რომელია უფრო მომგებიანი: სესხი თუ საკრედიტო ბარათი?

თუ თქვენი მიმდინარე ხარჯი შემოსავალს აჭარბებს, დამატებითი ფინანსების მოძიება მოგიწევთ. ამისთვის რამდენიმე გზა არსებობს, მაგრამ ძირითადი მათგანი საკრედიტო ბარათი ან სესხია. ორივე შემთხვევაში სასურველ თანხას წინასწარ იღებთ და მას შემდეგ ეტაპობრივად, თვეებზე გადანაწილებულს იხდით. თუმცა აღნიშნულ ორ პროდუქტს შორის მნიშვნელოვანი სხვაობაა პროცენტის დარიცხვისა და დაფარვის წესებში.

განვიხილოთ თითოეული მათგანის განაღდებისა და დაფარვის წესები, რომელთა მიხედვითაც თქვენთვის საჭიროს მარტივად შეარჩევთ.

სესხი

სესხის ასაღებად გარკვეული მოთხოვნების დაკმაყოფილებაა საჭირო. დამტკიცების შემდეგ თანხას იღებთ ერთჯერადად და სრულად. მისი ნაწილ-ნაწილ გამოტანა შეუძლებელია. თუმცა შეგიძლიათ ის ერთიანად გადაიტანოთ თქვენს ანგარიშზე და მერე მოიხმაროთ თქვენი სურვილისამებრ, ერთიანად ან ნაწილ-ნაწილ. ნებისმიერ შემთხვევაში ყოველთვიური პროცენტიც სრული თანხის უნდა გადაიხადოთ. ამ დროს კი თქვენ შეიძლება თანხა საბანკო ანგარიშზე ან სახლში გქონდეთ შენახული.

ყოველთვიური გადასახადის ოდენობა და გადახდის თარიღები სესხის დამტკიცებისთანავე გეცნობებათ. აღნიშნულ გაწერილ გრაფიკს ზედმიწევნით უნდა მიჰყვეთ. სესხის შემთხვევაში თანხის წინსწრებით დაფარვაზე პირგასამტეხლო დაგეკისრებათ, თუ მისი მოხსნის შესახებ წინასწარ ხელშეკრულებაში არ გაქვთ გაწერილი.

პროცენტი ერიცხება მთელ თანხას და სესხის სრულად დაფარვამდე იხდით სრული თანხის პროცენტს და არა - დარჩენილი ნაწილის. სესხის დაფარული ნაწილის უკან გამოტანა შეუძლებელია.

საკრედიტო ბარათი

საკრედიტო ბარათს ბანკი რამდენიმე წლით ამტკიცებს და ამ პერიოდის განმავლობაში თანხის განაღდება და დაფარვა იმდენჯერ შეგიძლიათ, რამდენჯერაც ამას საჭიროდ ჩათვლით. შეგიძლიათ თანხა გაანაღდოთ ან გადაიხადოთ ნებისმიერ ობიექტზე, სადაც ტერმინალით გადახდა შესაძლებელია. თუმცა გაითვალისწინეთ, რომ განაღდებას უფრო მაღალი საპროცენტო განაკვეთი აქვს, ვიდრე ტერმინალებზე გადახდას. რაც შეეხება გადასახადს, მას მხოლოდ იმ თანხისას იხდით, რომელსაც გამოიყენებთ და მხოლოდ იმ პერიოდში, როცა თანხა გააქტიურებული გაქვთ. მარტივად რომ ვთქვათ, პროცენტი მხოლოდ მაშინ გერიცხებათ, როცა ხარჯავთ. გადახდის დღე შეგიძლიათ თავად აირჩიოთ და ამ დღემდე ნებისმიერ დღეს შეგიძლიათ გადაიხადოთ მინიმალური თანხა. თანხის სრულად დაფარვის შემთხვევაში წინსწრებით გადახდის თანხა არ დაგერიცხებათ.

საკრედიტო ბარათების განსაკუთრებული მახასიათებელია საშეღავათო პერიოდი. საშეღავათო პერიოდის ფარგლებში თანხის პირველი განაღდებიდან დაახლოებით 2 თვიანი ვადით სარგებლობის პროცენტს არ იხდით. ანუ თუ დავალიანებას საშეღავათო პერიოდის განმავლობაში დაფარავთ, თანხას ყოველგვარი პროცენტის გარეშე გამოიყენებთ.

სესხი და საკრედიტო ბარათი თანხის მიღების სრულიად განსხვავებული გზებია. მათგან რომელია თქვენთვის ოპტიმალური, საკუთარი საჭიროებებისა და მიზნების მიხედვით უნდა გადაწყვიტოთ. გაუთვალისწინებელი ხარჯებისთვის უმჯობესია, საკრედიტო ბარათს მიანიჭოთ უპირატესობა. გარკვეული მიზნებისა და უფრო მსხვილი ხარჯებისთვის კი სესხი უკეთესი ფინანსური პროდუქტია.