როგორ მოვძებნოთ სამუშაო საზღვარგარეთ: ახალ ქვეყანაში გადასვლისა და ადაპტაციის მნიშვნელოვანი ასპექტები

სამუშაოს საზღვარგარეთ მაძიებელთა რიცხვი მნიშნელოვნად გაიზარდა განსაკუთრებით კოვიდ პანდემიის შემდეგ. ეს არამხოლოდ საქართველოსთვის არის აქტუალური საკითხი, არამედ თითქმის ყველა განვითარებადი ქვეყნის პრობლემას წარმოადგენს, ვისაც განსაკუთრებით შეეხო ეკონომუკირი კრიზისი, ეროვნული ვალუტის ინფლაცია და თანმდევი პრობლემები. ბევრი ქვეყნიდან შეინიშნება ახალგაზრდა სამუშაო ძალის გადინება სამშობლოდან და განვითარებულ ქვეყნებში შედინება. ევროპის ქვეყნებთან შედარებით, აშშ-მ ბოლო პერიოდში გაამკაცრა სავიზო პროცედურები, თუმცა ადამიანთა ნაწილს ეს საკითხი ვერ აჩერებს და არალეგალური გზებითაც კი ცდილობენ სასურველ ქვეყნებში შეღწევას. რა თქმა უნდა, ეს უკანასკნელი ბევრ ხიფათთან და დიდ რისკებთან, მათ შორის სიცოცხლისა და უსაფრთხოების სასწორზე დადებასთან არის დაკავშირებული.

სამუშაოდ საზღვარგარეთ წასვლა ძალიან გააზრებული ნაბიჯი უნდა იყოს, რათა ადამიანს მზაობა ჰქონდეს უცხო ქვეყანაში მოხვედრის თანმდევ პროცესებზე. გარდა იმისა, რომ სამუშაო ადგილის ძებნა და პოვნა ბევრ სირთულესა და რესურსების ხარჯვას უკავშირდება, არანაკლებ მნიშვნელოვანია, რომ ქვეყანაში ადაპტაციის ასპექტებიც გაითვალისწინოთ.

მოიკვლიეთ დიასპორა

ვიდრე კონკრეტულ ქვეყანაში გადასვლას დააპირებთ, მოიკვლიეთ რამდენად ბევრი ქართველი ცხოვრობს იქ, რა არის მათი დასაქმების ძირითადი სფერო, რამდენი ხანია, რაც იმ ქვეყანაში ცხოვრობენ, მარტივად იპოვეს თუ არა სამსახური, რა სირთულეებს წააწყდნენ, აქვთ თუ არა იმდენი შემოსავალი, რომ შეძლონ აღნიშნულ ქვეყანაში თავის გატანაც და საქართველოში დარჩენილი ოჯახის წევრების ფინანსური დახმარებაც.

აწონ-დაწონეთ, რისთვის მიდიხართ

ოჯახის წევრების დახმარება ვახსენეთ და წასვლამდე დაფიქრდით რისთვის მიდიხართ: მხოლოდ თქვენი ინტერესებისა და ახალი გამოცდილებებისთვის თუ ოჯახის წევრების ფინანსური დახმარებისთვის. ეს ორი სრულიად განსხვავებული შემთხვევაა, პირველ შემთხვევაში პასუხისმგებლობა მხოლოდ საკუთარ თავზე გაქვთ აღებული და თქვენი შემოსავალი თქვენით შეგიძლიათ გაწეროთ - რას რაში დახარჯავთ და როგორ იმყოფინებთ. მეორე შემთხვევაში კი ბევრად მეტია პასუხისმგებლობა, რადგან არამხოლოდ საკუთარ თავზე, არამედ სხვა ადამიანებზე ზრუნვაც აიღეთ საკუთარ პასუხისმგებლობად და შესაბამისად, შედარებით მაღალანაზღაურებადი და სტაბილური სამსახური გჭირდებათ.

ენა და კულტურა

წასასვლელი ქვეყნის არჩევამდე, აუცილებლად წინასწარ შეისწავლეთ იმ ქვეყნის კულტურული თავისებურებები, კულტურული შოკი ახალ ქვეყანაში ჩასვლისას სრულიად ნორმალური ამბავია, მაგრამ თუკი ამა თუ იმ ქვეყანაში მიღებული სხვადასხვა ადათ-წესები თქვენს ღირებულებებს მკვეთრად არის აცდენილი, გრჩებათ ის არჩევანი რომ ან შეეგუოთ და დისკომფორტი განიცადოთ, ან ქვეყნის მიმართ აგრესია გაგიჩნდეთ და დატოვოთ ის. არის მესამე გზაც - თუკი განსხვავებულის მიმღებლობა მაღალ დონეზე გაქვთ, შეეწყოთ იქ ცხოვრების წესებს. ამიტომ მნიშვნელოვანია, რომ წინასწარ გაეცნოთ კულტურას, მათ ტრადიციებს, რელიგიას და ა.შ. ასევე, მნიშვნელოვანი ასპექტია ენა - კომუნიკაციის მთავარი იარაღი. ამა თუ იმ ქვეყანაში წასვლამდე ისწავლეთ მინიმუმ სასაუბრო ფრაზები, გაიგეთ რომელ უცხო ენაზე საუბრობენ ადგილობრივები გარდა მშობლიური ენისა.

ბუნებრივი თავისებურებები

სამუშაოს სპეციფიკების გარდა, ძალიან მნიშვნელოვანი ასპექტია კლიმატიც. წასვლამდე გამოიკვლიეთ როგორი კლიმატია ქვეყანაში, მაგალითად ჩრდილოეთის ქვეყნების გრძელი ზამთრისთვის რამდენად მზად ხართ, თუ ისეთი პიროვნება ხართ, ვისაც ზაფხულის მზიანი და გრძელი დღეები უყვარს? ან პირიქით, ცხელ ქვეყანაში სამუშაოდ წასვლა თქვენს პროდუქტიულობაზე უარყოფითად ხომ არ აისახება, თუკი ზამთრისა და თოვლიანი კურორტების მოყვარული ადამიანი ხართ?

რისთვის ხართ მზად?

ადაპტაციისათვის კიდევ ერთი მნიშვნელოვანი საკითხია, რომ ობიექტურად და რაციონალურად გადაიაზროთ, რისთვის ხართ მზად - ფიზიკური სამუშაოსთვის თუ გონებრივისთვის? მოიკვლიეთ პროფესიები, რომლებიც ამა თუ იმ ქვეყანაში უფრო აქტუალური და მოთხოვნადია. წინასწარ განსაზღვრეთ რომელ ინდუსტრიაში ჩადებთ თქვენს რესურსებს. თუკი უკვე ნამყოფი ხართ რომელიმე ქვეყანაში და იქაური მეგობრებიც გყავთ, მაშინ ეცადეთ მათთან გაიკითხოთ თქვენთვის შესაფერისი სამუშაოს შესახებ ინფორმაცია, თვალი ადევნოთ იქაური კომპანიების ვაკანსიებს და იქნებ სამუშაო ვიზასაც გამოჰკრათ ხელი.

თუკი გსურთ, რომ მოძებნოთ ვაკანსიები საზღვარგარეთ, თვალი ადევნეთ ss.ge-ს დასაქმების კატეგორიაში არსებულ საზღვარგარეთ დასაქმების ბლოკს.