რა უნარებია საჭირო HR-სთვის?

ადამიანური რესურსების მართვის სამსახური კომპანიებში ასევე ცნობილია ადამიანური კაპიტალის მართვის დეპარტამენტის სახელით. კომპანიის სიდიდიდან გამომდინარე, ორგანიზაციას შესაძლოა ჰყავდეს ერთი HR, რომელიც ყველა მიმართულებას ჩაიბარებს; ჰქონდეს HR დეპარტამენტი, რომელსაც გაყოფილი ექნება სხვადასხვა მიმართულებები, რომელზეც მოგვიანებით ვისაუბრებთ, ან საერთოდ არ თვლიდეს საჭიროდ, რომ HR მენეჯერის საშტატო ერთეული მუდმივად სჭირდება და აღნიშნული მომსახურება აუთსორსზე ჰქონდეს გატანილი და საჭიროებისამებრ მიმართავდეს მომსახურების გამწევ კომპანიას/პირს.

რას აკეთებს HR?

მისი ფუნქცია-მოვალეობები ორგანიზაციაში მენეჯმენტსა და თანამშრომელს შორის მედიატორის როლით განისაზღვრება და ასევე, მოიცავს კომპანიაში პროცედურებისა და პროცესების დანერგვას, რომელიც თანამშრომლების რესურსს ეფექტურად გადაანაწილებს. ადამიანური რესურსების მენეჯერები ადამიანებისთვის გასაუბრების ეტაპიდან ხდებიან ცნობილი, თუმცა HR-ში მუშაობა მხოლოდ გასაუბრების პროცედურას არ მოიცავს და დღევანდელ სტატიაში მის სრულ როლსა და კარგი HR-სთვის საჭირო უნარებზე მოგიყვებით.

ხშირად უჩნდებათ კითხვა, გარდა გასაუბრების ჩატარებისა, რას აკეთებს კომპანიაში HR, მის საქმიანობაში რა შედის? კომპანიაში დასაქმებული ადამიანების კაპიტალისა და შრომითი რესურსების მართვა, სწორედ HR-ის ფუნქცია-მოვალეობების ნაწილია. თანამშრომლების მოტივაცია, მათი დოკუმენტაციის გამართვა და სისრულეში მოყვანა, კოლეგების მოტივაციაზე ზრუნვა და განვითარებისთვის საჭირო ტრენინგებისა თუ სხვადასხვა სამოტივაციო სისტემების შექმნა სწორედ HR-ის ფუნქციებში შედის.

 რა მიმართულებები აქვს HR-ს?

დეპარტამენტი ჩაშლილია სხვადასხვა მიმართულებებად, რომელსაც თავისი სამუშაო აქვს ჩაბარებული, ყველასთვის კარგად ნაცნობი ადამიანები, რომლებიც კანდიდატებთან რეკავენ ვაკანსიის თაობაზე და შემდეგ მათ გასაუბრებაზე ხვდებიან, შერჩევის მიმართულების თანამშრომლები - რეკრუტერები არიან. მათი საქმიანობა მხოლოდ გასაუბრების ჩატარებით არ შემოიფარგლება,  რეკრუტერები აქტიურად მონაწილეობენ დასაქმების ფორუმებში, ეძებენ შესაფერის კანდიდატებს თავიანთი ვაკანსიებისთვის სხვადასხვა არხის დახმარებით, ადგენენ ვაკანსიის ტექსტებს, რეზიუმეების გადარჩევის შემდეგ იბარებენ გასაუბრებაზე კანდიდატებს და უნიშნავენ გასაუბრების სხვადასხვა ეტაპებს შესარჩევი პოზიციის გათვალისწინებით. აყვანის შემდეგ ეხმარებიან თანამშრომელს ადაპტაციაში და ონბორდინგის პროცედურას უზრუნველყოფენ, რათა ახალი თანამშრომელი ახალ გარემოში მოკლე დროში ადაპტირდეს. ვინაიდან  შერჩევის სპეციალისტს ახალ ადამიანებთან უწევს შეხვედრა გასაუბრებების ეტაპზე, მისთვის მნიშვნელოვანია ისეთი უნარი, როგორიცაა სწრაფი ანალიზი. ხშირ შემთხვევაში HR სფეროში დასაქმებული ადამიანები განათლებით ფსიქოლოგები არიან, რაც შემთხვევითი სულაც არ არის, ეს განათლება მათ ეხმარებათ პიროვნების უკეთ შესწავლაში და შესაბამისად, მარტივად შეუძლიათ დაადგინონ ესა თუ ის ადამიანი შესაფერისი კანდიდატია თუ არა გამოცხადებული ვაკანსიისთვის.

ადმინისტრირების სპეციალისტის მოვალეობებში შედის უკვე აყვანილი თანამშრომლისთვის შრომითი ხელშეკრულების მომზადება, ხელშეკრულებაში შეტანილი ცვლილებების ასახვა და შესაბამისი დოკუმენტაციის მომზადება, თანამშრომლების შვებულებების ვადების კონტროლი, სამუშაო აღწერილობების მომზადება, კომპანიის შიდა პროცედურებისა და პროცესების შესახებ ინფორმაციის განახლება, შესაბამისი დოკუმენტების შექმნა და თანამშრომლებს შორის მისი გავრცელება. ასევე, ბიუჯეტირების ნაწილიც ხშირად ადამიანური კაპიტალის დეპარტამენტის ადმინისტრირების მიმართულებასთანაა მიბმული. ადმინისტრირების მიმართულება მჭიდრო კავშირშია იურიდიულ საკითხებთან, კომპანიის პროცედურების კანონთან შესაბამისობაში ზრუნვასთან. კანონებში ხშირად შედის ცვლილებები, რომლის საქმის კურსშიც ყოველთვის დროულად უნდა იყოს HR, შესაბამისად კი თანამშრომლების ინფორმირება და საჭიროების შემთხვევაში დოკუმენტების განახლების უზრუნველყოფა მოახდინოს. შესაბამისად ამ მიმართულებით დასაქმებული ადამიანი უნდა იყოს დეტალებზე ორიენტირებული, სიახლეების მიმართ ადაპტური, ახალი ცოდნის მიღებისა და ათვისების და სწრაფი ანალიზის უნარის მქონე ადამიანი, რომელსაც შეუძლია რამდენიმე ამოცანის ერთდროულად შესრულება. ამავე მიმართულებაში დასაქმებული HR-ები არიან თანამშრომლებთან კომუნიკაციის პირველადი წყაროები სამუშაოსთან დაკავშირებულ შეკითხვებზე პასუხების მისაღებად. აქედან გამომდინარე, ძალიან მნიშვნელოვანია მათ დაცული ჰქონდეთ სუბორდინაცია, იყვნენ თავაზიანები და კოლეგიალურები.

გარდა ამ ორი საკვანძო მიმართულებისა, HR-ში საკმაოდ მნიშვნელოვანი ნაწილია თანამშრომლების განვითარებაზე ზრუნვის მიმართულება, სადაც ხდება თანამშრომლებისთვის საჭირო ტრენინგების განსაზღვრა, მათი დაგეგმვა და ჩატარების უზრუნველყოფა.

ასევე, აღსანიშნავია, რომ კომპანიის სტრუქტურიდან გამომდინარე ადამიანური კაპიტალის დეპარტამენტში შესაძლოა მუშაობდნენ ჯენერალისტები, სპეციალისტები, სხვადასხვა რანგის თანამშრომლები. მათი საქმიანობა შესაძლოა შესაბამისად გადანაწილებული იყოს მიმართულების მიხედვით, ან შეთავსებული ჰქონდეთ ყველა მიმართულებიდან გარკვეული დოზით საქმიანობები. აქედან გამომდინარე, მათთვის საჭირო ყველაზე მთავარი უნარები დეტალების მიმართ ყურადღების გამომჟღავნება, ყურადღებიანობა და სხარტი აზროვნებაა.