სესხების გაერთიანების დადებითი და უარყოფითი მხარეები

დღევანდელობაში ადამიანები მრავალ საკრედიტო ბარათს ფლობენ, აქვთ სხვადასხვა ტიპის სესხი, იქნება ეს სტუდენტური, ავტო სესხი თუ სხვა, რაც გადახდების გაკონტროლებას და ერთ დინებაში მოქცევას ართულებს. სხვადასხვა სესხის გაერთიანება, შესაძლოა, ამ ფინანსების თავმოყრაში დაგეხმაროთ, მაგრამ ნაკლებად სავარაუდოა, რომ ამ სტრატეგიამ თქვენი ყველა ფინანსური პრობლემა გადაჭრას. სწორედ ამიტომ, სწორი გადაწყვეტილების მისაღებად, საჭიროა, ვიცოდეთ ამ ტაქტიკის დადებითი და უარყოფითი მხარეები.

თავდაპირველად, უნდა განვმარტოთ, საერთოდ, რას გულისხმობს სესხების გაერთიანება. ესაა პროცესი რამდენიმე სესხის დაფარვისა ახალი სესხის მეშვეობით, რომელიც, ხშირ შემთხვევაში, უფრო დაბალ პროცენტშია.

ახალი პირობებიდან გამომდინარე, სესხების კონსოლიდაციით, შესაძლოა, ყოველთვიური გადასახადი შეგიმცირდეთ, დაფაროთ სესხი უფრო მალე ან გაიუმჯობესოთ საკრედიტო ქულა.

ეს პროცესი სამი ნაწილისგან შედგება:

1.      ახალი სესხის გამოტანა;

2.      ახალი სესხით ძველი სესხების დაფარვა;

3.      ახალი სესხის დაფარვა.

მაგალითისთვის, თქვენ 20,000 დოლარის სესხი გაქვთ აღებული 3 სხვადასხვა ბარათის გამოყენებით და თითოეული მათგანის საპროცენტო განაკვეთი 20%-ზე მაღალია. თუ იმავე თანხას სხვა საპროცენტო განაკვეთით, მაგალითად, 10%-ში გამოიტანთ და ვთქვათ, 5 წელზე გადაანაწილებთ, შესაძლოა, სესხი უფრო მალე დაფაროთ და თანხის დაზოგვაც მოახერხოთ.

სესხის კონსოლიდაცია, როგორც წესი, კარგი ვარიანტია მათთვის, ვისაც რამდენიმე სესხი აქვს აღებული და თანაც, მაღალ პროცენტში. თუმცა ამის გაკეთებამდე რამდენიმე მნიშვნელოვანი დეტალია გასათვალისწინებელი.

პირველ რიგში, უკვე აღებული კრედიტების შემდეგ თქვენი საკრედიტო ქულა გაუმჯობესებული უნდა იყოს, რათა უკეთეს პირობებზე განაცხადის გაკეთებას აზრი ჰქონდეს.

მეორე, რასაც ყურადღება უნდა მიაქციოთ, არის ის, თუ რამდენად გადაფასებული გაქვთ ის პრობლემები (მაგალითად, ზედმეტი ხარჯვა, გემბლინგი და სხვ.) , რამაც სესხების აღებამდე მიგიყვანათ. წინააღმდეგ შემთხვევაში, სესხების გაერთიანებაზე ფიქრი აზრს მოკლებულია.

რა უპირატესობები აქვს სესხების გაერთიანებას?

როგორც უკვე ვთქვით, სესხების გაერთიანებას რამდენიმე დადებითი შედეგი შეიძლება მოჰყვეს, მათ შორის, უფრო სწრაფად, სისტემატიზებულად გადახდა და საპროცენტო განაკვეთის შემცირება.

პირველ რიგში, რამდენიმე სესხის გაერთიანება დაგეხმარებათ, შეამციროთ გადახდების ოდენობა. ეს ხელს შეგიწყობთ იმაში, რომ არ გამოგრჩეთ გადახდის თარიღი და არ დაგეკისროთ ჯარიმა, რადგან რამდენჯერმე გადახდის მაგივრად თვეში ამის გაკეთება მხოლოდ ერთხელ მოგიწევთ.

თავის დროზე გადახდა და ძველი სესხების დაფარვა კი, დროთა განმავლობაში, თქვენს საკრედიტო ქულასაც გააუმჯობესებს.

სესხების კონსოლიდაციის კიდევ ერთი უპირატესობა საპროცენტო განაკვეთის შესაძლო შემცირებაა. თუკი თქვენი საკრედიტო ქულა შესაბამისია, მაშინ, შეგიძლიათ, უკეთესი კონტრაქტი გააფორმოთ, თუმცა გაითვალისწინეთ, რომ ეს სტრატეგია ყველა ტიპის სესხზე არ მოქმედებს და საჭიროა ინდივიდუალური განხილვა.

როდესაც სესხებს გააერთიანებთ, თქვენი ყოველთვიური გადასახადიც, დიდი ალბათობით, შემცირდება, რადგან ახალი პირობებით, ვადები, როგორც წესი, უფრო მეტ დროზეა გათვლილი. მიუხედავად ყოველთვიური გადასახადის შემცირებისა, თუნდაც უფრო დაბალ პროცენტში იყოს აღებული სესხი, ვადის გახანგრძლივებით გამოდის, რომ ცხოვრების განმავლობაში, საერთო ჯამში, სესხის დასაფარად უფრო მეტის გადახდა მოგიწევთ.

რა უარყოფითი მხარეები აქვს სესხების გაერთიანებას?

დადებით მხარეებზე საუბრისას, აუცილებლად უნდა აღვნიშნოთ, რომ ამ სტრატეგიას გარკვეული რისკებიც ახლავს თან.

სხვა სესხების გადასაფარად ახალი კრედიტის აღებას, შესაძლოა, დამატებითი ხარჯები მოჰყვეს, ამიტომ, როდესაც ამის გაკეთებას დაგეგმავთ, კარგად გადაამოწმეთ, საბოლო ჯამში, რა დაგიჯდებათ ეს.

უკვე ვახსენეთ, რომ თუ დაბალი საპროცენტო განაკვეთის პირობებს აკმაყოფილებთ, სესხების გაერთიანება ჭკვიანურია, მაგრამ, ზოგჯერ, არასაკმარისი საკრედიტო ქულის გამო, შესაძლოა, პირიქით მაღალი განაკვეთი მიიღოთ, ვიდრე წინა სესხებზე გქონდათ.

თუმცა მაშინაც კი, თუ თქვენი საპროცენტო განაკვეთი კონსოლიდაციის შემდეგ შემცირდა, ახალი და უფრო გრძელვადიანი პირობებით, შესაძლოა, სიცოცხლის განმავლობაში, ჯამურად, სესხზე უფრო მეტი თანხის გადახდა მოგიწიოთ.

ფრთხილად უნდა იყოთ გადახდის თარიღებთანაც, რადგან გამოტოვებამ შესაძლოა თქვენი საკრედიტო ქულა მნიშვნელოვნად გააუარესოს. ამის თავიდან ასარიდებლად, შეგიძლიათ, ავტომატური გადახდის სერვისით ისარგებლოთ.

და ბოლოს, აუცილებლად გაანალიზეთ წინა სესხის აღების მიზეზები, რათა უფრო ცუდ მდგომარეობაში არ აღმოჩნდეთ. ამასთან, სესხების გაერთიანებამ, შესაძლოა, შეგიქმნათ ილუზია, რომ გაქვთ იმაზე მეტი ფული, ვიდრე სინამდვილეში, ამიტომ, საჭიროა, ყურადღება მიაქციოთ და გაწეროთ თქვენი ბიუჯეტი.