნო წლიდან უძრავი ქონების ფასი დაიკლებდა. აღნიშნული პროგნოზი, ეფუძნება ეწ. ეკონომიკური მიგრანტების – რუსეთისა და ბელარუსის მოქალაქეების მასობრივ გადინებას. მიგრაციულ ფაქტორებს გავლენა უნდა მოეხდინა უძრავი ქონების როგორც გასაყიდი, ასევე ქირის ფასზე. თუმცა, 2023 წლის ბოლოდან ამ დრომდე ფასის ზრდის ტენდენცია მაინც გრძელდება.

საქართველოდან, მართლაც გავიდა რუსეთისა და ბელარუსის მოქალაქეების დიდი ნაწილი. 2023 წლის ნოემბერში შსს-ის მიერ გამოქვეყნებული ინფორმაციით გასული წლის ბოლოს რუსეთის უფრო მეტმა მოქალაქემ დატოვა ჩვენი ქვეყანა და ვიდრე შემოვიდა. ანგარიშის მიხედვით გასულ წელს რუსეთიდან 1,508,187 ვიზიტორი შემოვიდა, ხოლო საქართველო დატოვა რუსეთის 1,528,193 მოქალაქემ. შესაბამისად, ქვეყნიდან 20,006-ით მეტი რუსეთის მოქალაქე გავიდა, ვიდრე შემოვიდა.

ბიზნესის ობიექტები მეტწილად დაიკეტა. აღნიშნულს ადასტურებს bm.ge-ის მიერ მომზადებული მასალაც. გამოცემის რესპონდენტის „აჭარა ტურის“ დირექტორის ირაკლი თავართქილაძის ინფორმაციით, რუსეთისა და ბელარუსის მოქალაქეების რაოდენობა ბათუმში განახევრდა. 

„რუსულენოვანი მოსახლეობა, არამხოლოდ რუსეთის მოქალაქეები, არამედ ბელარუსებიც მასიურად ტოვებენ საქართველოს. თუ ბათუმში ნაქირავები ბინების რაოდენობას დავეყრდნობით, რუსულენოვანი მოსახლეობის მინიმუმ 40-50%-მა, ე.წ. ეკონომიკურმა ლტოლვილებმა უკვე დატოვეს ჩვენი ტერიტორი“- აღნიშნავს bm.ge-სთან ინტერვიუში თავართქილაძე.

მისივე, თქმით ეს ბათუმში გასაქირავებელი ბინების ფასებს უკვე დაეტყო. თუმცა, აღსანიშნავია რომ იანვარში ბათუმში ტურისტული სეზონი არ არის, ამიტომ ფასების მხრივ ობიექტური სურათის დანახვა ჯერ ძნელია.

საწარმოებლად. Forbes-ზე დაყრდნობით რადიო თავისუფლება იუწყება, რომ საქართველო ლიდერობს ქვეყნებს შორის, სადაც რუსებმა 2023 წელს ბიზნესი დაარეგისტრირეს. სტატიიდან ირკვევა, რომ გასული წლის იანვრიდან დეკემბრის ჩათვლით 13 ათასი იურიდიული პირი დარეგისტრირდა. მეორე ადგილზეა ყაზახეთი, სადაც რუსებმა 6100 კომპანია გახსნეს. მესამე ადგილს სომხეთი და ჩერნოგორია იყოფენ, სადაც რუსი მესაკუთრის 3400 იურიდიული პირი დარეგისტრირდა.

ავტორიტარული რეჟიმების მოქალაქეების გასვლის მიუხედავად მთლიანად საქართველოში, 2023 წლის მეოთხე კვარტალში ბინების ფასები გაიზარდა, ამას მოწმობს საქართველოს სტატისტიკის ეროვნული სამსახურის ანგარიში. ოფიციალური ინფორმაციით, 2023 წლის მეოთხე კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 2.9 პროცენტით გაიზარდა, ხოლო ინდექსის წლიურმა ზრდამ 12.8 პროცენტი შეადგინა. 2020 წლის საშუალოსთან შედარებით ინდექსი 39.8 პროცენტით არის გაზრდილი

ამ ეტაპზე დანამდვილებით ძნელია თქმა, შენარჩუნდება თუ არა ფასის ზრდის ტენდენცია. თუმცა, გასულ პერიოდში დეველოპერები უძრავ ქონებაზე ფასების ზრდის მიზეზად სამშენებლო მასალების ღირებულების მუდმივ ზრდას უკავშირებდნენ. სავარაუდოა, რომ სამშენებლო მასალების ფასი არც მომავალში დაიკლებს, შესაბამისად ნაკლებად სავარაუდოა გასაყიდი უძრავი ქონების ფასის მნიშვნელოვანი შემცირება.