რა უნდა გავითვალისწინოთ, როცა სტარტაპთან ვთანამშრომლობთ?

ახალი საქმიანობის წამოწყება გარდა იმისა, რომ დაკავშირებულია სასიამოვნო ვნებათაღელვასთან და სიახლეების მოლოდინთან, ამავდროულად უკავშირდება გარკვეულ რისკებსაც. ბოლო პერიოდში ბიზნესის წამოწყება ბაზარზე სტარტაპის წამოწყებით ჩანაცვლდა. ახალი იდეების გენერირებას, მათ განხორციელებას და დაფინანსებას კი შედარებით მყარი ბიზნესები ახალისებენ და სხვადასხვა კამპანიის ფარგლებში აფინასნებენ. სტარტაპთან თანამშრომლობისას გარდა დიდი გამოცდილების მიღებისა, აუცილებლად ის რისკებიც უნდა გაითვალისწინოთ, რომელიც მის არსებობას თან ახლავს.

1)    შეცდომების არ შეგეშინდეთ

ვინაიდან ახალბედა ბიზნესთან იწყებთ თანამშრომლობას,რომელსაც დაგროვილი გამოცდილება არ აქვს, მზად იყავით შეცდომებისთვის და მათი დახმარებით სწავლისთვის. გარდაუვალია პირველი ნაბიჯების უშეცდომოდ გადადგმა, თუმცა ამან თქვენში დემოტივაცია არ უნდა გამოიწვიოს, პირიქით, მიიღეთ ეს, როგორც გაკვეთილი და წინსვლა განაგრძეთ. პატარა შეცდომების დახმარებით შეძლებთ, რომ სამომავლოდ უფრო  დიდი რისკები და დანაკარგები აიცილოთ თავიდან. სტარტაპთან ერთად თქვენც დიდი ალბათობით, თქვენც დამწყები ხართ და მასთან ერთად იზრდებით. ხოლო იმ შემთხვევაში, თუ გამოცდილი ხართ, თქვენი ცოდნისა და გამოცდილების რესურსი შეცდომების არიდებასა და სწორი ნაბიჯების გადადგმაში მოახმარეთ სტარტაპს.

2)    ყველაფერი დაგეგმეთ

სტატისტიკა გვიჩვენებს, რომ სტარტაპების უმრავლესობა დასაწყისში არ ატარებს ბაზრის კვლევას იმ ხარისხით, რომ სამომავლოდ თავისი არსებობა შეინარჩუნოს და მისი საჭიროება მუდმივად იდგეს. ამისთვის არსებითია, რომ სტარტაპის შექმნამდე, მისმა დამფუძნებელმა სიღრმისეულად გამოიკვლიოს იდეის განხორციელების საჭიროება, ჩაატაროს პოტენციურ მომხმარებლებთან ინტერვიუები, გაიგოს რა სურთ, რა მოლოდინები აქვთ და სწორედ ამის შემდეგ შექმნას პროდუქტი. თქვენ კი, როგორც ამ სტარტაპთან დაკავშირებულმა პირმა, თანამშრომლობამდე მცირე კვლევა ჩაატაროთ მსგავს საკითხებზე და აწონდაწონოთ თქვენი გადაწყვეტილება, რამდენად აღემატება მიღებული გამოცდილება შესაძლო დანაკარგს. დაგეგმეთ თქვენი როლი სტარტაპთან თანამშრომლობაში და დასახეთ რას მისცემს თქვენი ადამიანური რესურსი სტარტაოს და რას მიიღებთ თქვენ, როგორც თანამშრომელი.

3)    განსაზღვრეთ ფინანსები

სტარტაპის წამოწყება სხვადასხვა თანხით არის შესაძლებელი, გააჩნია მის მასშტაბებს, ასევე ზოგჯერ სტარტაპერი მთლიანად თავის ფინანსურ რესურსს დებს იდეის რეალობად ქცევაში, ზოგჯერ თანადაფინანსებით ეხმარებიან ესა თუ ის ფონდები, ზოგჯერ კი სრული დაფინანსებისთვის იბრძვიან სტარტაპების კონკურსში და ბოლოს მოიპოვებენ სრულ დაფინანსებას. მას შემდეგ, რაც „თანხა ხელში გიჭირავთ“, ძალიან ფრთხილად უნდა განსაზღვროთ და გათვალოთ თითოეული თეთრი. ხშირად სტარტაპები სწორედ იმიტომ წყვეტს არსებობას, რომ თანხა აღარ აქვთ. ამიტომ ბიუჯეტის დაგეგმვა და ფინანსების მართვა საკმაოდ მნიშვნელოვანი კომპონენტია და თუ სტარტაპთან თანამშრომლობას ფინანსური მენეჯერის ან ბიუჯეტირების სპეციალისტის რანგში აპირებთ, გირჩევდით ამ ლაბირინთებში გარკვევას.  ამაში ss.ge-ს ფინანსური აღრიცხვის ტრენინგ-კურსებიც დაგეხმარებათ.ფინანსური ცოდნა გამოგადგებათ საგადასახადო სისტემაში გზის გაკვლევაშიც. ასევე გასათვალისწინებელია, რომ სტარტაპების მცირე ბიუჯეტიდან გამომდინარე, ფინანსური სტაბილურობის გეგმებს ნუ დაისახავთ წინასწარ.

4)    კარგად გაიცანით გუნდის წევრები

სხვა ყველა კომპონენტთან ერთად, არანაკლებ მნიშვნელოვანია კარგი გუნდის ყოლა. ახალი იდეების გენერირება და შემდგომი ნაბიჯების დაგეგმვა უფრო იოლია თუ ერთზე მეტი ტვინი მუშაობს და გონებრივი იერიშების (Brainstorming) დროს შესაძლოა ბევრ ისეთ იდეას მიაკვლიოთ, რაც თქვენს სტარტაპს ნამდვილად წინ წასწევს. გარდა ჭკვიან ადამიანებთან თანამშრომლობისა, ასევე დარწმუნებული უნდა იყოთ მათ კეთილსინდისიერებაშიც და გუნდის ყველა წევრს კარგად უნდა გესმოდეთ საერთო მიზნები და ღირებულებები, კომუნიკაციისას არ უნდა გექმნებოდეთ ბარიერები და ერთმანეთთან უნდა შეგეძლოთ ყველანაირი აზრის გაზიარება. გაითვალისწინეთ, რომ გუნდის წევრთა უმეტესობა შესაძლოა ახალბედა იყოს, კარგად გაიცანით ისინი, აღმოაჩინეთ ერთმანეთში ძლიერი მხარეები და თანამშრომლობისას შესაბამისად გადაინაწილეთ საქმე.

5)    მზად იყავით მარცხისთვის

დაბოლოს, ყოველთვის, როცა სტარტაპთან თანამშრომლობას იწყებთ, მიუხედავად პოზიტიური აზროვნებისა, გონების კუთხეში ყოველთვის გქონდეთ იმის დაშვება, რომ ყველა სტარტაპს აქვს თავისი რისკები და შესაძლოა ყველაფერი გეგმის მიხედვით არ წავიდეს, ამიტომ შესაძლო მარცხს შეხვდით მომზადებული და მიუდექით რაციონალურად. ყოველთვის გახსოვდეთ, რომ მარცხი განაჩენი არ არის და ის გამოცდილებად მიიღეთ. მისი დადებითი და უარყოფითი მხარეები გამოიყენეთ შემდგომი დასაქმებისას დაგროვილ ცოდნად. სტარტაპთან თანამშრომლობის ერთერთი დადებითი მხარე სწორედ ისაა, რომ შეზღუდულ ბიუჯეტში და საწყის ეტაპზე ბევრ სირთულეებთან გიწევთ გამკლავება, რაც უამრავ გამოცდილებას გაძლევთ და სხვაგან დასაქმებისას ყველაფრისთვის გაქვთ გამომუშავებული მდგრადობა. უარყოფით მხარეებს შორის კი ალბათ, ყველაზე მეტად გულდასაწყვეტი შესაძლოა სტარტაპის მალე „გაქრობა“ იყოს ბაზრიდან. ასეთ შემთხვევაში შესაძლოა გამოცდილების დაგროვება და სახელის მოხვეჭაც ვერ მოესწროს.