როგორ გამოვიყენოთ საკრედიტო ბარათი ბიუჯეტურად საახალწლო ფასდაკლებებისას?

კორონავირუსის პანდემიის და ლოკდაუნების შემდეგ მსოფლიოში სულ უფრო მეტი მომხმარებელი მიმართავს ონლაინ ვაჭრობას და თანხას საკრედიტო ბარათით იხდის. გამონაკლისი არც ეს სეზონია.

საკრედიტო ბარათებით ტრანზაქციების განხორციელება ბევრად უფრო მარტივი, სწრაფი და მოსახერხებელია, თუმცა ნაკლებად გვრჩება განცდა, რომ რეალურ ფულს ვხარჯავთ და ამიტომაც საყიდლებიდან სახლში მოსულებს შემდეგ ბარათზე იმაზე ნაკლები თანხა გვხვდება, ვიდრე ველით.

მართალია, საკრედიტო ბარათებით ხარჯვა საქმეს ამარტივებს და ონლაინ ვაჭრობას ხელსაყრელს ხდის, თუმცა აუცილებელია რამდენიმე მარტივი წესის დაცვა, რაც თავიდან აგვარიდებს თანხის გადახარჯვას.

სანამ უშუალოდ საკრედიტო ბარათის გამოყენების რჩევებზე გადავალთ, უნდა ითქვას ის, რომ ფასდაკლებების პერიოდის დროს, შესაძლოა, ნაღდი ფულის გამოყენება უკეთესი არჩევანი იყოს ფულის დასაზოგად. განსაკუთრებით კი მაშინ, როდესაც ინფლაცია მაღალ დონეზეა და საქონელი გაძვირებული - თქვენ კი ბიუჯეტში შეზღდულები ხართ და გინდათ ზუსტად გაჰყვეთ დასახულ გეგმას.

ნაღდი ფულის გამოყენება უპირატესია იმ შემთხვევაშიც, თუ საკრედიტო ბარათით რაციონალურად ხარჯვასთან პრობლემები გაქვთ. ფიზიკური ფულის ხელთ ქონა გეხმარებათ ვიზუალიზაციაში, თუ რამდენი უნდა დახარჯოთ.

ახლა კი გადავიდეთ იმაზე, თუ როგორ შეგვიძლია საკრედიტო ბარათის გამოყენების ეფექტურობა გავზარდოთ.

საკრედიტო ბარათის ბიუჯეტის შედგენა

საახალწლო ფასდაკლებების ორომტრიალმა შეიძლება იმდენად გვაცდუნოს და ჩაგვითრიოს, რომ შოპინგი ახალი სესხით დავასრულოთ. ამიტომ, ბიუჯეტის შემუშავებისას ჩამოწერეთ საჩუქრების სია, მიუწერეთ ფასები და განსაზღვრეთ, რომლის ყიდვა ჯობია ბარათით და რომლის ნაღდი ფულით. ამაში შეიძლება დაგეხმაროთ კატეგორიებად დაყოფაც, გააჩნია რამდენ ვინმეს უნდა უყიდოთ და რა რაოდენობის საჩუქარი უნდა შეიძინოთ.

გამოსაყენებელი ბარათის სწორად შერჩევა

სოციალურ ქსელში ერთხელ მაინც შეგხვდებოდათ რომელიმე ბრენდის დარეკლამებული პოსტი, რომ კონკრეტული ტიპის ბარათის გამოყენების შემთხვევაში ხელსაყრელ ფასდაკლებას მიიღებდით ან თანხის გარკვეული პროცენტი უკან დაგიბრუნდებოდათ. თუ რამდენიმე ბანკის და რამდენიმე ტიპის ბარათს ფლობთ, დარწმუნდით, რომ ნივთის საყიდად შესაფერის ბარათს იყენებთ. ამ გზით შეძლებთ დაზოგოთ დამატებითი თანხები, რომელსაც შემდეგ სხვა ნივთის შესაძენად ან ნებისმიერი მიზნისთვის გამოიყენებთ.

სასაჩუქრე ქულები

დაგროვების ქულებით დღეს ბევრი საკრედიტო ბარათის მომხმარებელი სარგებლობს, თუმცა დროთა განმავლობაში,  შესაძლოა, მათი არსებობის შესახებ გადაგვავიწყდეს. თუ ამგვარ ქულებს ფლობთ, არა აუცილებლად, მაგრამ შესაძლოა მათი გამოყენებისთვის შესაბამისი დრო სწორედ ახლა იყოს. საახალწლო და არა მარტო საახალწლო ფასდაკლებები მათ დასახარჯად და დამატებითი სარგებლის მისაღებად კარგი დროა.

აქვე აღსანიშნავია ისიც, რომ რეკომენდებულია სწორედ იმ ბარათების გამოყენება, რომლებიც ყველაზე მეტ დაგროვებით ქულებს გვთავაზობს.

აღსანიშნავია, რომ ონლაინ საკრედიტო ბარათით ვაჭრობისას აუცილებლად უნდა დაიცვათ უსაფრთხოების წესები, არ შეიყვანოთ მონაცემები უსაფრთხო და საეჭვო საიტებზე, რომლებიც შესაძლოა გრანდიოზულ ფასდაკლებებს გთავაზობდნენ. ასევე, რეკომენდებულია, ინტერნეტ შოპინგისთვის და ყოველდღიური ხმარებისთვის სხვადასხვა ბარათი გამოიყენოთ.