პასიური შემოსავლის გამომუშავების 6 იდეა, რომლებიც ნამდვილად ამართლებს

თუ ძირითადი სამსახურის პარალელურად დამატებით მცირე შემოსავლის მიღება გსურთ, ინტერნეტის ეპოქაში ამის მრავალგვარი გზა არსებობს. მთავარია გქონდეთ სურვილი, იცოდეთ, რისი კეთება გიყვართ, შეგიძლიათ და ამისთვის სულ მცირე ძალისხმევა მაინც გაიღოთ.

ჩვენ გარშემო უამრავი ადამიანია, რომელთაც შემოსავლის ერთ-ერთ წყაროდ სწორედ აღნიშნული გზა აქვს არჩეული და შეგვიძლია მათი მაგალითით ვიხელმძღვანელოთ. თანხის გამომუშავების აღნიშნული გზა განსაკუთრებით პოპულარული გახდა პანდემიის დროს, როცა მეტი თავისუფალი დრო გვქონდა, დამატებითი შემოსავლის მიღებაზე გვეფიქრა. მიუხედავად იმისა, რომ რეგულაციებმა ბიზნესს მნიშვნელოვანი პრობლემები შეუქმნა, ზოგიერთმა ჩვენგანმა აღნიშნული პერიოდი შესაძლებლობად აქცია და დაიწყო პასიური შემოსავლის მიღების ისეთი წყაროების ჩამოყალიბება, როგორიცაა:

პირადი ბლოგი

ყველა ჩვენგანისთვის ცნობილია ერთი ბლოგერი მაინც, რომელიც თავის მიმართულებაში საუკეთესოა.საინტერესო ინფორმაციისა და შთაგონების მისაღებად სწორედ მის ბლოგს ვეცნობით, ვუყურებთ ან ვუსმენთ. ბოლო პერიოდში განსაკუთრებით პოპულარულია ვიდეობლოგები, რომლებიც კლასიკური პასიური შემოსავლის წყაროსგან განსხვავებით საკმაოდ დიდ ძალისხმევას მოითხოვს.

შეარჩიეთ თემა, რომელზე საუბარიც ყველაზე კარგად გამოგდით, მოიფიქრეთ მისი მიწოდების საინტერესო ფორმა, გაერკვიეთ სოციალური მედიის მუშაობისა და ნამუშევრის კომერციალიზაციის სპეციფიკაში და დაიწყეთ.

ონლაინ ტრენინგი

თუ ფიქრობთ, რომ რომელიმე სფეროში იმდენად კარგად ხართ დახელოვნებული, რომ შეგიძლიათ, თქვენი ცოდნა სხვებსაც გაუზიაროთ, ეს შესაძლებლობაა როგორც თქვენთვის, ისე იმ ადამიანებისთვის, ვისაც პროფესიონალი მენტორი სჭირდება.

როგორც უცხოეთში, ისე უკვე საქართველოშიც განსაკუთრებით პოპულარულია მოკლე კურსები, რომელთა ფარგლებშიც თეორიულ და პრაქტიკულ ცოდნას ვიღებთ კონკრეტული სფეროს პროფესიონალისგან. ეს ადამიანები, ჩვეულებრივ, საკუთარ გამოცდილებაზე დაყრდნობით გვიზიარებენ ინფორმაციას.

ამგვარი კურსის შექმნა პროფესიულ ზრდაში დაგეხმარებათ როგორც თქვენ, ისე იმ ადამიანებს, ვინც მას გაივლიან. შეგიძლიათ, ნებისმიერი მიმართულების ტრენინგ კურსი ჩამოაყალიბოთ, იქნება ეს კულინარია, გიტარასა და სხვა მუსიკალურ ინსტრუმენტებზე დაკვრა, ხატვა თუ სხვა.

ვენდინგ აპარატები და მობილური კაფე

ვენდინგ აპარატები მშვენივრად მუშაობს ოფისებში, ტროტუარებზე, პარკებში, სკვერებში, ტურისტულ ობიექტებში, სადგურებსა  და საზოგადოებრივი თავშეყრის ადგილებში, შესაბამისად, პასიური შემოსავლის სახით შეგიძლიათ ბიზნესის ეს ტრადიციული და მარტივი გზაც სცადოთ.

თუ გემრიელი ყავის, ფუნთუშების, ვაფლის, ჰოთ-დოგების და სწრაფი კვების სხვა პროდუქტების მომზადება შეგიძლიათ ან გაქვთ შესაძლებლობა, ითანამშრომლოთ ადამიანთან, რომელიც ამას გააკეთებს, მაშინ ტურისტულ ადგილებში მობილური კაფე შეიძლება საკმაოდ წარმატებული ბიზნესი გახდეს.

ინვესტიციები

ინვესტიციები, თანხის აქციებში დაბანდება შეიძლება პასიური შემოსავლის წარმატებული წყარო გახდეს, თუმცა სასურველია მანამდე დეტალური ინფორმაცია მოიძიოთ, რა რისკები ახლავს აქციების შეძენას ან მათით ვაჭრობას, რაში ინვესტირებაა უფრო მოგებიანი და რაში − ნაკლებად.

ონლაინ მაღაზია

ჩვენ გარშემო ბევრი ადამიანია, ვინც თავად ქმნის ან უცხოეთიდან იწერს ნივთებს, შემდეგ კი თავის ინსტაგრამ- ან ფეისბუქგვერდის მეშვეობით ყიდის ან სულაც B2C პლატფორმაზე ათავსებს. თუ რამე სპეციფიკური გეხერხებათ, იქნება ეს სამკაულების დამზადება, ხატვა, ტანსაცმლის დიზაინი და სხვა, შეგიძლიათ, ამგვარი ონლაინ კომერციის მაღაზია თქვენც შექმნათ და პასიური შემოსავლის წყაროდ აქციოთ. წარმატების შემთხვევაში კი ბიზნესის გაზრდაზეც იფიქროთ, ვინ იცის, იქნებ სწორედ აქ აღმოაჩინოთ თქვენი მოწოდება.

უძრავი ქონების გაქირავება

ეს არის პასიური შემოსავლის ერთ-ერთი ყველაზე ტრადიციული და სტაბილური ფორმა. თუ ფლობთ უძრავ ქონებას, იქნება ეს საცხოვრებელი სახლი, ბინა თუ კომერციული ფართი, გაქირავებით მიღებული შემოსავალი ცხოვრების ხარისხის გაუმჯობესებაში ან ახალი საქმიანობის დაწყებაში დაგეხმარებათ.

ჩამოთვლილთაგან რომელი გზაა თქვენთვის ყველაზე მისაღები?