![ლეცმ;ლმცლქ](https://static.ss.ge/20220831/8f80e6df-edfc-4db5-a3b5-a20b01d6f76e.jpg)
ძირითადად რა ტიპის ანაბრებს გვთავაზობენ ბანკები და როგორ შევარჩიოთ ჩვენთვის სასურველი დეპოზიტი
ვადიანი და ზრდადი ანაბარი, „ჩემი ყულაბა“,
მოთხოვნადი ანაბარი - ეს დეპოზიტების სახეობების მცირე ჩამონათვალია, რასაც ქართულ
ბაზარზე მოქმედი კომერციული ბანკები მომხმარებელს სთავაზობენ. ანაბრის გახსნა ზოგ შემთხვევაში
10 ლარიდან არის შესაძლებელი და თანაც უფასოდ.
ზოგადად, ანაბარი, იგივე დეპოზიტი მსოფლიოში
ყველაზე გავრცელებული საბანკო პროდუქტია. განვითარებულ ქვეყნებში დეპოზიტებზე თანხის
შეგროვებას მომხმარებელი ძირითადად მაშინ იწყებს, როცა სრულწლოვანია და სტაბილური შემოსავალი
აქვს. განვითარებად ქვეყნებში კი, მათ შორის, საქართველოში, სადაც მოსახლეობის დიდი
ნაწილის ხარჯები შემოსავლებს ბევრად აჭარბებს, დეპოზიტის გახსნა ცოტა რთული, თუმცა
წარმოუდგენელი ნამდვილად არ არის.
საქართველოში ანაბრის გახსნა ყველა კომერციულ
ბანკშია შესაძლებელი. დეპოზიტების ძირითადი სახეობა კი ასეთია - ვადიანი, ზრდადი, მოთხოვნამდე და ა.შ. ჩვენ
რამდენიმე მათგანს განვიხილავთ:
„ვადიანი ანაბარი“
ვადიანი ანაბარი - ეს არის მომხმარებლის მიერ კომერციულ ბანკში კონკრეტული ვადით განთავსებული თანხა, რომელსაც
ერიცხება ფიქსირებული საპროცენტო განაკვეთი. ვადიანი დეპოზიტი იხსნება კონკრეტული ვადით
და კონკრეტული თანხით, ხელშეკრულების მოქმედების პერიოდში კი თანხის დამატება შეუძლებელია.
ჩვეულებრივ, სხვა ტიპის დეპოზიტებთან შედარებით, ვადიან ანაბრებზე საპროცენტო განაკვეთები შედარებით მაღალია.
ვადიანი ანაბარი იხსნება დაახლოებით 3-იდან 24 თვემდე
ვადით, საწყისი თანხა კი სხვადასხვა ბანკის შემთხვევაში 100-500 ლარს (დოლარს/ევროს/ფუნტს) შეადგენს.
წლიური საპროცენტო განაკვეთები ლარში 10%-დან იწყება და 12,4%-მდე ადის. დოლარში -
0,3%-დან 1,95%-მდე, ფუნტში კი საშუალო წლიური საპროცენტო სარგებელი 0,5%-1,15%-ია. საპროცენტო სარგებელი კი იმის
მიხედვით იზრდება, თუ რა ვადით ანთავსებთ თანხას დეპოზიტზე. რაც უფრო მეტი ვადით გაქვთ
ანაბარზე თანხა, მით მეტ სარგებელს იღებთ ბანკისგან.
„შეგროვებადი ანაბარი“
შეგროვებადი ანაბარი ასევე 3-დან 24 თვის ვადით იხსნება, თუმცა ამ შემთხვევაში
თანხის დამატება ნებისმიერ დროს არის შესაძლებელი. სარგებლის მიღება კი ხდება ყოველთვიურად
ან ვადის გასვლის შემდეგ. შეგროვებადი ანაბრის გახსნა შესაძლებელია როგორც ლარში, ასევე
დოლარსა და ფუნტში, საწყისი თანხა ზოგიერთ ბანკში 0 ლარია, ზოგ ბანკში კი 10 ერთეულიდან
იწყება (ლარი/დოლარი/ფუნტი).
რაც შეეხება სარგებელს, ლარში 9%-დან იწყება და 12,2%-მდე ადის. დოლარში
0,3%-დან 1,45%-მდე, ფუნტში საშუალო საპროცენტო სარგებელი 1,15%-ია, ევროში კი
0,5%-დან 1,7%-მდე. თუმცა უნდა აღინიშნოს, რომ ბაზარზე მოქმედ კომერციული ბანკების
ნაწილში ევროს დეპოზიტებს ვერ გახსნით და ძირითადი თანხა არის ლარი/დოლარი/ფუნტი.
„ყულაბა“
ერთ-ერთი ყველაზე მოთხოვნადი და პოპულარული საბანკო
დეპოზიტის სახეობაა "ყულაბა", რომლის საშუალებითაც, ბარათით ყოველი ტრანზაქციის
განხორციელებისას, თანხის სასურველი ოდენობის "ყულაბაში" გადარიცხვა შეგიძლიათ.
მაგალითად, თუ საბანკო სადებეტო ბარათს დღეში 3-ჯერ გამოიყენებთ, „ყულაბაში“ გადასარიცხ
თანხად კი მითითებული გაქვთ 3 ლარი ერთ ტრანზაქციაზე, მაშინ დღის ბოლოს ანაბარს ჯამში
9 ლარი დაემატება. ამ შემთხვევაშიც ანაბარი მინიმუმ 3 თვის იხსნება. საპროცენტო სარგებელი
ლარის შემთხვევაში 10,9%-დან იწყება და 11,8%-მდე ადის. „ყულაბაში“ თანხის დაგროვება
ძირითადად ლარში ხდება, რამდენადაც ქართული კანონმდებლობით ქვეყანაში გადახდის მთავარი
ვალუტა არის ლარი.
"მოთხოვნამდე ანაბარი"
მისი გახსნის შემთხვევაში, თქვენს ანაბარს თანხას
ნებისმიერი მოცულობით, თქვენთვის სასურველ დროს დაამატებთ და მისი განკარგვაც ნებისმიერ
დროს შეგიძლიათ. დეპოზიტის გახსნისთვის მინიმალური პირველადი შენატანი
500 ერთეული ლარი ან დოლარი უნდა
იყოს. წლიური საპროცენტო სარგებელი ლარში საშუალოდ 7%-ია, დოლაში - 0,25%.
ჩვენ შემოგთავაზეთ საბანკო დეპოზიტების მცირე
ჩამონათვალი, რომელსაც ბანკები მომხმარებელს სთავაზობენ. როგორც ამ მონაცემებიდან ჩანს,
ანაბარზე პროცენტი ეროვნულ ვალუტაზე უფრო მაღალია, შესაბამისად, დეპოზიტით სარგებლობა ლარში უფრო
ხელსაყრელია. თუმცა,
გადაწყვეტილებას საბოლოოდ დეპოზიტარი იღებს და ის წყვეტს, რომელ ვალუტაში იქნება მისთვის
მომგებიანი თანხის შენახვა.
![](https://static.ss.ge/20220831/bf1323a3-14e5-446e-88e1-73d1f7acf412_Thumb.jpg)
![popular blog image](https://static.ss.ge/49c73942-1514-467d-8f2b-667dbdf14226.jpg)
![](/img/seperatorBlogs.png)
![popular blog image](https://static.ss.ge/24ad0e17-afc4-4f5f-90bc-07c16d5067a8.jpg)
![](/img/seperatorBlogs.png)
![popular blog image](https://static.ss.ge/836bda56-5801-46e2-916c-c94e295f37ae.jpg)
![](/img/seperatorBlogs.png)
![popular blog image](https://static.ss.ge/155ca949-8bf1-4ab1-add8-4cef1c59134e.jpg)
![](/img/seperatorBlogs.png)