საქართველო იმ ქვეყნების ათეულშია, სადაც ბინადრობის ნებართვის მისაღებად ქონების შეძენაზე რუსები ყველაზე ხშირად ფიქრობენ - Tranio

769

13.06.2023 14:12:32

საქართველოში რუსების მიერ ბინადრობის ნებართვის ასაღებად სასოფლო-სამეურნეო მიწის გარდა, ქვეყანაში ნებისმიერი უძრავი ქონების შეძენა არის შესაძლებელი. ამის შესახებ რუსული კომპანია Tranio-ს აღმასრულებელი დირექტორი და პარტნიორი, მიხაილ ბულანოვი აცხადებს, რასაც სააგენტო RBC ავრცელებს.

მისი თქმით, საქართველოში შესაძენი უძრავი ქონების მინიმალური თანხა 100 ათას დოლარს უნდა შეადგენდეს, ხოლო ბინადრობის ნებართვის მიღების ვადა ერთი თვეა. ამასთან, ბინადრობის ნებართვა ერთი წლით გაიცემა, ხოლო ქვეყანაში 10 წლის განმავლობაში მუდმივი ცხოვრებისა და უძრავი ქონების ფლობის შემდეგ, რუსებს შეუძლიათ, უვადო ბინადრობის ნებართვა მიიღონ.

Tranio-ს აღმასრულებელი დირექტორი თანამემამულეებისთვის, ასევე განმარტავს, რომ უძრავ ქონებაში 300 000 დოლარზე მეტი ოდენობის ინვესტიციის შემთხვევაში, საქართველოში ხუთწლიანი ბინადრობის ნებართვა დაუყოვნებლივ გაიცემა, ხოლო ვადის გასვლის შემდეგ რუსეთის მოქალაქეებს შეუძლიათ, უვადო რეზიდენტის სტატუსი გაიფორმონ.

Tranio-ს სტატისტიკის მიხედვით, საქართველო იმ ქვეყნების ათეულშია, რომლებშიც ბინადრობის ნებართვის ან პასპორტის მისაღებად ქონების შეძენაზე რუსები ყველაზე ხშირად ფიქრობენ.

განაგრძეთ კითხვა