რა შეღავათებით სარგებლობენ მრავალშვილიანი ოჯახები იპოთეკური სესხის აღებისას

საქართველოში მრავალშვილიანი ოჯახებისთვის სახელმწიფო პროგრამა - „სუბსიდირებული იპოთეკური სესხი“ მოქმედებს. იპოთეკური სესხების სუბსიდირება 2021 წლის 1-ელი სექტემბრიდან დაიწყო.

სახელმწიფო სუბსიდირების პროგრამაში მონაწილეობა ქვეყნის მასშტაბით მრავალშვილიან ოჯახებს შეუძლიათ. მრავალშვილიანია ოჯახი, რომელშიც 3 და მეტი შვილია. მათ სუბსიდირების პროგრამაში ჩართვისთვის დამატებითი კრიტერიუმების დაკმაყოფილება აღარ სჭირდებათ.

პროგრამის ფარგლებში 200 000 ლარამდე ოდენობის იპოთეკური სესხით სარგებლობაა შესაძლებელი. პროგრამა გულისხმობს იპოთეკურ კრედიტებზე დარიცხული საპროცენტო სარგებლის სუბსიდირებას 5 წლის მანძილზე. მრავალშვილიანი ოჯახებისთვის სახელმწიფო თანადაფინანსება პროცენტის 2/3 იქნება.

ასეთია სუბსიდირების პროგრამის მონაწილეობის პირობები. ახლა კი გაგაცნობთ იმ საკითხებს, რომლებიც მონაწილეობის მსურველებმა აუცილებლად უნდა იცოდეთ:

დღეს ლარში 200 000 ლარამდე იპოთეკური სესხების ძირითადი ნაწილი ბანკების მიერ 12%-ად გაიცემა, თანადაფინანსების ფარგლებში კი მათ დაახლოებით 4%-იანი სესხი ექნებათ. ამით ყოველთვიური გადასახდელი თანხა მნიშვნელოვნად უმცირდებათ, რაც საკუთარი ოჯახების კეთილდღეობასა და საცხოვრებელი პირობების გაუმჯობესებას შეიძლება მოახმარონ.

პროგრამის ფარგლებში მაქსიმუმ 200 000 ლარის მოცულობის სესხების სუბსიდირება მოხდება. თუმცა, მეორე მხრივ, დასაშვებია, რომ ბინისა თუ სახლის ღირებულება აღემატებოდეს 200 000 ლარს და დანარჩენი თანხა მყიდველმა ბანკის ფინანსური ვალდებულების გარეშე გადაიხადოს.

სესხის სუბსიდირება უკვე დამტკიცებულ და გაცემულ სესხებზე ვერ მოხერხდება.

პროგრამა ერთჯერად ხასიათს ატარებს და მასში მონაწილეობა ბენეფიციარს შეუძლია მხოლოდ ერთხელ, მის მიერ აღებული სესხის მოცულობის მიუხედავად. ანუ, თუ თქვენ სუბსიდირების პროგრამით ისარგებლეთ, 100 000 ლარის ოდენობის სესხი აიღეთ და გარკვეული პერიოდის შემდეგ კვლავ 100 000 ლარის ოდენობის სესხის აღებას გადაწყვეტთ, სუბსიდირების პროგრამით მეორე სესხის შემთხვევაში ვეღარ ისარგებლებთ.

სუბსიდირების პროგრამით ხელმეორედ სარგებლობა შეუძლიათ მხოლოდ იმ მრავალშვილიან ოჯახებს, რომლებშიც მატებაა და მე-4 ან შემდეგი ბავშვი დაიბადება ან შვილად აიყვანენ. ეს ნიშნავს, რომ მათ შესაძლებლობა აქვთ მეორედ აიღონ ახალი, მაქსიმუმ 200 000 ლარის ოდენობის სესხი.

სახელმწიფო პროგრამა - „სუბსიდირებული იპოთეკური სესხი“ ერთწლიანი პროექტია, რომელიც 2022 წლის 1 სექტემბერს სრულდება. თუმცა მრავალშვილიანი ოჯახები გამონაკლისს წარმოადგენს და მათი პროგრამაში ჩართვა  შესაძლებელია 2022 წლის 1 სექტემბრის შემდეგაც, თუ ამ თარიღის შემდგომ შეეძინებათ შვილი ან შვილად აიყვანენ ბავშვს.

პროგრამის ფარგლებში იპოთეკური კრედიტების გაცემა მოხდება მხოლოდ ეროვნულ ვალუტაში.

სუბსიდირების პროგრამით სარგებლობის დროს შესაძლებელია შეიძინოთ პირველადი ან მეორადი ბინა ან საკუთარი სახლი. ასევე მიიღოთ თანხა სახლის ასაშენებლად.

მთავრობის ამ ინიციატივის უზრუნველსაყოფად 2021 და 2022 წლებში დამატებით 300 მილიონ ლარზე მეტი რესურსია მობილიზებული.