როგორ მოვითხოვოთ დაწინაურება სწორი კომუნიკაციით

სამსახურში დაწინაურება დასაქმებულისთვის ძალიან მნიშვნელოვანი წინგადადგმული  კარიერული ნაბიჯია. ეს არის თანამშრომლისთვის მოტივაციისა და თვითშეფასების ამაღლების ერთერთი საშუალება, განსაკუთრებით ისეთ შემთხვევაში, როდესაც დამსაქმებელი თავად აწინაურებს თანამშრომელს. თუმცა, რიგ შემთხვევებში, ადამიანები გრძნობენ, რომ ერთ პოზიციაზე იყინებიან, განვითარება და სიახლის სწავლა სჭირდებათ, საკუთარი თავი ამოწურეს მიმდინარე თანამდებობაზე და მზად არიან კარიერული კიბის შემდეგ საფეხურზე ასასვლელად, მენეჯერი კი მათ არ აწინაურებს. თანამშრომლის მხრიდან უშუალო მენეჯერისთვის ამ სურვილების გაზიარება სწორად და არგუმენტირებულად უნდა მოხდეს, რათა უფროსმა ზუსტად დაინახოს თავისი დასაქმებულის მიღწევები და ჰქონდეს ფაქტები და კონკრეტული შედეგები, რაზე დაყრდნობითაც მის მოთხოვნას დააკმაყოფილებს.

დაწინაურება კარიერული გზის ლოგიკური გაგრძელებაა იმ თანამშრომლებისთვის, ვინც წარმატებით და პასუხისმგებლიანად ასრულებს დაკისრებულ მოვალეობას და საქმეს. ამის მიუხედავად, ამ თემაზე სასაუბროდ ყურადღებით უნდა შეირჩეს სწორი ფორმა და დრო. როგორც წესი, დაწინაურებისთვის მზაობა ყველასთვის ინდივიდუალურია და არსებობს გარკვეული გარემოებები, რომელიც განსაზღვრავს ამ ყველაფერს. ესენია:

1.    გარკვეული დროის განმავლობაში ასრულებდით ერთსა და იმავე სამუშაოს და ახლა მეტი პასუხისმგებლობისთვის ხართ მზად

2.    თქვენი ახლანდელი პასუხისმგებლობები უფრო მნიშვნელოვანია, ვიდრე თქვენ მიერ დაკავებული პოზიცია

3.    უკვე მოახერხეთ თქვენი უნარების დემონსტრირება და კიდევ მეტად გაქვთ თავის გამოვლენის შესაძლებლობა

ჯანსაღი კომუნიკაცია ყოველთვის ყველაფრის გასაღებია. ამიტომ სწორად შერჩეული დრო დაგეხმარებათ, რომ თქვენი პოზიცია თავაზიანად და ამავდროულად, სტრუქტურირებულად დააფიქსიროთ თქვენს უფროსთან. პირველ რიგში, ეცადეთ, რომ საუბრისას იყოთ თავდაჯერებული და სათანადოდ მომზადებული.

მოიკვლიეთ ახალი პოზიცია

როდესაც გსურთ, ახალ პოზიციაზე გადახვიდეთ, აუცილებლად კარგად უნდა იცოდეთ მისი სამუშაო აღწერილობა და პასუხისმგებლობები. შესაძლოა მნიშვნელოვნად არ განსხვავდებოდეს თქვენი მიმდინარე პოზიციისგან და მცირედი სხვაობა იყოს, მაგრამ ეს განსხვავებებიც კარგად უნდა გააანალიზოთ, გაიაზროთ თუ რა არის ის საკვანძო პასუხისმგებლობები, რომლის გამოც ერთი პოზიცია მეორეზე მაღალია. ასევე გამოიკვლიეთ ის უნარები, რომლის დახვეწა ან გამომუშავებაც დაგჭირდებათ მომავალ პოზიციაზე. კვლევისთვის რამდენიმე მარტივი გზა არსებობს:

·        ესაუბრეთ მსგავს პოზიციაზე უკვე დასაქმებულ ადამიანს, რათა გაიგოთ როგორია მისი ყოველდღიური სამუშაო რუტინა;

·        მოძებნეთ რესურსები ინტერნეტში, როგორიცაა მაგალითად შემეცნებითი სტატიები, რაც დაგეხმარებათ მეტი ინფორმაცია მიიღოთ კონკრეტულ ინდუსტრიაზე, თქვენს სასურველ პოზიციაზე და მის ძირითად მოვალეობებზე;

·        წაიკითხეთ თქვენთვის სასურველი პოზიციის სამუშაო აღწერილობები სხვადასხვა კომპანიებიდან, რაც დაგეხმარებათ იმის დაიდენტიფიცირებაში, თუ რა არის საერთო საკვანძო მოვალეობები ყველა კომპანიაში და რამდენად შეიძლება ფართოვდებოდეს მისი პასუხისმგებლობების არეალი.

გამოხატეთ თქვენი პოზიცია არგუმენტირებულად

როდესაც თქვენს ხელმძღვანელთან საუბარს იწყებთ, აუცილებლად დაგჭირდებათ არგუმენტები, რომ ის დაარწმუნოთ თქვენი დაწინაურების დაინიცირებაში. დაასაბუთეთ რატომ იმსახურებთ დაწინაურებას, ამაში დაგეხმარებათ ბოლო პერიოდის (1 ან 2 კვარტლის, ან ბოლო 1 წლის) მიღწევების და შესრულებული ამოცანების დასახელება. აუცილებლად გაუსვით ხაზი, რომ თქვენ მიერ ამ დროის განმავლობაში გაწეულმა სამსახურმა პროფესიულად გაგზარდათ და მოგამზადათ უფრო მაღალი კარიერული საფეხურებისთვის, დაანახეთ მზადყოფნა მეტი პასუხისმგებლობების მიმართ. ოღონდ, რა თქმა უნდა, იყავით გულწრფელი. პირველ რიგში თავად უნდა გჯეროდეთ, რომ მზად ხართ დაწინაურებისთვის და ეს აქტი მხოლოდ უკეთეს პოზიციასა და უკეთეს ხელფასს არ ნიშნავს, მას მოჰყვება რიგი პასუხისმგებლობები და იმაზე მეტი საქმე, ვიდრე ახლა გაქვთ. შესაბამისად, ნამდვილად მზად უნდა იყოთ ამ ნაბიჯისთვის, განსაზღვრული გქონდეთ თქვენი შესაძლებლობები და ის არგუმენტები, რასაც თქვენს ხელმძღვანელობასთან თვითპრეზენტაციისთვის იყენებთ, რეალური უნდა იყოს. აღნიშნეთ, რამდენად ღირებული რესურსი ხართ კომპანიისთვის და ასევე, რამდენად მნიშვნელოვანია მისი წარმატება თქვენთვის. ეცადეთ, თავდაჯერებულად გაუკეთოთ დემონსტრირება იმ პოტენციურ მომავალს, რომელშიც თქვენს თავს ახალ პოზიციაზე ხედავთ და მკაფიოდ დაანახეთ თქვენს უფროსსაც, რომ შეგიძლიათ ადეკვატური და რაციონალური გეგმების დასახვა და მათი შესრულების ხელშესახებ გზებზეც უკვე გიფიქრიათ.

შეარჩიეთ სწორი დრო

დაწინაურებაზე საუბარი ყოველთვის მომგებიანი არ არის. ამისთვის სწორი დროის შერჩევა ისევე მნიშვნელოვანია, როგორც სწორი სიტყვათა კომბინაციის. თუკი კომპანიაში მძიმე პერიოდია, ხშირად გესმით თქვენი ხელმძღვანელობისგან, რომ პრობლემებს ვერ აუდის და ამჩნევთ, რომ ეს მის ხასიათზეც აისახება, ნამდვილად არ იქნება კარგი დრო დაწინაურებაზე სასაუბროდ. შეარჩიეთ ისეთი პერიოდი, როცა თუნდაც პირადად თქვენ ან თქვენი გუნდი წარმატებით დაასრულებთ მიმდინარე პროექტს, კომპანიას მოუტანთ მოგებას, ახალი მიღწევებით გამოიჩენთ თავს ან გექნებათ ნებისმიერი მიზეზი, რომლითაც ხელმძღვანელობის შექებას დაიმსახურებთ. ასეთ დროს, „ცხელ-ცხელი“ ფაქტები დაგეხმარებათ, რომ უფრო იოლად ისაუბროთ თქვენს სამუშაო წარმატებაზე, სიახლეებისადმი მზაობაზე და დამსახურებულ დაწინაურებაზე. სასაუბროდ შეარჩიეთ პირისპირ დიალოგი და არა ელ.ფოსტა, რადგან პირისპირ საუბარი ინტერაქციულია, ადვილად შეამჩნევთ თანამოსაუბრის ემოციებს, სხეულის ენას, გექნებათ საუბრისას ლავირების საშუალება და შეძლებთ საუბრის ტონის კონტროლს. წინასწარ განსაზღვრეთ რა დრო შეიძლება დაგჭირდეთ ამ შეხვედრისთვის და აუცილებლად შეუთანხმეთ შეხვედრა თქვენს ხელმძღვანელს. საუბარს უდნა ჰქონდეს მსუბუქი სახე და არავითარ შემთხვევაში არ უნდა იყოს დამძაბველი ან ულტიმატუმის სახით.

გარდა მოცემული რჩევებისა, აუცილებლად უნდა გაითვალისწინოთ, რომ ყველაზე მორგებული მზა რეცეპტი არ არსებობს ყველაფერი ინდივიდუალურად დამოკიდებულია კომპანიის შიდა კულტურაზე, პოზიციის სპეციფიკასა და თანამშრომლის მუშაობის ხარისხზე. სხვადასხვა პოზიციებზე დაწინაურების სხვადასხვა პერიოდულობა არსებობს, ასევე მნიშვნელოვანია, იცოდეთ როგორია ორგანიზაციის სტრუქტურა, რათა წარმოდგენა გქონდეთ რა პოზიციის შემდეგ რა პოზიციაა და ზოგადად, რა იერარქიით ვითარდება თქვენი მიმართულება. და ყველაზე მნიშვნელოვანი ისაა, რომ დაწინაურების შესახებ გქონდეთ კეთილსინდისიერი დამოკიდებულება და სანამ საუბარს გადაწყვეტთ, თავად იყოთ დარწმუნებული თქვენს შესაძლებლობებსა და უნარებში.