როგორ შევაფასოთ კომპანიის კულტურა სანამ იქ მუშაობას დავიწყებთ?

ალბათ, ხშირად გსმენიათ, ან თავადაც გამოგიცდიათ, რომ კომპანიის ლამაზად შეფუთული მარკეტინგის წყალობით, ადამიანებს მცდარი წარმოდგენა ექმნებათ კომპანიაზე და მხოლოდ უშუალოდ იქ მუშაობის შემდეგ აღმოაჩენენ ხოლმე, რომ შიდა კორპორატიული კულტურა სულაც არ არის ისეთი, როგორიც გარედან ჩანს. დიდ და ცნობილ კომპანიებშიც კი დგება ეს პრობლემა არც თუ ისე იშვიათად. მიმზიდველი რეკლამებისა და გასაუბრებაზე დასახული უკონკურენტო და არაჩვეულებრივი სამუშაო პირობების შეთავაზების შემდეგ, ძალიან რთულია, რომ რეალობა თქვენი მოლოდინებისგან სრულიად აცდენილი დაგხვდეთ. ეს თქვენს მოტივაციაზე ძალიან უარყოფითად აისახება და მეტიც, უნდობლობას გაგიჩენთ სხვა პოტენციური დამსაქმებლების მიმართ.

იმისთვის, რომ კომპანიის კულტურა შეაფასოთ იქ მუშაობის დაწყებამდე, რამდენიმე ხერხი შეგიძლიათ გამოიყენოთ. ბუნებრივია, რომ გასაუბრებაზე წასვლამდე, კომპანიის შესახებ ინფორმაცია უნდა მოიძიოთ, რათა იცოდეთ, ზოგადად რა სფეროებს ფარავს ესა თუ ის ორგანიზაცია, რა არის მათი მისია და მიზანი, რამდენი ხანია რაც ბაზარზე ოპერირებენ, რამდენად სანდოები და სტაბილურები არიან თუნდაც ფინანსურად და ა.შ. დამსაქმებლის შერჩევისას, რასაკვირველია ამ ინფორმაციის მოძიებით გასაუბრებაზე თავადაც უკეთ წარმოაჩენთ თავს, მაგრამ გარდა ამისა, ძალიან მნიშნელოვანია, რომ გაიგოთ როგორი სახელი აქვს კომპანიას არამხოლოდ მის კლიენტებთან, არამედ - თანამშრომლებთანაც. ეს ორი სრულიად განსხვავებული შეიძლება იყოს ერთმანეთისგან. ზოგჯერ, კლიენტებთან საუკეთესო მომსახურების გაწევა თანამშრომლებს პირად უსიამოვნებებსა და სტრესის მაღალ მაჩვენებლებთან არის დაკავშირებული. როგორ ექცევა კომპანია კლიენტებს სრულიად სხვა საკითხია, რადგან კლიენტებთან ურთიერთობა სწორედ ის ლამაზად შეფუთული ნაწილია, რითაც ხალხს წარმოდგენას უქმნის საკუთარ თავზე. რაც შეეხება თანამშრომლებთან ურთიერთობების ფორმას და კორპორატიულ კულტურას, ეს ე.წ. შიდა სამზარეულოა და ამ ინფორმაციას უშუალოდ იქ მიმდინარედ თუ ყოფილი დასაქმებულებისგან გაიგებთ.

გასაუბრებაზე მისვლამდე, ეცადეთ დაეკონტაქტოთ იმ ადამიანებს, ვინც სხვადასხვა პერიოდში მუშაობდა ამ კომპანიაში და გაეცნოთ მათ გამოცდილებებს. ამ ადამიანების მოძებნა და მათთან დაკავშირება დღესდღეობით ძალიან მარტივი პროცესია, არსებობს უამრავი დახურული ჯგუფი სოციალურ ქსელებში, სადაც სამსახურის მაძიებლები და კარიერული განვითარების მსურველები ერთმანეთს საჭირო და შესაფერის ინფორმაციებსა და გამოცდილებებს უზიარებენ, ერთი მარტივი პოსტის დახმარებით შესაძლოა, თქვენი მოლოდინები უფრო მეტად გამოიკვეთოს და კონკრეტულ პასუხებამდე მიხვიდეთ. ყველა კომპანიაში აქვთ ადამიანებს კარგი და ცუდი გამოცდილება, საბოლოოდ მაინც ინდივიდუალური ღირებულებების დონემდე მიდის ყველაფერი და თუკი პიროვნებისა და კომპანიის ღირებულებები მკვეთრად აცდენილია ერთმანეთთან, მათ შორის ხარისხიანი და პროდუქტიული თანამშრომლობა ვერ დგება როგორც არ უნდა ეცადოს ორივე მხარე. შესაბამისად, როდესაც მოსმენთ სხვა ადამიანების გამოცდილებას, გააანალიზეთ, ამ ყველაფრის საფუძველი რა იყო, ჰქონდათ თუ არა ერთნაირი ღირებულებები კომპანიასა და თანამშრომელს, რომელი მათგანის ღირებულებები ემთხვევა თქვენსას უფრო მეტად და ამა თუ იმ პრობლემას იმ ადამიანის მსგავსად მიუდგებოდით თუ განსხვავებული გზით. რასაკვირველია, ყველა ადამიანის გზა განსხვავდება ერთმანეთისგან და ადამიანები უნიკალურები სწორედ ამით ვართ, ყველას ჩვენი მეთოდი გვაქვს პრობლემებთან თუ გამოწვევებთან გამკლავების.

გარდა ყოფილი ან/და მიმდინარე თანამშრომლების გამოცდილების გაზიარებისა, უშუალოდ გასაუბრებაზე დასვით კითხვები კომპანიის მისიაზე, მიზანზე, ღირებულებებსა და კორპორატიულ კულტურაზე. გახსოვდეთ, რომ სამსახურის გასაუბრება არ არის ცალმხრივი პროცესი და როგორც ორგანიზაცია ეძებს მისთვის სასურველ თანამშრომელს, ისე კანდიდატისთვისაა მნიშვნელოვანი, რომ ასევე მისთვის სასურველ ჯანსაღ გარემოში მოხვდეს, დამსაქმებლის პასუხიდან გამომდინარე ჰკითხეთ შესაბამისი მაგალითები, რაც შეძლებს მათი პასუხის გამყარებას და მეტად დამაჯერებელი იქნება. ასევე, შეგიძლიათ გაუზიაროთ კორპორატიული კულტურის თქვენთვის სასურველი შემადგენელი დეტალები და დააზუსტოთ თქვენი და მათი ხედვები ერთმანეთს ემთხვევა თუ არა, რამდენად თავისუფალი გარემოა, მიკრომენეჯმენტს ამჯობინებენ თუ თანამშრომელთა ავტონომიას, რა არის მათთვის წამყვანი მიმართულებები, რაში ურჩევნიათ მეტი რესურსის ჩადება, როგორი წახალისების ფორმები არსებობს და რამდენად ხშირად/რა პერიოდულობით იყენებენ და ა.შ.

გახსოვდეთ, რომ ორგანიზაციაში მუშაობა მხოლოდ კომპანიაში სიარულზე და თვის ჭრილში გამომუშავებულ ანაზღაურებაზე ბევრად მეტია. იყო დასაქმებული ამა თუ იმ კომპანიაში, ნიშნავს, რომ იზიარებდე ამ კონკრეტულის ღირებულებებს და კოლეგებთან ერთად საერთო მიზნისკენ ისწრაფვოდე, გქონდეს ურთიერთობა მრავალფეროვან ადამიანებთან, რომლებთანაც სწორედ კომპანიის კულტურა გაერთიანებს.