როგორ დავზოგოთ ფული

ფულის დაზოგვა ჩვენი  სამომავლო კეთილდღეობის ზრდის ერთ-ერთი მთავარი პირობაა. ეკონომიკაში დანაზოგს ინვესტიციის ტოლად განიხილავენ. ეს კი იმას ნიშნავს, რომ ჩვენი დანაზოგი პარალელურად გარკვეულ ინვესტიციას უდრის. მაგალითად თუ ჩვენ ვზოგავთ თანხას დეპოზიტის სახით, ამ თანხას ბანკი იღებს და ასესხებს სხვა ადამიანს, რომელსაც სურს გარკვეული საქმის დაწყება და ინვესტიციას საჭიროებს. გარდა დეპოზიტებისა, დაზოგილი ფულით შესაძლებელია ამა თუ იმ კომპანიის აქციების ან თუნდაც ციფრული ვალუტის ყიდვა. ცხადია ეს ყველაფერი სამომავლოდ ჩვენი კეთილდღეობის უფრო მეტად ზრდას ემსახურება.

სწორედ ამიტომ სტატიაში გაეცნობით 10 ყველაზე მნიშვნელოვან „ტექნიკას“, რომელიც ხელს შეგიწყობთ თანხის დაზოგვასა და კეთილდღეობის ზრდაში.

1.   მუდმივად თვალყური ადევნეთ თქვენს ხარჯებს-  უნდა აღინიშნოს, რომ საქართველოში არსებული საბანკო სისტემა საკმაოდ წინაა წასული განვითარებისა და ინოვაციების ხარისხით. შესაბამისად, თქვენ ყოველთვიურად თქვენივე მობაილ ბანკით შესაძლებლობა გაქვთ, რომ მუდმივი მონიტორინგი გაუწით ხარჯებს. აღმოაჩინოთ რაში ხარჯავთ ზედმეტს და შემდეგ მის გამოსწორებას შეუდგეთ. მობაილ ბანკის არარსებობის შემთხვევაში კი შეგიძლიათ უბრალოდ  სმარტფონში თქვენითვე დათვალოთ ყოველთვიურად სად რაში და რამდენს ხარჯავთ.

2. განასხვავეთ მოთხოვნილებები და საჭიროებები ერთმანეთისგან- ალბათ ეს ერთ-ერთი ყველაზე დიდი გამოწვევაა, განსაკუთრებით კი ქართველებისთვის, რომლებიც მიჩვეულები ვართ, რომ მაგალითად ჩვენს მეზობელზე ძვირადღირებული მანქანა, მაცივარი ან თუნდაც ტელევიზორი გვქონდეს. ამ დროს თქვენ თავს დაუსვით კითხვა ნამდვილად გჭირდებათ მაგალითად მერსედეს S კლასი თუ შესაძლებელია რომ უბრალოდ პრიუსით ან სხვა ბიუჯეტური მანქანით იაროთ? ნამდვილად გჭირდებათ 42 დიუმიანი ტელევიზორი თუ უფრო პატარა პარამეტრებისაც გეყოფათ? როდესაც ამ კითხვებს დაუსვამთ თქვენ თავს მაშინ შეძლებთ განასხვავოთ რა გჭირდება და რა მოთხოვნა გაქვთ. თანხის დაზოგვის დროს კი ცხადია, რომ ჩვენი საჭიროებებიდან უნდა გამოვიდეთ.

3. მოერიდეთ კრედიტების აღებას თქვენი მიმდინარე გადასახდელების დასაფარად - ზოგადად კრედიტის აღებაში ცუდი არაფერია იმ შემთხვევაში თუ აღნიშნული თანხით ჩვენ გარკვეულ საქმიანობას დავიწყებთ, რომელიც შემოსავლის მომტანი იქნება, თუმცა მიმდინარე ხარჯების დაფარვისთვის კრედიტის აღება არასწორია. გასაგებია, რომ მოკლევადიან პერიოდში თქვენ შეძლებთ თქვენი გადასახდელები დაფაროთ აღებული კრედიტით, თუმცა გრძელვადიან პერიოდში თქვენ მაინც მოგიწევთ ამ გადასახდელების გადახდა, მაგრამ ახლა არა მხოლოდ ამ გადასახდელების, არამედ ბანკის კრედიტის გადახდაც მოგიწევთ. შესაბამისად თქვენი ხარჯვითი ტვირთი უფრო მეტად გაიზრდება და დაზოგვისთვის ფული აღარ დაგრჩებათ.

4.   დაზოგეთ რეგულარულად - დღესდღეობით ამის ყველანაირი პირობა არსებობს. მაგალითად, თქვენ შეგიძლიათ ყოველთვიურად შემოსავლის გარკვეული ნაწილი ვადიან ანაბარზე განათავსოთ. ამით თქვენ ფულის დაზოგვასთან ერთად დამატებით შემოსავალსაც მიიღებთ პროცენტის სახით.  კიდევ უფრო მეტი სტიმულისთვის თქვენ შეგიძლიათ, რომ ეს ყველაფერი ავტომატურ რეჟიმზე გადაიყვანოთ, ასე მაგალითად, ყოველი თვის X რიცხვში თქვენი შემოსავლიდან 100 ლარი გადაირიცხოს ანაბარზე. ასე თქვენ ზედმეტად შეწუხებაც არ მოგიწევთ .

5.   უფრთხილდით დიდი მოცულობით თანხების დახარჯვას - ასეთი ტიპის ხარჯები შეიძლება იყოს მაგალითად, საჩუქრების ყიდვა, ან თუნდაც შვებულების დროს გაწეული ხარჯები. მიუხედავად იმისა, რომ ხარჯვის მომენტში შეიძლება თავს კარგად და ბედნიერად გრძნობდეთ, შესაძლოა, მოგვიანებით თქვენ უბრალოდ ფულის გარეშე დარჩეთ.

6.   შეეცადეთ შეამციროთ ელექტროენერგიის ხარჯი- თქვენ შეგიძლია გამორთოთ ესა თუ ის მოწყობილება, ან თუნდაც ნათურა მაშინ, როცა მისი საჭიროება არ არსებობს. ამასთან, შეგიძლიათ შეიძინოთ ენერგოეფექტური ნათურები, რომლებიც ყოველთვიური გადასახადის მოცულობას შეგიმცირებთ. სხვა თუ არაფერი შეგიძლიათ გრილი ამინდის დროს თბილი სვიტერი ჩაიცვათ იმის მაგივრად, რომ გათბობა ჩართოთ. საბოლოო ჯამში ეს ყველაფერი შეგიმცირებთ ყოველთვიურ კომუნალურ ხარჯს.

7.   შეამცირეთ მიტანის სერვისის ხარჯები - საკვების, წამლებისა თუ სხვა პროდუქტების მიტანის სერვისი საქართველოში შეგვიძლია ვთქვათ რომ განვითარებულია. თუმცა მიტანის სერვისი დამატებითი ხარჯია, რომელიც პროდუქტის სარგებლობას უფრო გიძვირებთ. ამიტომ სადაც შესაძლებლობა არსებობს შეამცირეთ მიტანის სერვისის ხარჯები. ასე მაგალითად, ჩვენ კვირაში ერთხელ მაინც ვიძახებთ ამა თუ იმ საკვებს აპლიკაციებით, რომელთა მიტანის სერვისი საშუალოდ 5 ლარია. ანუ გამოდის, რომ თვეში დამატებით 20 ლარის ხარჯი გვაქვს, 1 წელში კი 240 ლარის. თან არ დაგავიწყდეთ რომ ეს მაგალითი კვირაში ერთხელ მიტანის სერვისით სარგებლობას გულისხმობს. რეალურ ცხოვრებაში 1 კვირის განმავლობაში ადამაინები უფრო ხშირადაც ვსარგებლობთ მიტანის სერვისით.

8.  ჩამოწერეთ დაზოგვის მიზნები - ეს ალბათ ერთ-ერთი ყველაზე მარტივი საქმეა. უბრალოდ ჩამოწერეთ რისთვის გინდათ ფულის დაზოგვა: მანქანისთვის? მაცივრის ყიდვისთვის? ლეპტოპისთვის? ჩამოწერილი მიზნების შემდეგ თქვენი სტიმული და მიდრეკილება დაზოგვისადმი გაიზრდება. ცხადია ეს მაშინ ხდება, როდესაც მიზნები ნათელია. მიზნების იდენტიფიცირება თქვენი კონცენტრაციის უნარს კიდევ უფრო განავითარებს.

9.  იარეთ საზოგადოებრივი ტრანსპორტით - საინტერესოა მაგრამ ფაქტია, რომ ის ადამიანები, რომლებიც გადაადგილების საშუალებად მუდმივად ტაქსს იყენებე, ხშირ შემთხვევაში  ფულს უბრალოდ ვერ ზოგავენ. ტაქს აქვს გაცილებით ბიუჯეტური ალტერნატივა საზოგადოებრივი ტრანსპორტის სახით. მაგალთად, შეგვიძლია ავიღოთ მეტრო. ტაქსის მომსახურებისგან განსხვავებით მეტრო ბიუჯეტურია. ამასთან თუ ქალაქში არსებულ საცობებს გავითვალისწინებთ, მეტრო დროის ეკონომიის მიმართულებითაც შესანიშნავი გამოსავალია.

1  საყიდლებზე წასვლამდე შეადგინეთ სია - სამწუხაროდ, საქართველოში სიების შედგენა საკმაოდ სუსტი პრაქტიკაა. ხშირ შემთხვევაში როცა სუპერმარკეტში შევდივართ რეალურად არ ვიცით რა გვინდა და ვყიდულობთ ისე პროდუქტებს, რომლებიც საერთოდ არ გვჭირდება. შემდეგ როცა ჩეკს ვუყურებთ ვბრაზდებით თუ რამდენი ფული დაგვეხარჯა. ამიტომ ამის თავიდან ასარიდებლად საყიდლებამდე შეადგინეთ სია- კონკრეტულად რა გჭირდებათ და რა რაოდენობის.