საქართველოში საშუალო ხელფასი 1943.4 ლარი გახდა — 2024 წლის I კვარტლის მონაცემები

საშუალო თვიური ნომინალური ხელფასი

როგორც დიაგრამაზე ვხედავთ, 2024 წლის I კვარტალში საქართველოში საშუალო ნომინალურმა ხელფასმა 1943.4 ლარი შეადგინა. წინა წლის იმავე პერიოდთან მიმართებით საშუალო ხელფასი 226.8 ლარით (13,2%-ით) გაიზარდა. ხოლო თუ  წლევანდელ მონაცემებს 2023 წლის IV კვარტალს შევადარებთ, საქართველოში საშუალო ნომინალური ხელფასი  101.1 ლარით (5%-ით)  შემცირდა.

საშუალო თვიური ნომინალური ხელფასი საქმიანობის სახეების მიხედვით

2024 წლის I კვარტლის მონაცემებით, ყველაზე მაღალი საშუალო ხელფასი საფინანსო და სადაზღვევო საქმიანობების მიმართულები დაფიქსირდა და 4519.4 ლარი შეადგინა. აღსანიშნავია, რომ გასულ წლის IV კვარტლის მიხედვით, ყველაზე მაღალანაზღაურებადი სფერო ინფორმაცია და კომუნიკაცია იყო, რომელმაც წელს მეორე ადგილზე გადაინაცვლა. საქსტატის ინფორმაციით, ყველაზე მაღალანაზღაურებადი დარგების საშუალო თვიური ხელფასი ასეთია:

• საფინანსო და სადაზღვევო საქმიანობები — 4519.4 ლარი (წინა წლის იგივე პერიოდთან შედარებით გაიზარდა 20.2%-ით);

• ინფორმაცია და კომუნიკაცია — 3956.5 ლარი (გაიზარდა 9%-ით);

• პროფესიული, სამეცნიერო და ტექნიკური საქმიანობები — 2672.7 ლარი (გაიზარდა 12%-ით);

• მშენებლობა — 2624.6 ლარი (გაიზარდა 22.3%-ით).

    საშუალო თვიური ხელფასი სქესის მიხედვით

2024 წლის I კვარტალში კაცების საშუალო ხელფასი ქალების საშუალო ხელფასზე კვლავ მაღალია. მონაცემების მიხედვით, 2024 წლის I კვარტალში ქალების საშუალო ხელფასი კაცებისაზე 803.2 ლარით ნაკლები იყო. როგორც დიაგრამაზე ვხედავთ, 2024 წლის I კვარტალში ქალების საშუალო ხელფასი 1540 ლარით, ხოლო კაცების — 2343.2 ლარით განისაზღვრა. თუ მონაცემებს გასული წლის შესაბამის კვარტალს შევადარებთ, ხელფასების წლიური ზრდა ქალებში 164.3 ლარია (11.9%), ხოლო კაცებში — 289.8 ლარი (14.1%). 

საშუალო თვიური ნომინალური ხელფასი რეგიონების მიხედვით

გასული წლის მსგავსად, რეგიონების მიხედვით საშუალო ხელფასის რაოდენობით თბილისი და მცხეთა-მთიანეთი ლიდერობენ. თბილისში საშუალო თვიური ნომინალური ხელფასი 2305 ლარი გახდა და 2023 წლის IV კვარტალთან შედარებით მცირედით დაიკლო. ხოლო მცხეთა-მთიანეთში წელს საშუალო ხელფასი 1680,2 ლარით განისაზღვრა, რაც გასული წლის IV კვარტალთან შედარებით 148 ლარით ნაკლებია.