როგორ მოვამზადოთ ავტომობილი ზამთრისთვის

იმისათვის, რომ უსაფრთხოდ და შეუფერხებლად შეძლოთ ავტომობილით ზამთარში გადაადგილება, საჭიროა ზაფხულის საბურავების შეცვლა - ზამთრის საბურავებით, ასევე ანტიფრიზის შემოწმება და კიდევ რამდენიმე აუცილებელი დეტალი, რომლის შესახებაც ქვემოთ ვისაუბრებთ.

ზამთრის საბურავები 

ზამთარში საბურავების გამოცვლა აუცილებელია. საქართველოში დიდი პოპულარობით მეორადი მოხმარების ზამთრის საბურავები სარგებლობს. მათი ყიდვისას, პირველ რიგში, ყურადღება წლოვანებას უნდა მივაქციოთ. თუ საბურავი 5 წელიწადზე მეტისაა, რეზინა თავის ფუნქციას კარგავს, ხისტდება და ფაქტობრივად აღარ განსხვავდება ზაფხულის საბურავისგან. ამასთან, გასათვალისწინებელია, რომ ავტომობილი ტექინსპექტირებას ვერ გაივლის, თუ საბურავი 10 წელზე მეტისაა.

საბურავის წლოვანება, მის ერთ-ერთ გვერდზეა დატანილი და 4 ციფრისგან შედგება. აქედან, პირველი ორი აღნიშნავს თუ რომელ კვირასაა საბურავი წარმოებული, ხოლო ბოლო ორი კი წარმოების წელს. მაგ: 2618 ნიშნავს, რომ საბურავი 2018 წლის 26-ე კვირას არის დამზადებული.

ასევე გაითვალისწინეთ, რომ ზამთრისთვის უკეთესია ის საბურავი, რომელსაც ფიფქი ახატია ან პირდაპირ აწერია, რომ ის ზამთრისთვისაა განკუთვნილი. ზამთრის საბურავებს წვიმაში, თოვლში, ყინულზე ან უბრალოდ ცივ ამინდში უკეთესი მოჭიდება აქვს. მისი პროტექტორები“ რეზინის უფრო მეტ კონცეტრაციას შეიცავს, რაც იმას ნიშნავს, რომ დაბალ ტემპერატურაზე არ ხისტდება. პირიქით, ის უფრო მოქნილი ხდება, რაც მნიშვნელოვნად ამცირებს სამუხრუჭე მანძილს.

ანტიფრიზი

ტემპერატურის დაწევისთანავე, ავტომობილის სისტემაში უნდა შევამოწმოთ ანტიფრიზის მდგომარეობა. იგი, როგორც წესი 2-3 წელში ერთხელ იცვლება ავტომობილში. სხვადასხვა ძრავის მქონე მანქანებს, სხვადასხვა სახის ანტიფრიზი სჭირდება. ერთ-ერთი მთავარი განმასხვავებელი მისი ფერია.

ავტომობილში არსებული ანტიფრიზის ვარგისიანობის და საჭირო ოდენობის დადგენის მიზნით, უმჯობესია სპეციალისტს მიმართოთ და ნუ მიიღებთ გადაწყვეტილებას შესაბამისი გამოცდილების გარეშე. გახსოვდეთ, რომ ატნიფრიზი არამხოლოდ ყინვისგან დაცვაზეა პასუხისმგებელი, არამედ ავტომობილის ძრავის სისტემაში, საპოხის ფუნქციასაც ასრულებს.

აკუმულატორი

ზამთრის ერთ-ერთი პრობლემა ავტომობილში აკუმულატორია. ცნობილი ფრაზაა აკუმულატორზე - „რაღა ზამთარში მოკვდა“, რაც იმით არის გამოწვეული, რომ თუკი აკუმულატორს რაიმე სახის პრობლემა ჰქონდა, ის ზამთარში იჩენს თავს, რადგან დაბალ ტემპერატურაზე, დიდხანს ვერ ძლებს.

თუ შევატყვეთ, რომ ავტომობილის აკუმულატორი სუსტია, აუცილებლად უნდა შევცვალოთ, რადგან მოულოდნელად გზაში არ დავრჩეთ, თან ზამთარში. ეს განსაკუთრებით მნიშვნელოვანია მაშინ, თუ ავტომობილი ავტომატური გადაცემათა კოლოფით არის აღჭურვილი.

საქარე მინის საწმენდი

საქარე მინის წმენდა, განსაკუთრებით ხშირად ზამთარში გვჭირდება. გარდა კარგი საწმენდი ჯაგრისებისა, მინის წმენდისთვის, ზამთარში აუცილებელია სპეციალური სითხის გამოყენება, ისეთის, რომელიც არ იყინება. გაითვალისწინეთ, რომ აღნიშნული სითხე, მისი სპეციფიკური კონცენტრაციის წყალობით უფრო უკეთ წმენდს საქარე მინას, ამიტომ მისი გამოყენება ზაფხულშიც რეკომენდირებულია.