რამდენი პროცენტით გაიზარდა საშუალო ხელფასი დამხმარე პროფესიებზე — სტატისტიკა

შრომის ბაზარზე დამხმარე პოზიციებზე მოთხოვნა დღითიდღე იზრდება, რაც სხვადასხვა ფაქტორით არის განპირობებული. მომხმარებელთა მრავალფეროვანი მოთხოვნები, ბიზნესების ზრდა, სწრაფი ურბანიზაცია, დროის დეფიციტი თანამედროვე სამყაროში — იმ მიზეზების მცირე ჩამონათვალია, რომლებმაც ბოლო პერიოდში დამხმარე პროფესიების საჭიროება გამოკვეთა. ბუნებრივია, რომ მსგავსი ტენდენცია დამხმარე პროფესიების საშუალო ხელფასებზეც აისახა. გთავაზობთ SS.ge-ის 2024 წლის შემაჯამებელ სტატისტიკას იმის შესახებ, თუ რამდენი პროცენტით გაიზარდა დამხმარე პროფესიებზე საშუალო ხელფასი 2023 წელთან შედარებით:

ავეჯის ხელოსანი — 11%

ავტოსერვისი —12 %

რემონტი, მშენებლობა —  9%

ხელოსანი, შეკეთება, მონტაჟი — 2%

სტატისტიკის მიხედვით, მშენებლობასთან და რემონტთან დაკავშირებულ საქმიანობებზე საშუალო ხელფასი გასულ წელს 9%-ით გაიზარდა. საქართველოს დიდ ქალაქებში არაერთი საცხოვრებელი კომპლექსი შენდება, პარალელურად კი ახალი კომერციული სივრცეებიც მშენებლებსა და ხელოსნებზე მოთხოვნას ზრდის. ამასთანავე, ბოლო დროს პოპულარულია ხელოსნის გამოძახება, რომელსაც დაზიანებული ტექნიკის შეცვლა/დამონტაჟება მოკლე დროში შეუძლია, რაც მომხმარებლისთვის კომფორტული გადაწყვეტილებაა. ახალი საცხოვრებლების ათვისება მოთხოვნას ზრდის ავეჯის დამზადებასა თუ აღდგენაზე, ამ მხრივ კი, ხელოსნების ანაზღაურება 11%-ით არის გაზრდილი.

მძღოლი — 26%

კურიერი — 15%

დაცვა — 15%

ტრანსპორტი, დისტრიბუცია — 2%

პროფესიონალ მძღოლებს დღეს საქართველოში სხვადასხვა მიმართულებით შეუძლიათ დასაქმება. ერთი მხრივ, ტაქსის აპლიკაციებმა და მეორე მხრივ, სხვადასხვა სფეროს კომპანიების მიერ მძღოლების დაქირავებამ ამ პროფესიაზე ანაზღაურება 26%-ით გაზარდა. ონლაინ ვაჭრობამ და მიტანის სერვისმა კი კურიერების მომსახურება განსაკუთრებით აქტუალური გახადა. ხშირად დამსაქმებლები ყურადღებას აქცევენ გყავთ თუ არა საკუთარი ავტომობილი, გრაფიკის მხრივ კი ამ მიმართულებით თქვენზე მორგებული დროების შერჩევაც შეგიძლიათ. ასევე, მრავალი კომპანია თავის მომსახურებას რეგიონებშიც აფართოებს, რაც დისტრიბუციის საჭიროებას ზრდის.

ძიძა, მომვლელი, დამხმარე — 17%

დამლაგებელი, მრეცხავი — 13%

მზარეული, მცხობელი — 6%

მკერავი — 6%

ბოლო პერიოდში განსაკუთრებით მოთხოვნადია ისეთი პროფესიები, როგორებიცაა ძიძა, მომვლელი, დამხმარე თუ დამლაგებელი. საქართველოში უმეტესად ორივე მშობელი დასაქმებულია, რაც ძიძებზე მოთხოვნას ზრდის. გამოცდილებისა და დამატებითი უნარების შემთხვევაში (მაგალითად, თუ ბავშვისთვის ინგლისურის სწავლება შეგიძლიათ), ანაზღაურებაც უფრო იზრდება, რამაც ბოლო ერთ წელში 17% შეადგინა. ასევე, თანამედროვე ცხოვრების აჩქარებული ტემპიდან გამომდინარე, ბევრ ადამიანს საყოფაცხოვრებო საქმეებისთვის დრო არ რჩება და მიმართავს დამლაგებელსა თუ მრეცხავს. ამ მიმართულებით კი შეგიძლიათ დღიურად გამოიმუშაოთ ან უფრო გრძელვადიანი ხელშეკრულებით დასაქმდეთ.

გაყიდვების მენეჯერი — 24%

გამყიდველი მოლარე — 8%

სასტუმრო, ტურიზმი — 7%

გაყიდვებისა და მომსახურების სფეროში პროფესიონალებზე მოთხოვნა ტრადიციულად მაღალია. კონკურენციიდან გამომდინარე, გაყიდვების ზრდა ბიზნესებისთვის მთავარი პრიორიტეტია, რამაც 2024 წელს პროფესიონალი მენეჯერების ანაზღაურება 24%-ით გაზარდა. ამავდროულად, ვითარდება საცალო ვაჭრობის სფეროც და იქმნება დამატებითი სამუშაო ადგილები გამყიდველებისა თუ მოლარეებისთვის, დამსაქმებლები კი კანდიდატის შერჩევისას ხშირად გამოცდილებას არ ითხოვენ.