როგორ დავაბალანსოთ პირადი ცხოვრება და სამსახური

ბალანსის შენარჩუნება სამსახურსა და პირად ცხოვრებას შორის ძალიან მნიშვნელოვანია როგორც ჯანმრთელობისთვის, ასევე გარშემომყოფებთან ურთიერთობებისთვისაც. თუკი გიჭირთ შეფასება, რამდენად დაბალანსებულია თქვენი პირადი და სამსახურეობრივი ცხოვრება, არსებობს ნიშნები, რომელსაც შეგიძლიათ დააკვირდეთ ყოველდღიურობაში და შესაბამისად განსაზღვროთ რომელიმე მათგანი ხომ არ გახშირდა თქვენს ცხოვრებაში: სამუშაოს მიაქვს დღის უმეტესი ნაწილი და მუშაობთ დასვენების დღეებშიც, არ გძინავთ საკმარისად, ვერ უთმობთ საკმარის დროს სხეულის გაჯანსაღებას და ფიზიკურ აქტივობას, ოჯახის წევრები და მეგობრები ჩივიან, რომ მათთვის არ გცალიათ, ხშირად განიცდით სტრესსა და შფოთვას, მუდმივად სამსახურზე ფიქრობთ, არ გაქვთ ჰობი, სამსახურებრივ მეილს ამოწმებთ არასამუშაო დროს და ა.შ. თუკი ამ ნიშნებიდან ბევრი მათგანი გეცნობათ და თქვენს შეგრძნებებთან აიგივებთ, დროა დაიწყოთ ბალანსზე ზრუნვა.

1.    დაისახეთ რეალური მიზნები

დღე-ღამის 24 საათის დაყოფა იდეალურ შემთხვევაში შემდეგნაირადაა შესაძლებელი: 8 საათი სამუშაოსთვის, 8 საათი ძილისთვის, 8 საათი კი ოჯახისთვის და მეგობრებისთვის. თუმცა როგორ იდეალურადაც ჟღერს, მისი შესრულება ყოველდღიურობაში რთულია და ყველა დღე ერთმანეთს არ ჰგავს, შეიძლება ერთი დღე სამსახურისთვის მოგიწიოთ მეტი დროის დათმობა, მეორე დღეს კი ოჯახური საქმეების მოგვარებისთვის. აქედან გამომდინარე, ამის გამო თავი არ უნდა დაისტრესოთ და მოერგოთ მოქნილ გრაფიკს. ბალანსის დაცვა მნიშვნელოვანია გრძელვადიან პერსპექტივაში, მაგალითად ერთხელ შაბათ-კვირას ფორსმაჟორში მუშაობა არ ავნებს თქვენს ბალანსს, თუმცა თუ ამას რეგულარული სახე მიეცემა, ამ შემთხვევაში უკვე საყურადღებოა. დასახეთ რეალისტური მიზნები დღის გეგმების გადასანაწილებლად და გეგმებში აუცილებლად მოახვედრეთ მრავალფეროვანი აქტივობები.

2.    პრიორიტეტი მიანიჭეთ თქვენს ჯანმრთელობას

სამსახური მნიშვნელოვანია, მაგრამ თუ თქვენი მენტალური, ფიზიკური და ემოციური მდგომარეობა არ შეესაბამება ნორმებს, თქვენი პროდუქტიულობის დონეც დაეცემა და work-life ბალანსიც დაირღვევა. არსებითად მნიშვნელოვანია, რომ პრიორიტეტი თქვენს ჯანმრთელობას მიანიჭოთ, გამოიმუშაოთ  ჯანსაღი დღიური ჩვევები და მასზე დააშენოთ სხვა ყველაფერი. მაგალითად:

·        ფიზიკური ჯანმრთელობისთვის მინიმუმ 30 წუთი ყოველდღიურად დაუთმეთ ფიზიკურ აქტივობას/მსუბუქ ვარჯიშებს, სუფთა ჰაერს.

·        ყურადღება მიაქციეთ თქვენს პირად ურთიერთობებს ემოციური მდგრადობისთვის. როგორი დაკავებულიც უნდა იყოთ, გამონახეთ დრო მეგობართან თუნდაც რამდენიმე წუთიანი საუბრისთვის.

·        ისეთი ყოველდღიური პრაქტიკები, როგორიცაა მაგალითად მედიტაცია, ყოველდღიური ამოცანების ჩამოწერა და შესრულება, დაგეხმარებათ მენტალური ჯანმრთელობის გაუმჯობესებაში.

აღნიშნული ჩვევების გამომუშავება დაგეხმარებათ ასევე სამსახურს გარეთ არსებული დროის პროდუქტიულად გამოყენებაში და გონებას გაგითავისუფლებთ დასვენების დროს სამსახურზე ფიქრისგან.

3.    ისწავლეთ არას თქმა

არა - მოკლე და ძლიერი სიტყვაა, რომლის თქმაც ხშირად ძალიან რთულია კოლეგებისა და ახლობელი ადამიანებისთვის. იმის გათვალისწინებით, რომ ყველანი ვცდილობთ კოლეგიალურები ვიყოთ სამუშაო ადგილზე, დავეხმაროთ ერთმანეთს ამოცანების შესრულებაში და პრობლემების გადაჭრაში, საგულისხმოა ის ფაქტიც, რომ მაამებელი ქცევა და მუდმივი დათმობა ხშირად აისახება ჩვენს ჯანმრთელობაზე ცუდად, რადგან ბევრ დავალებაზე ერთდროულად დათანხმება შესაძლოა პროფესიული გადაწვის წინაპირობა გახდეს.

4.    ნაყოფიერად გამოიყენეთ შესვენების დრო

დადასტურებული ფაქტია, რომ ნონ-სტოპ რეჟიმში მუშაობა პროდუქტიულობას სრულებით არ ზრდის, კვლევების თანახმად, ყველაზე პროდუქტიული თანამშრომლები ყოველ საათში ერთხელ საშუალოდ 17 წუთით ისვენებენ. ბალანსის შენარჩუნებისა და შრომითი ნაყოფიერების გაზრდისთვის მნიშვნელოვანია დასვენება ისეთი ფორმით, როცა საკუთარ თავს მისცემთ ნამდვილად დასვენების შესაძლებლობას და არ გაატარებთ ამ დროს სოციალური ქსელის თვალიერებასა და მეილების შემოწმებაში. შესვენებიდან რომ განახლებული ენერგიებით დაბრუნდეთ, საჭიროა ეს დრო შემდეგ აქტივობებში გაატაროთ:

·        დატოვეთ ოფისის ტერიტორია - მაგალითად ცოტა ხნით გაიარეთ ფეხით, ლანჩი მიირთვით სამსახურთან ახლოს მდებარე კვების ობიექტში.

·        სოციალიზაცია - არასამსახურეობრივ თემებზე ესაუბრეთ კოლეგებს, დაურეკეთ მეგობარს და მოიკითხეთ, რაც თქვენს ხასიათ გააუმჯობესებს

·        გამოყავით დრო საკუთარი თავისთვის - ეს ნაწილი უკეთესად მუშაობს ინტროვერტების შემთხვევაში, აკეთეთ ის, რასაც თქვენთვის სიამოვნება მოაქვს, წაიკითხეთ რამდენიმე გვერდი, დახატეთ ან მოუსმინეთ მუსიკას.

5.    სახლიდან მუშაობისას გამიჯნეთ სამსახური

როდესაც სახლი და სამსახური ერთ სივრცეში გაქვთ და სახლიდან მუშაობთ, რთულია რომ ერთმანეთისგან გამიჯნოთ ეს ორი. ამისთვის კარგი იქნება თუ ტექნიკებს გამოიმუშავებთ, რაც დაგეხმარებათ რომ პირადი სივრცე არ შეერიოს სამსახურეობრივს. მაგალითად, აუცილებლად გამოყავით სამუშაო საათები, რადგან ოფისიდან სახლში წასასვლელი არ ხართ და ოფისიც სახლში გაქვთ მოწყობილი, ნუ ჩათვლით, რომ ექსტრა საათები მუშაობა შეგიძლიათ. მოიწყვეთ სამუშაო ადგილი, არ იმუშაოთ საწოლიდან. სამუშაო სივრცის მოწყობა შეგიქმნით სამუშაო განწყობას და თქვენი სხეულიც მომართული იქნება სამუშაოსკენ. ამისთვის ცალკე ოთახი არ არის საჭირო, საკმარისი იქნება სამუშაო მაგიდაც, რომელზეც ყველა იმ ატრიბუტს განათავსებთ, რაც მუშაობისთვის გჭირდებათ. არ დაივიწყოთ დილის რუტინაც. სახლიდან მუშაობა იძლევა იმის საშუალებას, რომ მთელი დღე პიჟამოებში გაატაროთ, რადგან ვერავინ გხედავთ, თუმცა ამას პროდუქტიულობაზე ნეგატიური გავლენა აქვს და ადამიანები ასე არასამუშაო განწყობაზე დგებიან და მოდუნებულ მდგომარეობას ეჩვევიან. ამიტომ მნიშვნელოვანია, როგორც სამსახურში წასვლის წინ იქცევით, ისევე გააგრძელოთ დილის აქტივობები, მიიღოთ შხაპი, ისაუზმოთ და გამოეწყოთ სამუშაოდ.

6.    ისაუბრეთ საჭიროებებზე

თქვენი პირადი ცხოვრებისა და სამუშაოს ბალანსის შესანარჩუნებლად, ასევე მნიშვნელოვანია, რომ ღიად ისაუბროთ თქვენს საჭიროებებზე თქვენს უფროსებთან. ნაპოვნი გამოსავალი კი დაგეხმარებათ ორივეს - თქვენც და კომპანიასაც. მაგალითად, თუ მცირეწლოვანი ბავშვები გყავთ და დამხმარე - არა, ესაუბრეთ თქვენს უფროსს მოქნილ სამუშაო გრაფიკთან დაკავშირებით, რათა შეძლოთ თანაბრად იყოთ ჩართული როგორც სამსახურეობრივ პროექტებში, ისე შვილების ცხოვრებაში.

დაბოლოს, ბალანსის დაცვა დაგეხმარებათ თავიდან აიცილოთ მუდმივი სტრესი, გადაღლა და გადაწვა, თანაბრად იყოთ ჩართული სოციალურ ცხოვრებაში და ასევე, შეგეძლოთ, რომ კარიერული მწვერვალები დაიპყროთ.