როგორ დავზოგოთ ელექტროენერგიის გადასახადი?

საყოფაცხოვრებო ტექნიკას უმეტესად დენის წყაროში ჩართულს ვტოვებთ ხოლმე, რისი მიზეზიც გადატვირთული ცხოვრების წესი, დაღლილობა ან უბრალოდ, უყურადღებობა შეიძლება იყოს. ამ მცირე დეტალმა კი შეიძლება, თვის ბოლოს კომუნალურ გადასახადებზე მცირედით, მაგრამ მაინც იმოქმედოს.

ტექნიკურ მეცნიერებათა პროფესორის, თემურ ხუნდაძის თქმით, ტექნიკის ხარჯი, რომელსაც არ ვიყენებთ, მაგრამ კვების წყაროში მუდმივად ჩართულია, საათში 3-5 ვატ-ია.

"მეტ-ნაკლებად „ტექნოლოგიურ ოჯახში“, კვების წყაროში დაახლოებით, 10-15 ნივთია ჩართული, უმეტესი ნაწილი - უფუნქციოდ. მაგალითად, თუ ტელევიზორს მხოლოდ პულტის საშუალებით ვთიშავთ, დენის წყაროში კი ისევ ჩართულია, ეს იმას ნიშნავს, რომ ის მუშა მდგომარეობაშია და ელექტროენერგიას ხარჯავს", - აღნიშნავს ის.

პროფესორის თქმით, საქართველოში ვარვარის ძაფიანი ნათურებიდან ეკონომიურ, ლედ ნათურებს გადასვლის კულტურა ბოლომდე დამკვიდრებული ჯერჯერობით არ არის, სწორედ ამიტომ, ეს ოჯახების ეკონომიკურ მდგომარეობაზეც აისახება.

"24 საათის განმავლობაში, მინიმუმ ერთი 50 ვატ-იანი ნათურა თუ გვაქვს ჩართული, თვის ბოლოს, 4-5 ლარი დამატებითი ხარჯი გამოდის, რომლის დაზოგვაც შეიძლებოდა“, -განმარტავს ის.

თემურ ხუნდაძის თქმით, ლედ ნათურებს ფუნქციონირება 50 000 და მეტი საათის განმავლობაში შეუძლიათ, ვარვარის ძაფიან ნათურებს კი 3 000 ან 5 000 საათის განმავლობაში, შესაბამისად, ლედ ნათურა საკუთარ სიძვირეს ეკონომიურობით ფარავს.

"თუ ჩვეულებრივი ნათურა 100 ვატ-ს ხარჯავს, ლედ ნათურის შემთხვევაში, ეს 10-15 ვატ-ია იყენებს. ასევე, ოთახებში ხანდახან დიდი ჭაღები გვაქვს, რომელზეც რამდენიმე ნათურაა მოთავსებული და როდესაც ყველა მათგანის განათება არ გვესაჭიროება, რამდენიმე სექციანი ჩამრთველი უნდა გამოვიყენოთ. შეგვიძლია ჭაღზე ორი, სამი, ხუთი ან რამდენიც მოგვესურვება, იმდენი ნათურა გავანათოთ,"-აღნიშნავს თემურ ხუნდაძე.

თემურ ხუნდაძე მაცივრის სწორ ადგილზე მოთავსებასთან დაკავშირებითაც აკეთებს განმარტებას, რაც ასევე გრძელვადიან პერსპექტივაში კომუნალური გადასახადების დაზოგვის საშუალებას მოგვცემს:

"მაცივარი უკანა მხრიდან კედელთან მაქსიმალურად გვაქვს მიდგმული, თუმცა მას გამოყენების წესებში მითითებული აქვს, რომ კედლიდან გარკვეული დისტანციით, 10-15 სანტიმეტრით მაინც უნდა იყოს დაშორებული. თუ მაცივარს კედელთან მაქსიმალურად ახლოს დავდგამთ, ის ინტენსიურ რეჟიმში იმუშავებს და უფრო მეტ ელექტროენერგიას დახარჯავს. ჩათვალეთ, რომ ეს თვის ბოლოს გადახდილი ზედმეტი 5 ლარია,"-განმარტავს პროფესორი.

მისივე თქმით, ელექტროენერგიის ეკონომიას გავაკეთებთ ტელევიზორის დენის წყაროდან გამორთვის შემთხვევაშიც, რადგან ჩვენი უმეტესობა მას დისტანციური პულტის მეშვეობით, Sleep რეჟიმით თიშავს ხოლმე.

"თუ კონდიციონერით ვთბებით, ჩათვალეთ, რომ თვის ბოლოს კომუნალური გადასახადი 20 ლარით მეტი მაინც მოგივათ, შესაბამისად, ეს დიდი შეცდომაა. იმავეს თქმა შეიძლება ნებისმიერ ელექტროგამაცხელებელზე"- განმარტავს პროფესორი კონდიციონერით გათბობასთან დაკავშირებით.

მისივე თქმით, ცენტრალური გათბობის შემთხვევაში, ტემპერატურა 25 გრადუსს არ უნდა აღემატებოდეს, რაც საშუალებას მოგვცემს, ადეკვატური ხარჯი გავწიოთ. აქვე, მნიშვნელობა აქვს, როგორია სახლის დათბუნება და რა მასალებით არის ის აშენებული.

„რაც შეეხება სარეცხის მანქანას, როდესაც მუშაობას დაასრულებს, მაინც ხარჯავს ელექტროენერგიას, რადგან კვების ბლოკშია ჩართული და ვფიქრობ, უმჯობესია, ამასაც მივაქციოთ ყურადღება",-აღნიშნავს პროფესორი თემურ ხუნდაძე.

ერთი შეხედვით მცირე, მაგრამ გასათვალისწინებელი დეტალები საშუალებას მოგცემს, კომუნალური გადასახადები გარკვეულწილად დავზოგოთ, განსაკუთრებით იმის ფონზე, როცა ზამთარში, ზაფხულის სეზონთან შედარებით ათეულობით ლარით მეტს ვიხდით.