რომელი ნიშნები გვიჩვენებენ, რომ დროა სამსახური შევიცვალოთ

სამსახურის ცვლილების მოტივი მხოლოდ კარიერული განვითარებისა და მრავალფეროვანი გამოცდილების სურვილიდან არ მომდინარეობს. ჩვენს ადრეულ ბლოგებში ვწერდით პროფესიულ გადაწვასა და პირადი ცხოვრებისა და სამსახურის ბალანსზე, სწორედ ამ ყველაფრის გათვალისწინებით, რიგ შემთხვევებში სამსახურის ცვლილება ადამიანის მენტალური ჯანმრთელობისთვისაც კია სასარგებლო, საჭირო და აუცილებელი. ზოგადად, ნებისმიერი გარემოს ცვლილება რეკომენდირებულია, თუკი რაღაც პერიოდში ეს გარემო ტოქსიკური ხდება.  ამის ამოცნობა კი რამდენიმე ნიშნითაა შესაძლებელი. თუკი თქვენს განწყობასა და სხეულს მოუსმენთ, აუცილებლად შეამჩნევთ კონკრეტულ ნიშნებს, თუკი ცვლილების დროა. ხოლო თუ ამ ნიშნებიდან არცერთი არ გეცნობათ, მაშინ გილოცავთ, რადგან სწორ ადგილას ხართ.

ხშირად ხართ დაღლილი და დასტრესილი

თუ გრძნობთ, რომ ბოლო დროს ადვილად ღიზიანდებით, მალე გწყინდებათ რამის კეთება, მარტივად იღლებით და სტრესი და შფოთვა თქვენი ყოველდღიურობის ნაწილი გახდა, ეს ერთერთი იმ ნიშანთაგანია, რომელიც სამუშაო გარემოს შეცვლისკენ გიბიძგებთ. სამუშაო დღეები ისე მიჰყვება ერთმანეთს, რომ დასვენების საათები და დასვენების დღეები არ გყოფნით და ორშაბათ დილით უკვე დაღლილი ბრუნდებით სამუშაო ადგილზე, ეს უკვე წინასწარგანწყობის ნაწილია და თქვენი სხეული და გონება სამუშაოს სტრესფაქტორად აღიქვამს. შესაძლოა ასეთ დროს ფსიქოსომატურმა ნიშნებმაც კი იჩინოს თავი, სამუშაო გარემოსთვის თავის არიდების სურვილი მუდმივ სტრესად გადაიქცევა, სტრესი კი იმუნიტეტის დაქვეითების წინაპირობაც არის და აბსოლუტურად შესაძლებელია ხშირად იავადმყოფოთ ან შედარებით სერიოზულ ჯანმრთელობის პრობლემებამდეც კი მიხვიდეთ. ამიტომ მოუსმინეთ თქვენს სხეულს და მისგან წამოსული სიგნალები არ დააიგნოროთ.

აღარ გჯერათ კომპანიის ღირებულებების

თუ თავდაპირველად მუშაობის დაწყებისას გეჩვენებოდათ, რომ თქვენი სამსახური შესაძლებლობებით სავსე იყო, საკუთარ თავს აიდენტიფიცირებდით კომპანიასთან, იზიარებდით მის ღირებულებებს და მისი ორგანიზაციული კულტურის მატარებელი იყავით, ახლა კი აღარ გაქვთ ლოიალური დამოკიდებულება, ემპათია, აღარ გჯერათ კომპანიის მიერ გამოთმული დაპირებების, ესეც ერთერთი ნიშანია იმისა, რომ ორგანიზაციის ნაწილად თავს ვეღარ გრძნობთ. საერთო ღირებულებები ძალიან მნიშვნელოვანი მოტივატორია, იმ შემთხვევაში კი, თუ თქვენი და თქვენი დამსაქმებლის ღირებულებები და ხედვები დიდწილად აცდენაშია ერთმანეთთან და ნაკლებად ოპტიმისტურად უყურებთ კომპანიის სამომავლო გეგმებს, დროა გარემოს შეცვლასა და თქვენს ხედვებთან უფრო ახლოს მდგომ კომპანიაზე დაფიქრდეთ.

დაგვიანებისა და ადრე წასვლის სურვილი გაქვთ

ცხოვრებაში ყველას გვქონია  მომენტი, როცა მაღვიძარას ვთიშავთ და ვოცნებობთ, რომ კიდევ გვქონდეს დამატებითი დრო დილის ძილისთვის და სამსახურისთვის ადრე ასადგომი არ ვიყოთ. თუმცა თუკი ყოველდღიური ხასიათი აქვს დილით დაგვიანების სურვილს, ეს კი მხოლოდ ძილის სიყვარულს არ უკავშირდება, ესეც ერთერთი სიგნალია, რომ სამსახურში მისვლა აღარ აღგაფრთოვანებთ და იქ ყოფნა ვერაფერ ღირებულს ვერ გაძლევთ. საღამოს კი სულ საათზე იყურებით, ერთი სული გაქვთ, კომპიუტერი გათიშოთ, ოფისი დატოვოთ და სახლში მალე წახვიდეთ.

თავს უხილავად გრძნობთ და მოტივატორები თქვენზე აღარ მოქმედებს

თუკი გაზრდილი ხელფასიც კი არ გგვრით კმაყოფილების შეგრძნებას, მუდმივად თვლით, რომ იმაზე მეტს იმსახურებთ ვიდრე იღებთ - მატერიალურადაც და არამატერიალურადაც, ფიქრობთ, რომ ყველაფერს აკეთებთ მაგრამ თქვენი შრომა და თქვენი აზრი უხილავია, ასეთი გარემო მართლაც ტოქსიკურად იმოქმედებს თქვენს თვითშეფასებასა და შრომისუნარიანობაზე. მართალია ასეთ დროს სუბიექტური აღქმები უნდა გამოვრიცხოთ, მაგრამ შეგრძნებების დონეზე მნიშვნელოვანია, რას გრძნობთ სამუშაო ადგილზე. ერთერთი მთავარი ფაქტორი გუნდში და ორგანიზაციაში ჯანსაღი გარემოს და თანამშრომელთა მოტივაციის შენარჩუნებისთვის სწორედ კოლაბორაცია, გუნდურობა, მეგობრული დამოკიდებულებების ჩამოყალიბება და ყველა კონტრიბუტორის თანაბრად დაფასებაა.

სამსახურებრივი გარემო ზიანს აყენებს თქვენს პირად ცხოვრებას

დაბოლოს, ერთერთი მთავარი ფაქტორი, რაც ნიშანია, რომ სამუშაო გარემო შეიცვალოთ ისაა, რომ სამსახურებრივი სტრესი, ორგანიზაციაში მიმდინარე მოვლენები, რუტინა თუ ნებისმიერი რამ, რაც თქვენს გაღიზიანებას და უკმაყოფილებას იწვევს, რეალიზაციას თვენს პირად ცხოვრებაში ჰპოვებს და ასე ვთქვატ ჯავრს ოჯახის წევრებზე იყრით. სამსახურში დაგროვილი ნეგატიური ენერგიის გავრცელება და გადმოფრქვევა იმ ადამიანებზე, რომლებიც არაფერშუაში არიან, დააუშვებელია. თუკი ამჩნევთ, რომ უხეში გახდით თქვენი ოჯახისა და გარშემომყოფების მიმართ, გაღიზიანებთ მათი რჩევები ან გიჭირთ მათი მოსმენა რადგან მუდმივად სამსახურზე ფიქრობთ და ეს განწყობა მოგყვებათ ყველგან, დროა მოძებნოთ ახალი და ჯანსაღი გარემო, რომელიც პროფესიულადაც დაგაკმაყოფილებთ და სწორი სოციალიზაციის წყაროც იქნება.

დაბოლოს, თუ ჩამოთვლილი ნიშნებიდან ყველა თუ არა ნაწილი მაინც გეცნოთ და ამჩნევთ, როგორ იცვლება თქვენი დამოკიდებულებები სამსახურის მიმართ და უარესდება პროდუქტიულობა, დროა დაიწყოთ ზრუნვა სამსახურის ცვლილებაზე, ამაში კი ss.ge-ს მრავალფეროვანი ვაკანსიები დაგეხმარებათ.