![123r](https://static.ss.ge/20220801/8d60f6fe-5637-4a3a-88d7-ff7f5bb45096.jpg)
როგორ გამოვიმუშაოთ ფულის სწორად ხარჯვის ჩვევა?
ფულის ჭკვიანურად
ხარჯვის ჩვევა ისეთივე მნიშვნელოვანია, როგორც მისი გამომუშავება. ყოველი შენაძენის
გაკეთებამდე ბევრის ფიქრი და დარჩენილი ბიუჯეტის თვლა ერთი შეხედვით მოსაბეზრებელი
და არასასიამოვნო პროცესია, თუმცა აუცილებელი, რადგან არაგონივრულად ხარჯვის გამო შეიძლება
მნიშვნელოვან დროს დანაზოგის გარეშე დავრჩეთ და ამან პრობლემები შეგვიქმნას.
ზოგადად, სწორად
მხარჯველი ადამიანის ცხოვრების ხარისხი უფრო მაღალია, რადგან ის სწორად ანაწილებს შემოსავალს
საჭიროებებსა თუ სურვილებზე და ყოველთვის აქვს საკმარისი გადადებული იმისთვის, რომ
გაუთვალისწინებელ სიტუაციაში, დასასვენებლად ან სხვა მსგავს შემთხვევებში თავი დაიზღვიოს.
თანხის სწორად
ხარჯვის ჩვევის გამომუშავება ყოველდღიურად განმეორებითი მოქმედებებით არის შესაძლებელი:
იმპულსურად ყიდვისგან თავშეკავება, კონკრეტულ სიტუაციაში სურვილისა და საჭიროების ერთმანეთისგან
გამიჯვნა, ზედმეტი ხარჯების შემცირება - მაგალითად, ყავის სახლში მომზადებით და არა
დილით კაფეში შეძენით და სხვა.
ცნობილი ბესტსელერის
„ფულის ფსიქოლოგიის“ ავტორი მორგან ჰაუზელი წერს, რომ „შესაძლებლობა, გააკეთო რაც გინდა,
როცა გინდა, ვისთან ერთადაც გინდა და რამდენ ხანსაც გინდა, შეუფასებელია და ეს არის
ყველაზე დიდი დივიდენდი, რისი მოცემაც ფულს შეუძლია.“ ფულის არასწორად ხარჯვით, ამის
გამო მუდმივად სწრაფი და იოლი შემოსავლის ძიებითა და მუდმივად კრედიტებით სავსე ცხოვრება
კი ნაკლებად გაძლევს ჰაუზელის მიერ აღწერილ შესაძლებლობებს.
სწორედ ამიტომ გთავაზობთ 5 რეკომენდაციას, როგორ გამოვიმუშაოთ ფულის სწორად
ხარჯვის ჩვევა:
დავფიქრდეთ ყოველი შენაძენის გაკეთებისას
ყველაფერი, რასაც
ყოველთვიურად ხელფასის აღებისას ვყიდულობთ, რეალურად შეიძლება არ გვჭირდებოდეს, მაგრამ
მიმზიდველი შეთავაზებები და ახლის ფლობის სურვილი შენაძენის გაკეთებისკენ გვიბიძგებს.
იმპულსურად ყიდვის კონტროლი შესაძლებელია, მთავარია მოვინდომოთ. მსგავსი შენაძენის
გაკეთების რიცხვი განსაკუთრებით იზრდება სადღესასწაულო ფასდაკლებებზე, როცა ადამიანები
გადაწყვეტილებას უმეტესად არა ნივთის ღირებულების, არამედ საინტერესო შეთავაზების გამო
იღებენ.
დაფიქრება, რეალურად
გვჭირდება თუ არა ნივთი, გამოვიყენებთ თუ არა მას და ხომ არ არის მასში გადახდილი თანხა,
ფაქტობრივად, გადაყრილის ტოლფასი, სწორი გადაწყვეტილების მიღებაში დაგვეხმარება. რეალურად,
შეიძლება, სუნამო, რომელსაც 50%-იანი ფასდაკლების გამო ვიძენდით სულად არ არის ჩვენთვის
საინტერესო და სხვა უფრო საჭირო ნივთის შეძენა გვირჩევნია.
ვიფიქროთ იმ ნივთის / ქონების სამომავლო ღირებულებაზე, რომლის შეძენასაც
ვგეგმავთ
უძრავ ან მოძრავ ქონებაში ინვესტირება მართლაც ჭკვიანურია, თუმცა არ დაგვავიწყდეს,
რომ ამ შემთხვევაშიც შენაძენის გაკეთებისას დაფიქრება გვმართებს.
მაგალითად, მოძრავი ქონების - ოქროსა და ბრილიანტის შემთხვევაში უნდა გვახსოვდეს,
რომ ის შეიძლება იმავე ფასად ვერ გავყიდოთ, რა ფასადაც შევიძინეთ და საჭიროების შემთხვევაში,
გადახდილი თანხის მხოლოდ ნაწილი ამოვიღოთ. მიუხედავად იმისა, რომ ოქროსა და ბრილიანტის
ფასი მუდმივად იზრდება, მყიდველი დიდ მნიშვნელობას ანიჭებს ხარისხს, მის მდგომარეობას,
რიგ შემთხვევაში ბრენდსა და სხვა დეტალებს, ამიტომ ძვირფას თვლებსა და მეტალებში თანხის
დაბანდებისას უნდა დავფიქრდეთ, სხვა უკეთესი ალტერნატივა ხომ არ გვაქვს?
აღსანიშნავია, რომ სხვა ნახევრად ძვირფას თვლებში ან სხვა მეტალებში ინვესტირების
მიზნით თანხის გადახდა არ ღირს და შეიძლება მხოლოდ პირადი მოხმარებისთვის შევიძინოთ.
ამ შემთხვევაში სასურველია, თუ აღნიშნულ ნივთებში ბევრს არ გადავიხდით.
არ გავაკეთოთ საკრედიტო ბარათი, თუ არ გვჭირდება
იგი
საჭიროების შემთხვევაში დამატებით ფულად რესურსზე ხელმისაწვდომობა მნიშვნელოვანია,
თუმცა თუ მას მხოლოდ პირადი სურვილების დასაკმაყოფილებლად ვხარჯავთ, შეიძლება არასახარბიელო
მდგომარეობაში აღმოვჩნდეთ.
საკრედიტო ბარათი საჭირო და ერთ-ერთი საუკეთესო საბანკო პროდუქტია, რადგან
საშეღავათო პერიოდის განმავლობაში ლიმიტს ხარჯავ ისე, რომ შევსების ბოლო ვადამდე პროცენტი
არ ერიცხება. ვადის გადაჭარბების შემთხვევაში კი ერთ-ერთი ყველაზე მაღალი პროცენტითა
და არახელსაყრელი პირობებით გამოირჩევა. თუ ვამჩნევთ, რომ ფულის ხარჯვისას თავის კონტროლი
გვიჭირს და გადახარჯვის საფრთხე დიდია, სჯობს აუცილებელი საჭიროების გარდა საკრედიტო
ბარათის გაკეთებისგან თავი შევიკავოთ.
დავისახოთ მიზანი
მაგალითად, თუ მიზნად დავისახავთ, რომ წლის ბოლოს მოგზაურობისთვის შეგროვებული
უნდა გვქონდეს 4000 ლარი და ამისთვის გავაკეთებთ ვადიან ანაბარს, უნდა გავუძლოთ მისი
დარღვევის ცდუნებას, როცა მაღაზიის ვიტრინიდან ჩვენთვის საინტერესო ფასდაკლებას გვთავაზობენ
და უცებ თანხა გვჭირდება.
მიზნის დასახვა თანხის დაგროვებასა და სწორად ხარჯვაში დაგვეხმარება.
შევამციროთ „უხილავი“ ხარჯები
სხვადასხვა საბანკო მომსახურების საკომისიო, პრაიმ მიტანის სერვისი და
სხვა ასეთი გამოწერები საბოლოო ჯამში ყოველთვიურად სოლიდურ თანხას შეადგენს, რაც შეიძლებოდა
უფრო გონივრულად გამოგვეყენებინა. რეალურად, შეიძლება მიტანის სერვისით ერთი თვის განმავლობაში
სულაც არ ვისარგებლოთ, მაგრამ საკომისიო გადავიხადოთ, რაც წამგებიან მდგომარეობაში
გვაყენებს.
უკეთესი იქნებოდა, ასეთი სერვისებით მხოლოდ საჭიროებისას გვესარგებლა და
საფასურიც ამ შემთხვევაში გადაგვეხადა, ხოლო გამოწერების გაუქმებით წლიურ ჭრილში მნიშვნელოვან
თანხას დავზოგავთ.
![](https://static.ss.ge/20220801/496e3619-6c73-4d2e-afb2-45b4a7579ad0_Thumb.jpg)
![popular blog image](https://static.ss.ge/49c73942-1514-467d-8f2b-667dbdf14226.jpg)
![](/img/seperatorBlogs.png)
![popular blog image](https://static.ss.ge/24ad0e17-afc4-4f5f-90bc-07c16d5067a8.jpg)
![](/img/seperatorBlogs.png)
![popular blog image](https://static.ss.ge/836bda56-5801-46e2-916c-c94e295f37ae.jpg)
![](/img/seperatorBlogs.png)
![popular blog image](https://static.ss.ge/155ca949-8bf1-4ab1-add8-4cef1c59134e.jpg)
![](/img/seperatorBlogs.png)