რატომ აღარ არის საჭირო ოფისიდან მუშაობა?

COVID-19-ის პანდემიამ ბევრი ჩვენგანის ცხოვრება რადიკალურად შეცვალა: არაერთ საკითხზე დავფიქრდით, მიდგომები გადავაფასეთ და სიახლეებიც აღმოვაჩინეთ.
შეზღუდვებიდან გამომდინარე, პანდემიის პერიოდმა სამუშაო გარემოსა და კულტურაზე ყველაზე დიდი გავლენა იქონია. მართალია, დისტანციურ რეჟიმს თავიდან მოუმზადებლები და დასტრესილებიც კი შევხვდით, მაგრამ სულ მალე გაირკვა, რომ დასაქმებულებს სახლიდან მუშაობაც შესძლებიათ, თან ოფისიდან მუშაობაზე ეფექტურადაც კი!
წლების წინ აზრადაც არ მოგვივიდოდა, რომ მთელი დღით ოფისში ყოფნისა და საღამოობით გრძელ საცობებში გატარებული საათების ალტერნატივა სახლიდან მუშაობა შეიძლებოდა ყოფილიყო. დღეს კი ტექნოლოგიურმა საუკუნემ დაგვანახა, თუ რატომ აღარ არის საჭირო ოფისიდან მუშაობა.

საქმე სახლიდანაც კეთდება.
ციფრული ტექნიკა ჩვენი ყოველდღიურობისა და სამუშაოს განუყოფელი ნაწილია. საოფისე სამუშაოდან გამომდინარე, დასაქმებულების უმეტესობა კომპიუტერებსა თუ სმარტფონებს იყენებს. ასე რომ, იგივე სამუშაო სივრცის მოწყობა სახლიდანაც შესაძლებელია, რაშიც პანდემიის პერიოდმა დაგვარწმუნა და ეფექტურობისთვის საჭირო დამატებითი უნარებიც გამოგვიმუშავა. ინტერნეტით ინფორმაციის გაცვლა და თითქმის ნებისმიერი ტიპის სამუშაოს შესრულებაა შესაძლებელი, მეორე მხარეს კი შესრულებული სამუშაოს კონტროლიც მარტივად შეუძლია.

ვზოგავთ დროსა და ფინანსებს.
დიდი ოფისი დიდ ხარჯებთან არის დაკავშირებული. არ აქვს მნიშვნელობა, მცირე ბიზნესის მფლობელი ხართ თუ დიდი კომპანიის, როცა საქმე ხარჯების დაზოგვას ეხება. უფრო მცირე ზომის ოფისში გასავლით ან დისტანციურ რეჟიმში მუშაობით დაზოგილი თანხა კომპანიის ახალი მიმართულებით განვითარებაზე შეიძლება დაიხარჯოს. ამასთანავე, თითოეული დასაქმებულს დაეზოგება ტრანსპორტისა და კვების ხარჯები. რაც მთავარია, დაიზოგება დრო, რომელიც ფინანსებზე ნაკლებად მნიშვნელოვანი რესურსი სულაც არ არის. სამსახურში წასვლისა და უკან დაბრუნებისთვის გამოყოფილი დრო დასვენების საათებად იქცევა, რაც მოტივაციასა და პროდუქტიულობაზეც აუცილებლად აისახება.

კომუნიკაცია პრობლემა აღარაა.
თანამედროვე ადამიანისთვის კომუნიკაციის ერთ-ერთი მნიშვნელოვანი წყარო სოციალური ქსელებია. მიმოწერა ან ვიდეოზარი ნებისმიერ დროსა ან ადგილიდანაა შესაძლებელი, რაც ურთიერთობებს გვიმარტივებს. თანამშრომლებთან კომუნიკაციისთვის დღეს არაერთი პლატფორმა არსებობს, რომელთა უმეტესობაც მულტიფუნქციურია და სამუშაოს ორგანიზებაშიც გვეხმარება. თანამშრომლებთან მთელი სამუშაო დღის განმავლობაში მიმოწერა, საუბარი თუ ინფორმაციის გაცვლა ხშირად იმაზე უფრო მარტივია, ვიდრე სხვა ოთახსა თუ სართულზე მათი პოვნა იყო.

ნაკლები კონფლიქტი წარმოიშობა.
სამუშაო პროცესში ხშირია შემთხვევები, როცა თანამშრომლის მიერ შესრულებული დავალება არ მოგვწონს, ან შენიშვნებს თავად ვიღებთ. პირისპირ კომუნიკაციისას ემოციების კონტროლი გაცილებით რთულია, ვიდრე წერილობითი კომუნიკაციის დროს. შეცდომაზე მითითება წერილობითი ფორმით უფრო მარტივი აღსაქმელი და ჩამოსაყალიბებელია. მეორე მხრივ კი, თუ მითითებას არ ვეთანხმებით, ჩვენი პრეტენზიები მიმოწერისას უფრო დალაგებულად და მშვიდად შეგვიძლია ჩამოვაყალიბოთ. ასე კი დაძაბულ გარემოსთან ერთად, შესაძლო კონფლიქტსაც ავირიდებთ.