რა ცვლილებებია საქართველოს შრომის ბაზარზე — 2024-2025 წლის სტატისტიკა

SS.ge/jobs-ის მონაცემებით, ბოლო რამდენიმე წლის განმავლობაში ვაკანსიების რაოდენობას ზრდის ტენდენცია ახასიათებდა. როგორც წესი, ვაკანსიების რაოდენობა წლიდან წლამდე 15-22%-ით იზრდებოდა, თუმცა 2024 წლის IV კვარტალმა ეს დინამიკა რადიკალურად შეცვალა. 2024 წლის IV კვარტალში მკვეთრი ვარდნა შეინიშნებოდა, რაც 2025 წლის დასაწყისზეც აისახა. 2024 წელთან შედარებით, 2025 წლის იანვარში განსაკუთრებული კლება შეინიშნებოდა ისეთ სფეროებში, როგორებიცაა  ჰორეკა, მომსახურება, უსაფრთხოება, სასტუმრო და ტურიზმი.

სეზონურობის მიუხედავად, თვე წინა წლის იმავე თვესთან მიმართებით მუდმივად მზარდი ტენდენციით ხასიათდებოდა, თუმცა 2025 იანვარი ამ მხრივაც გამონაკლისია და ვაკანსიების რაოდენობა 2024 იანვართან შედარებით 4.17 პროცენტით შემცირდა. 2025 წლის იანვარში 2024 წლის იანვართან შედარებით ვაკანსიების რაოდენობამ შემდეგი მიმართულებებით დაიკლო: სასტუმრო/ტურიზმი 37,70%-ით შემცირდა, მზარეული/ მცხობელი 25,14%-ით, გამყიდველი/ მოლარე 18,49%-ით, ავტო სფერო 4,76%-ით, ხოლო დაცვა 2,56%-ით არის შემცირებული.

მიუხედავად საერთო კლებისა, ზოგიერთი მიმართულება ზრდას კვლავ განაგრძობდა. 2025 წლის იანვარში 2024 წლის იანვართან შედარებით ვაკანსიების რაოდენობა ბუღალტერიის, ფინანსებისა და მედიცინის მიმართულებით გაიზარდა. ასევე,  რემონტი/მშენებლობის მიმართულებითაც ზრდა დაფიქსირდა, სხვა სფეროებში კი პროცენტული მატების მაჩვენებელი ასეთია: ფაბრიკა/წარმოება — 32,35%, მუშა/მტვირთავი — 23,08%, ძიძა/ მომვლელი — 12,5%, დამლაგებელი — 10,16. აღსანიშნავია, რომ ბოლო ორი წელია, საქსტატის მონაცემებით ფაბრიკა-წარმოების მიმართულებას მზარდი ტენდენცია ახასიათებს, რაც SS.ge/jobs-ის მონაცემებითაც დასტურდება.