ბირჟაზე ოქროს ფასი მკვეთრად შემცირდა - რამდენად კარგი დროა შესაძენად?

საერთაშორისო ბირჟაზე ოქროს ფასი მკვეთრად შემცირდა. თებერვლის დასაწყისში თუ მეტალი 1,955 დოლარი ღირდა, ახლა ღირებულებამ თითქმის 100 დოლარით დაიკლო და 1860 დოლარამდეა შემცირებული.

ოქროს ღირებულების კლება აშშ-ს ფედერალური რეზერვის (Fed) მიერ შრომითი ბაზრის მონაცემების გამოქვეყნებამ განაპირობა, რომლის მიხედვითაც, მიმდინარე წლის იანვარში ქვეყანაში დამატებით 517,000 ადამიანი დასაქმდა, რაც ეკონომისტების გამოთვლებს, 185,000-ს მნიშვნელოვნად აღემატებოდა. აღსანიშნავია, რომ ამერიკაში უმუშევრობის დონე ამჟამად 3.4%-ზეა, რაც 1969 წლის შემდეგ ყველაზე დაბალი მაჩვენებელია.

სტატისტიკამ აჩვენა, რომ ფედერალური რეზერვის აგრესიულმა მონეტარულმა პოლიტიკამ და საპროცენტო განაკვეთების ზრდამ, რაც რეცესიის რისკებს იწვევდა, თანამშრომლების დაქირავება არ შეაფერხა.

უმუშევრობის დონის მონაცემებს აშშ-ს ფედერალური რეზერვის გადაწყვეტილებებზე მნიშვნელოვანი გავლენა აქვს. უმუშევრობის შემცირება ცხადყოფს, რომ მდგომარეობა მოსალოდნელზე უკეთესია და Fed-ს მონეტარული პოლიტიკის გამკაცრება იმაზე მეტით შეეძლება, ვიდრე ბოლო სხდომაზე. ცნობისთვის, ბოლო სხდომაზე ფედერალურმა რეზერვმა რეფინანსირების განაკვეთი, რომელიც ახლა 2007 წლის შემდეგ ყველაზე მაღალ მაჩვენებელზეა, კიდევ 0.25 პროცენტული პუნქტით გაზარდა. როგორც მოსალოდნელია, საპროცენტო განაკვეთები მომდევნო სხდომაზეც გაიზრდება.

Fed-ის მიერ მონეტარული პოლიტიკის გამკაცრება კი დოლარის გამყარებას იწვევს, რაც უარყოფითად აისახება ოქროს ფასებზე - ინვესტორები ამჯობინებენ კაპიტალი გამყარებულ ამერიკულ ვალუტაში დააბანდონ და არა ოქროში.

თუმცა, უნდა ითქვას ისიც, რომ ეკონომიკურ გაურკვევლობისა და მაღალი ინფლაციის ფონზე ადამიანები საინვესტიციო გეგმებს ცვლიან. საფონდო ბირჟაზე მერყეობამ და მსოფლიოში განვითარებულმა მოვლენებმა მათზე მნიშვნელოვანი გავლენა იქონია.

სწორედ ამ პირობებში, ბევრი ინვესტორი თანხის ოქროში დაბანდებას ამჯობინებს, რადგან, ტრადიციულად, ოქრო ინფლაციის წინააღმდეგ ჰეჯირების კარგი საშუალებაა, რადგან ეკონომიკურად ტურბულენტურ პერიოდებში მისი ფასი იზრდება. მარტივად რომ ვთქვათ, ჰეჯირება რისკების შემცირებას გულისხმობს.

მიუხედავად იმისა, ახლა გეგმავთ ინვესტირებას, ახლო ან შორეულ მომავალში, ან საერთოდ არ გეგმავთ, მაგრამ გსურთ ინფორმაცია გქონდეთ, გაგაცნობთ რამდენიმე მიზეზს, თუ რატომ შეიძლება იყოს ოქროს ყიდვა კარგი იდეა.

როგორც უკვე ვახსენეთ, ოქრო ინფლაციის წინააღმდეგ რისკების დაზღვევასა და შემცირებაში გვეხმარება. ის არის აქტივი, რომელიც, უმეტესად, ინარჩუნებს საკუთარ ღირებულებას, აქვს ზრდის პოტენციალი და შემცირების შემთხვევაში, მარტივად აღიდგენს ფასს.

როგორც ჩიკაგოს ფედერალური ბანკი წერს, „ ინფლაციის ზრდისას ან ზრდის მოლოდინისას ინვესტორები ოქროში დაბანდების მეტ ინტერესს გამოხატავენ, რაც მის ფასის ზრდასაც იწვევს. ხოლო ინფლაციის შემცირება ან შემცირების მოლოდინი საპირისპიროდ მოქმედებს“.

ამასთან, სხვა ბევრი აქტივისგან განსხვავებით, ოქრო მაღალი ლიკვიდურობით გამოირჩევა და მისი გაყიდვა მარტივადაა შესაძლებელი. ოქროზე მოთხოვნა თითქმის ყოველთვისაა - იქნება ეს მონეტები, ზოდები თუ ნებისმიერი სხვა. მისი მსყიდველობითი უნარი მარტივად არ მცირდება.

მართალია, ოქროს ფასმა შესაძლოა რყევები განიცადოს სხვადასხვა ფაქტორების გამო, თუმცა თუ იმგვარი აქტივის ფლობა გსურთ, რომელსაც ადვილად და სწრაფად აქცევთ თანხად, მაშინ ის კარგი ალტერნატივაა.

ოქრო თქვენს პორტფოლიოს დივერსიფიცირებულს გახდის - ეს კიდევ ერთი მიზეზია, რატომაც ამ მეტალში ინვესტირება შესაძლოა, უპირატესი იყოს. თუ თქვენ ასაკოვანი ინვესტორი ხართ, რომელსაც სურს სტაბილური, რეალური შემოსავალი დანაზოგიდან, ეს ალბათ კარგი იდეა არ იქნება, თუმცა პირიქით შეიძლება იყოს შედარებით ახალგაზრდებისთვის, რომელთაც პორტფოლიოს დივერსიფიცირება სურთ.

იმის მაგივრად, რომ თქვენი მთლიანი თანხა აქციებსა და ბონდებში დააბანდოთ, განსხვავებულ აქტივში ინვესტირება რისკების მართვაში დაგეხმარებათ და გაგიზრდით შანსს, რომ თქვენი ფინანსური შესაძლებლობები გაუმჯობესდეს.