რომელია ყველაზე პერსპექტიული პროფესიები?

პროფესიის არჩევისას უნდა განსაზღვროთ რამდენიმე მნიშვნელოვანი ფაქტორი:

• კარიერული ზრდის შესაძლებლობა. კარიერული ზრდა ზოგიერთ პროფესიაში რთულად მისაღწევია, რადგან მოითხოვს გარკვეულ ასაკს ან დიდ მიღწევებს, რომლებიც დროშია გაწელილი. 

• ახალი სამუშაო ადგილების შექმნის პერსპექტივა. ზოგიერთი პროფესია, რომლებიც წარსულში დიდი პოპულარობით სარგებლობდა, დღესდღეობით აღარ არის ისეთივე წარმატებული. მაგალითად, 50-75 წლის წინ ინდუსტრიულმა წარმოებამ პიკს მიაღწია, რაც დადებითად აისახებოდა საზოგადოებაზეც. მაგრამ დღეს წარმოება ძირითადად დამოკიდებულია თანამედროვე ტექნოლოგიებზე. 

• კომფორტული პირობები. ამ კრიტერიუმის განსაზღვრა რთულია, რადგან ყველასათვის განსხვავებულია. თუმცა კომფორტულ პირობებს ძირითადად განსაზღვრავს ანაზღაურება და პირადი კმაყოფილება. შესაფერისი კარიერის ძიებას დიდი დრო და განხილვა სჭირდება. თუმცა დადებითი შედეგის მიღწევა ყოველთვის შესაძლებელია, თუ ყველა ფაქტორი ერთად იქნება შეფასებული.

კარიერის უმეტესობა, რომელიც აკმაყოფილებს ამ კრიტერიუმებს, მიეკუთვნება ჯანდაცვისა და ტექნოლოგიების ფართო სფეროებს. ეს გასაკვირი არ არის, რადგან ორივე სწრაფად მზარდი სექტორია.

OOH (პროფესიული პერსპექტივის სახელმძღვანელო) არის რესურსი, რომელიც გთავაზობთ ინფორმაციას ასობით პროფესიის შესახებ. თითოეული პროფესიული პროფილი აღწერს შესასრულებელ მოვალეობას, სამუშაო გარემოს, საჭირო განათლებას და სხვა მნიშვნელოვან ფაქტორებს. 2020-იან წლებში უფრო მეტად განვითარდა ისეთი სფეროები როგორებიცაა ჯანდაცვა, ტექნოლოგია, მომსახურება  და კულინარია. OOH-ის პროგნოზით, ამ პროფესიებზე მოთხოვნა კიდევ 10%-ით გაიზრდება. ხოლო ეკონომიკის სხვა სექტორებზე საშუალოდ 4%-ით.

1. პროგრამული უზრუნველყოფის შემქმნელი

ქმნიან სისტემებს, რომლებიც ხელს უწყობენ პროგრამების ჩართვასა და გააქტიურებას. პრაქტიკულად ყველაფერი, რასაც ხედავთ თქვენს ტელეფონზე ან კომპიუტერზე, შექმნილია პროგრამული უზრუნველყოფის დეველოპერის მიერ. მათი უმეტესობა მუშაობს ბიზნესისთვის, რომელიც აქვეყნებს პროგრამულ უზრუნველყოფას ან აწარმოებს კომპიუტერებსა და სხვა მოწყობილობებს. დეველოპერებმა უნდა გააგრძელონ სწავლა მთელი კარიერის განმავლობაში, ინფორმაციის მისაღებად ახალი კომპიუტერული ენებისა და პროგრამირების ხელსაწყოების შესახებ. 

2. ინფორმაციული უსაფრთხოების ანალიტიკოსი

მსოფლიო სულ უფრო ციფრულდება და  იზრდება კიბერუსაფრთხოების საჭიროებაც. IBM-ის მონაცემებით, მონაცემთა დარღვევის საშუალო ჯამური ღირებულება 3,92 მილიონი დოლარია. ამიტომ კომპანიები მზად არიან ნებისმიერ ფასად დაიცვან საკუთარი ინფორმაცია. 

ინფორმაციული უსაფრთხოების ანალიტიკოსები იცავენ კომპიუტერულ ქსელებსა და სისტემებს კიბერდანაშაულისგან. ასევე ამზადებენ ინფორმაციის აღდგენის გეგმას, კომპანიაზე თავდასხმის შემთხვევაში. მათი უმეტესობა მუშაობს საკონსულტაციო ფირმებში, კომპიუტერულ, ბიზნეს და ფინანსურ კომპანიებში.

3. კომპიუტერული და საინფორმაციო სისტემების მენეჯერი

საინფორმაციო სისტემების მენეჯერები პასუხისმგებელნი არიან ყველა კომპიუტერული სისტემის, მასთან დაკავშირებული აპლიკაციების, აპარატურის და პროგრამული უზრუნველყოფის უსაფრთხო და ეფექტურ მუშაობაზე. ბევრ ორგანიზაციას ჰყავს მრავალი ადამიანი, რომლებიც პასუხისმგებელნი არიან კომპიუტერულ და საინფორმაციო სისტემების მენეჯმენტზე, თითოეულს აქვს სხვადასხვა პასუხისმგებლობა. მაგალითად, ტექნოლოგიის მთავარი ოფიცერი, რომელიც პასუხისმგებელია კონკრეტული ტექნოლოგიური გადაწყვეტილებების შემუშავებაზე და განხორციელებაზე; სხვადასხვა საინფორმაციო ტექნოლოგიების დირექტორი და სხვა. ამ პროფესიონალების ყველაზე დიდი დამსაქმებლები არიან კომპიუტერული, საინფორმაციო და ფინანსური კომპანიები.

4. სამედიცინო და ჯანდაცვის მომსახურების მენეჯერი  

ჯანდაცვა დიდი და რთული საქმეა, პაციენტებზე ზრუნვა მხოლოდ მისი ნაწილია. ჯანდაცვის სფერო საჭიროებს ისეთ საქმიანობებს, როგორიცაა სამუშაო შეხვედრების დაგეგმვა, გადახდების შეგროვება, სამედიცინო ჩანაწერების შენახვა და სხვა. სამედიცინო და ჯანდაცვის სერვისების მენეჯერები ზედამხედველობას უწევენ ყველა ამ საქმიანობას. ისინი მუშაობენ ყველა სახის სამედიცინო დაწესებულებაში.

5. თერაპევტი  

სამედიცინო სფერო ყოველთვის პერსპექტიულია, რადგან ადამიანებს ყოველთვის სჭირდებათ სამედიცინო დახმარება. ექიმი თერაპევტი კი წამყვანი ფიგურაა სამედიცინო დაწესებულებაში. ის მრავალპროფილიანი ექიმია, რომელსაც გააჩნია ღრმა ცოდნა შინაგანი ორგანოების დაავადებების შესახებ. მასზე დამოკიდებულია დიაგნოზის სიზუსტე და სწორი მკურნალობა.

6. სამშენებლო პროექტების მენეჯერი 

პროექტების მენეჯერი არის პასუხისმგებელი სამშენებლო პროექტების წარმატებაზე. ისინი ჩართულნი არიან მშენებლობის პროცესის ყველა ეტაპზე. მიუხედავად იმისა, რომ სამშენებლო მენეჯერებს ხშირად აქვთ მუდმივი ოფისი, დროის უმეტეს ნაწილს სამშენებლო ობიექტებზე ატარებენ. მუშაობენ მფლობელთან, არქიტექტორთან, გენერალურ კონტრაქტორთან და სხვა დაინტერესებულ მხარეებთან, რათა დაადგინოს სამშენებლო ოპერაციების საუკეთესო შესაძლო თანმიმდევრობა, შეიმუშაონ დეტალური გრაფიკი და ბიუჯეტი.

7. ფინანსური მენეჯერი 

აკონტროლებს ორგანიზაციის ფინანსურ ჯანმრთელობას და ეხმარება სიცოცხლისუნარიანობის შენარჩუნებაში. თვალყურს ადევნებს ორგანიზაციის შემოსავალს და ხარჯებს, ეძებენ გზებს მაქსიმალური მოგებისა და ხარჯების შესამცირებლად. ფინანსურ მენეჯერებს შეუძლიათ იმუშაონ ნებისმიერი სახის ორგანიზაციაში, მათ შორის ბიზნესში, არაკომერციულ და სამთავრობო უწყებებში. ისინი მჭიდროდ თანამშრომლობენ აღმასრულებელ დირექტორებთან და მონაცემთა შეგროვების განყოფილებებთან.