ტექნოლოგიური და ინდუსტრიული ტენდენციები: რომელი ინდუსტრიები განიცდიან სწრაფ ზრდას და ქმნიან მეტ დასაქმების შესაძლებლობას?

21-ე საუკუნე გამოირჩევა ტექნოლოგიური და ინდუსტრიული ცვლილებებით, სიახლეებს თითქმის ყოველდღიური ხასიათი აქვს, განვითარება განსაკუთრებით ტექნოლოგიურ სფეროში აღწევს პიკს და მისი დახმარებით ბევრი სასიკეთო ცვლილება ხდება სამყაროში: იზოგება დრო ბევრ სფეროში, ამოცანები უფრო სწრაფად გადაჭრადი ხდება და განსაკუთრებით კი, ბოლო დროს ხელოვნური ინტელექტის განვითარებით, ადამიანების რესურსების დახარჯვის საჭროება მინიმუმამდე მცირდება.

მიუხედავად იმისა, რომ ხელოვნური ინტელექტის განვითარებამ და ასევე, რობოტიკისა და მანქანების განვითარებამ გარკვეულ სფეროებში სამუშაო ადგილების ჩანაცვლება მოახერხა და ადამიანები „უმუშევარი დატოვა“, ამის პარალელურად გაჩნდა ისეთი ახალი პროფესიები და საქმიანობები, რისი საჭიროებაც წინა ათწლეულებში საერთოდ არ არსებობდა. მაგალითად, ე.წ. „Machine Learning” პოპულარული და მოთხოვნადი მიმართულება გახდა იმისათვის, რომ ტექნოლოგიებმა განაგრძს განვითარება, გამოსწორდეს ხარვეზები, დაინერგოს სიახლეები, განახლდეს არსებული და ა.შ., საჭირო არიან პროფესიონალები. ადამიანებმა არც კი იცოდნენ წარსულში, რომ კოდის წერა შესაძლებელი იყო და ციფრული პროფესიები იარსებებდა მომავალში, დღესდღეობით კი ერთერთი ყველაზე პოპულარული, მოთხოვნადი და მაღალანაზღაურებადი საქმიანობაა, რომელიც სწორედ ტექნოლოგიურმა განვითარებამ მოიტანა.

შესაძლოა, საკმაოდ ლეგიტიმურად ვიფიქროთ, რომ გარკვეული პროფესიები დღის წესრიგიდან სრულიად ამოვარდა და ადამიანები უმუშევრები დარჩნენ, მაგრამ ამავდროულად, გაჩნდა ახალი პროფესიებიც, რომლებიც დასაქმების ახალი წყარო გახდა და შეიძლება ითქვას, რომ სამუშაო ადგილების ჩანაცვლება მოხდა. არ იქნება გადაჭარბებული, თუკი ვიტყვით, რომ ერთერთი მოწინავე ინდუსტრია, რომელშიც სამუშაო ადგილები  და მეტი და მეტი დასაქმების შესაძლებლობა გაჩნდა - ინფორმაციული ტექნოლოგიებია მთელი თავისი მრავალფეროვანი მიმართულებებით.

ასევე, მნიშვნელოვანია, რომ ინფორმაციული ტექნოლოგიების სფეროს იმაზე უფრო ფართოდ შევხედოთ, ვიდრე მარტივ ენაზე თუ ვიტყვით „ვინდოუსის  გადაყენების“ უნარია. სწორედ ინფორმაციული ტექნოლოგიების დახმარებით მარტივდება ჩვენი ცხოვრება ყოველდღიურად, ყველა ასპექტში: მარტივი გადახდები, ვებგვერდების თვალიერება, ონლაინ ვაჭრობა, პროგრამირება, დეველოპმენტი და ა.შ. რაც უფრო წინ მიდის ტექნოლოგიური სფერო, მით მეტ ასპექტში სჭირდება მას ტექნიკური მხარდაჭერა და შესაბამის განახლებებზე, მათ დახვეწასა და გაუმჯობესებაზე მუშაობა. შესაბამისად, იქმნება სამუშაო ადგილები, რომლის სამუშაო აღწერილობაში შემავალი ფუნქციები შესაძლოა არ ისწავლებოდეს უნივერსიტეტში უმაღლესი განათლების სახით, მაგრამ პრაქტიკასთან ერთად იყოს შესაძლებელი მასთან ადაპტაცია და ახალი ცოდნებისა და გამოცდილებების მიღება.

ციფრული ინოვაციების პლატფორმა „ტექპოინტი“ 2023 წლის ყველაზე პოპულარულ ტექნიკურ სამუშაოთა შორის ასახელებს კიბერუსაფრთხოებისა და ინფორმაციული უსაფრთხოების მენეჯერის/სპეციალისტის პოზიციებს, ასევე ხელოვნური ინტელექტის შემსწავლელ პროფესიებსა და კომპიუტერული სისტემების ანალიტიკოსის პოზიციას.

მომავლის პროფესიებს შორის მხედველობაში უნდა მივიღოთ ის ფაქტი, რომ უფრო და უფრო მეტ კომპანიას აქვს წვდომა სამგანზომილებიანი პრინტერის გამოყენებასთან და შესაბამისად, იზრდება 3D პრინტერების ტექნიკოსების საჭიროებაც. ასევე, მნიშვნელოვანწილად იხვეწება ვირტუალური რეალობა, მაგალითისთვის, ყველასთვის კარგად ნაცნობი ფეისბუქი საკმაოდ დიდ ინვესტიციას დებს მეტავერსში და სამომავლოდ საკმაოდ ბევრი VR ექსპერტის საჭიროება გაჩნდება ამ სფეროშიც.

ისევე, როგორც ყველაფერს, სამომავლოდ გაჩენილ სფეროებსაც დასჭირდებათ მარკეტინგი. ამმხრივ, ასევე სავარაუდოა, რომ მარკეტინგის სხვადასხვა მიმართულებებიც კვლავ მოწოდების სიმაღლეზე იქნება და მოთხოვნად პროფესიებს შორის სათანადო ადგილს დაიკავებს. მაგალითად, ციფრული მარკეტინგის საჭიროება კვლავ იქნება, რადგან ამ მიმართულების მიზანია კომპანიისა თუ ბრენდის სოციალურ მედიაზე ზრუნვა გაყიდვების გაზრდის, კომპანიის ლოიალურობისა და ბრენდის ცნობადობის გაზრდის მიზნით. ასევე, არანაკლებ მნიშნელოვანია კონტენტ მარკეტინგის მენეჯერის როლიც, რომელიც ქმნის და აქვეყნებს ბლოგებს, წერილობითი ხასიათის კონტენტს სოც.მედიისთვის, ერთი სიტყვით სხვადასხვა ტიპის სამუშაოს ატარებს გაყიდვებისა და მარკეტინგის პროცესის წარმართვისთვის. ამ პოზიციაზე მრავალფეროვანი უნარების შეძენაა უმჯობესი და გარდა მხოლოდ წერილობითი დოკუმენტების მომზადების ცოდნისა, ასევე მნიშვნელოვანია სხვადასხვა პლატფორმებთან მუშაობის გამოცდილება, მაგალითად როგორიცაა Wordpress, ასევე რეკომენდირებულია HTML და CSS-ის საბაზისო ცოდნაც.

დღითიდღე ვრწმუნდებით, რომ მომავალი ტექნოლოგიებისაა, ასე რომ მოემზადეთ ახალი ცოდნებისა და უნარების შეძენისათვის, დახვეწეთ თქვენი ანალიტიკური უნარები და თამამად შეაბიჯეთ ციფრული ინდუსტრიის ეპოქაში.