საქართველოში უმუშევრობის დონე 3.1%-ით შემცირდა — 2024 წლის II კვარტლის მონაცემები

უმუშევრობის დონე საქართველოში (პროცენტებში)

2024 წლის II კვარტლის მონაცემების მიხედვით, უმუშევრობის დონემ საქართველოში 13,7% შეადგინა, რაც წინა წლის შესაბამისი პერიოდის მონაცემებთან შედარებით, 3,1 პროცენტული პუნქტით ნაკლებია. 2024 წლის I კვარტალთან შედარებით კი, საქართველოში უმუშევრობის დონე 0,3 პროცენტული პუნქტით შემცირდა.

სამუშაო ძალის მონაწილეობისა და დასაქმების დონეები (პროცენტებში)

საქსტატის მონაცემების მიხედვით, 2024 წლის II კვარტალში წინა წლის შესაბამის პერიოდთან შედარებით გაზრდილია როგორც სამუშაო ძალის მონაწილეობის, ისე დასაქმების დონე. სამუშაო ძალის მონაწილეობის დონე (სამუშაო ძალის წილი 15 წლის და უფროსი ასაკის მოსახლეობაში) წინა წლის შესაბამის პერიოდთან შედარებით, 1.3 პროცენტული პუნქტით გაიზარდა და 54.5%-ით განისაზღვრა. ხოლო 2024 წლის I კვარტალთან შედარებით, სამუშაო ძალის მონაწილეობის დონე 0,5 პროცენტული პუნქტით არის შემცირებული.

დასაქმების დონე ბოლო 1 წლის განმავლობაში 2.8 პროცენტული პუნქტით გაიზარდა და 47% შეადგინა. 2024 წლის I კვარტლის მონაცემთან შედარებით კი, საქართველოში დასაქმების დონე 0,3 პროცენტული პუნქტით შემცირდა.

უმუშევრობის დონე ქალაქ-სოფლის მიხედვით (პროცენტებში)

2024 წლის II კვარტლის მონაცემების მიხედვით, ბოლო 1 წლის განმავლობაში უმუშევრობის დონე შემცირდა როგორც ქალაქის ტიპის, ისე სოფლის ტიპის დასახლებებში. ამასთანავე, 2024 წლის II კვარტალში ბოლო წლების მსგავსად, ქალაქის ტიპის დასახლებებში უმუშევრობის დონე უფრო მაღალია, ვიდრე სოფლის ტიპის დასახლებებში. 2024 წლის II კვარტლის მონაცემებით, ქალაქის ტიპის დასახლებებში უმუშევრობის დონე 14,3%-ია, ხოლო სოფლის ტიპის დასახლებებში — 12,8%. წინა წლის შესაბამის პერიოდთან შედარებით, უმუშევრობის დონე ქალაქის ტიპის დასახლებებში 3.5 პროცენტული პუნქტით შემცირდა, ხოლო სოფლის ტიპის დასახლებებში — 2.5 პროცენტული პუნქტით.

უმუშევრობის დონე სქესის მიხედვით (პროცენტებში)

უმუშევრობის დონე ქალებთან შედარებით კაცებში კვლავ მაღალი რჩება. საქსტატის მონაცემებით, 2024 წლის II კვარტალში ქალებში უმუშევრობის დონემ 10,9% შეადგინა, ხოლო კაცებში — 15,9%. წინა წლის შესაბამის პერიოდთან შედარებით, აღნიშნული მაჩვენებელი 3.6 პროცენტული პუნქტით არის შემცირებული ქალებში, ხოლო კაცებში — 2.6 პროცენტული პუნქტით. 2024 წლის I კვარტალთან შედარებით, ქალებში უმუშევრობის დონე 0,2 პროცენტული პუნქტით შემცირდა, კაცებში კი — 0,4 პროცენტული პუნქტით.

დასაქმების დონე სქესის მიხედვით (პროცენტებში)

წინა წლის შესაბამის პერიოდთან შედარებით, 2024 წლის II კვარტალში დასაქმების დონე გაიზარდა როგორც ქალებში, ისე კაცებში. როგორც დიაგრამაზე ვხედავთ, კაცებში დასაქმების დონემ 55,6% შეადგინა, ხოლო ქალებში — 39,6%. რაც შეეხება წინა წლის შესაბამის პერიოდთან მიმართებას, დასაქმების დონე ქალებში 2.9 პროცენტული პუნქტით არის გაზრდილი, ხოლო კაცებში — 2.6 პროცენტული პუნქტით.