საუკეთესო საკომპენსაციო პაკეტები თანამშრომლებისთვის: რჩევები ორგანიზაციებს

ორგანიზაციაში თანამშრომლებისთვის შემუშავებულ საკომპენსაციო პაკეტებს შესაძლოა ერთერთი საკვანძო მნიშვნელობა ჰქონდეს ადამიანისთვის, რომელიც კონკრეტულ კომპანიაში მუშაობის დაწყებას განიხილავს.

საკომპენსაციო პაკეტი მხოლოდ ხელფასის, ბონუსისა და დანამატის ფულად ოდენობას არ მოიცავს და ის ბევრად მეტია, ბენეფიტების პაკეტი შეიძლება ითქვას, რომ კომპანიის კორპორატიული კულტურისა და ღირებულებების საუკეთესო მაგალითია. იმისთვის, რომ კანდიდატი სამუშაო პირობებით მოხიბლო, შრომის ანაზღაურების გარდა ძალიან მნიშვნელოვანია, რას სთავაზობთ მას პიროვნული და პროფესიული ზრდა-განვითარებისთვის.

განათლება და უნარები

ბევრი თქვენგანისთვის, ალბათ, ცნობილია СFO და CEO-ს შორის დიალოგი თანამშრომლის განვითარებაში ინვესტიციასთან დაკავშირებით:

„CFO: - რა მოხდება, თუკი ჩვენი თანამშრომლების განვითარებაში დიდ ინვესტიციას ჩავდებთ და ისინი ჩვენს კომპანიას დატოვებენ?

CEO: - და რა მოხდება, თუკი არ განვავითარებთ და ისინი ჩვენთან დარჩებიან?“

ეს საკულტო დიალოგი კარგად გამოხატავს რისკისა და სარგებლის შეფასებას. იმისათვის, რომ კომპანია იყოს ძილერი და განვითარებული, ასეთივე თანამშრომლები გვჭირდება, თუკი მათ განათლებაში რესურსს ჩავდებთ და მათ ცოდნას და შეძენილ უნარებს ჩვენვე გამოვიყენებთ კომპანიის სასარგებლოდ, წარმატება და წინსვლა გარანტირებული გვექნება. პირველ რიგში, მნიშვნელოვანია, რომ თავიდანვე ზრდა-განვითარებაზე ორიენტირებული თანამშრომლებით გვყავდეს გუნდი დაკომპლექტებული, ისინი კი, თუ თქვენი მხრიდან დაინახავენ მათზე ზრუნვას, არსად წავლენ, გამოიყენებენ თქვენგან მიცემულ შესაძლებლობას და დადებენ თავიანთ მაქსიმუმს. ამისთვის კომპანიის შესაბამისმა სამსახურმა უნდა განსაზღვროს თანამშრომელთა განვითარების გეგმა, დაგეგმოს საჭირო შესაბამისობის ტრენინგები და იზრუნოს სტაფის კვალიფიკაციისა და უნარების ამაღლებაზე. ამისტის, მაგალითად, კარგი გზა იქნებოდა თითოეული თანამშრომლისთვის გამოყოფილი კონკრეტული ბიუჯეტი, რომლის ფარგლებშიც თანამშრომლებს შესაძ₾ებლობა ექნებოდათ, რომ აერჩიათ შესაბამისი ტრენინგების გავლა წლის განმავლობაში ან თავიანთ კვალიფიკაციასთან დაკავშირებული ბიზნეს ლიტერატურის შეძენა

Work-life ბალანსი

გარდა ორგანიზაციული განვითარებისა, თანამშრომლები აფასებენ კომპანიის მხრიდან მათზე, როგორც ინდივიდებზე ზრუნვას, რომლებსაც სამსახურის გარეთ ესაჭიროებათ ისეთი აქტივობები, რაც დაეხმარებათ შემდგომ სამუშაო პროცესში მეტად პროდუქტიულები იყვნენ. მაგალითად, გარდა პროფესიული ტრენინგებისა, სამსახურმა შეიძლება შესთავაზოს ისეთ ვორქშოფებზე წასვლა, რაც დაეხმარებათ თავიდან აირიდონ პროფესიული გადაწვა, ასევე უკეთ დააორგანიზონ დრო და დროის მენეჯმენტის დახმარებით სამსახურისა და პირადი დრო დააბალანსონ. ასევე, კანონიც არეგულირებს, თუმცა კომპანიის კეთილი ნების საფუძველზე, შესაძლოა, რომ ზეგანაკვეთური სამუშაო ღირსეული ტარიფით ანაზღაურდეს, თანამშრომლებს მიეცეთ დამატებითი გამოსასვლელი დღებები, რათა შეძლონ დროის ოჯახთან გატარება.

ჯანმრთელი თანამშრომლები

კომპანიისთვის, ასევე, მნიშვნელოვანია, რომ ჯანმრთელი თანამშრომლები ჰყავდეს, რისთვისაც არსებითია კარგ სადაზღვევო კომპანიასთან თანამშრომლობა და დამაკმაყოფილებელი სადაზღვევო პოლისის შეთავაზება თანამშრომლისა და მისი ოჯახის წევრებისთვის. ჯანმრთელობაზე ზრუნვა ასევე შესაძ₾ებელია სპორტდარბაზებსა თუ იოგაზე ან სხვადასხვა გამაჯანსაღებელ ცენტრებში სიარულის წახალისებით, რაშიც დაეხმარებათ მაგალითად ვაუჩერები ან ფასდაკლების შეთავაზებები. გარდა ფიზიკური ჯანმრთელობისა, მნიშვნელოვანია მენტალური ჯანმრთელობაც, რომლის მდგომარეობაც თვალით არ ჩანს და ამიტომ, ხშირად, ადამიანები უკიდურეს მდგომარეობამდე მისვლამდე ყურადღებას არ აქცევენ მას. კომპანიის მხრიდან მენტალურ ჯანმრთელობაზე ზრუნვაც ერთერთი მნიშვნელოვანი კომპონენტია, მაგალითად ინფორმაციული შეხვედრების ჩატარება ცნობიერების ამაღლების მიზნით, სტრესული გარემოს შემთხვევაში სტრესთან გამკლავების მეთოდების სწავლება და საჭიროების შემთხვევაში ფსიქოთერაპიის ლიმიტირებული ვიზიტების დაფინანსება.

სხვა დამატებითი წახალისებები

გარდა სტანდარტული ბენეფიტებისა, შიდა კორპორატიული კულტურის გათვალისწინებით შესაძლებელია დაინერგოს სხვადასხვა ტიპის წახალისებები, რაც ხაზს გაუსვამს თანამშრომლის მნიშვნელოვნებას კომპანიისთვის. მაგალითად ფინანსური ან სიმბოლური საჩუქრები ქორწინებისა და შვილის შეძენის შემთხვევაში; თანამშრომლის დაბადების დღისთვის და სხვადასხვა სადღესასწაულო დღეებში სასაჩუქრე ნაკრებების შეთავაზება; ასევე, არანაკლებ მნიშვნელოვანია სამსახურის ფიზიკური გარემო და ის, რომ თანამშრომლები ოფისში კომფორტულად გრძნობდნენ თავს, ჰქონდეთ ტექნიკურად და მატერიალურად გამართული საოფისე გარემო და ჰყავდეთ ჯანსაღი კოლექტივი. ასევე, მოტივაციის ამაღლების მიზნით მიზანშეწონილია სხვადასხვა ტიპის კატეგორიების მიხედვით თვის/კვარტლის/წლის თანამშრომლის გამოვლენა და მათ წახალისებაც.