პრაქტიკული რჩევები დისტანციური მუშაობისას

2446

03.04.2020 13:55:58

კორონავირუსის პანდემიის გამო, სამსახურის სახლში გადანაცვლებამ, დასაქმებულები არაერთი გამოწვევის წინაშე დააყენა. ზოგს დროის გადანაწილება გაუჭირდა, ზოგს საქმეზე ფოკუსირება, ზოგიერთს კი საკომუნიკაციო პროგრამებში დასჭირდა წავარჯიშება. ახალი სამუშაო წესრიგი ახალი ჩვევების გამომუშავებას მოითხოვს და ვეცდებით ჩვენი რჩევებით ეს პროცესი გაგიმარტივოთ.

დაგეგმეთ დღე

დღის დაგეგმვა დაიწყეთ წინა საღამოს. მონიშნეთ სამსახურთან და საოჯახო საქმეებთან დაკავშირებული ყველა საკითხი, რომლის განხორცილებაც მეორე დღეს გსურთ. ეს აგარიდებთ არაორგანიზებულობას და დაგეხმარებათ დროის ეფექტურად გამოყენებაში.

არ შეცვალოთ დილის რუტინა

ადექით ისე,რომ მოასწროთ შხაპის მიღება, ყავის დალევა, საუზმე და გამოფხიზლება. ადექით ზუსტად იმ დროს, რა დროსაც დგებოდით ადრე, ჩვეულებრივ სამუშაო პირობებში.

ჩაიცვით საოფისედ

აუცილებელი არაა მაღალქუსლიანი ფეხსაცმელი ან პიჯაკი ატაროთ, მაგრამ სახლის ტანსაცმელში ყოფნაც დაუშვებელია. ჩაიცვით აკურატულად. ეს სამუშაოდ განგაწყობთ და გარდა ამისა, ვიდეო-ზარების შემთხვევაში უხერხულობისგანაც გიხსნით.

მოაწყვეთ ოფისი სახლში

იქონიეთ სივრცე, რომელიც შეძლებისდაგვარად იზოლირებული იქნება. მაგიდაზე დაილაგეთ საოფისე ატრიბუტიკა: ბლოკნოტი, ქაღალდი, კალამი და სავიზიტო ბარათები.

მონიშნეთ დაგეგმილი ვიდეო-შეხვედრები Google Calendar-ში.

იყავით ინტერაქციული

აქ თქვენი პირადი სოციალური ქსელებით სარგებლობასა და მეგობრებთან საათობით ჩეთს არ ვგულისხმოთ. სანამ მუშაობას შეუდგებით და ახალ დავალებას მიიღებთ, მიესალმეთ თანამშრომლებს და დღის განმავლობაშიც იკონტაქტეთ მათთან. ( საუბარს არასაჭირო თემებზე ნუ გაუბამთ!).

შეისვენეთ

ყველა ადმაიანმა უკეთ იცის, დღის რომელ მონაკვეთშია უფრო პროდუქტიული. სახლიდან მუშაობის უპირატესობა კი ისაა, რომ თავად შეგიძლიათ გადაწყვიტოთ როდის შეისვენებთ. მთავარია, შესვენებამდე გააფრთხილოთ სამსახურის უფროსი და თანამშრომლები. (შესვენების დროს შეგიძლიათ მიირთვით საკვები, ასევე, მცირეხნიანი საოჯახო საქმითაც დაკავდეთ, რადგან ეს ერთის მხრივ, ტვინს განტვირთავს, მეორეს მხრივ - ფიზიკურ აქტივობად ჩაგეთვლებათ.

სამუშაო საათების დასრულების შემდეგ ხელახლა შეადგინეთ ხვალინდელი დღის სამუშაო გეგმა და დაემშვიდობეთ თანამშრომლებს.

მართალია სახლში არავინ გაკონტროლებთ, მაგრამ მნიშვნელოვანია თქვენი საქმიანი რეპუტაცია შეინარჩუნოთ და გახდეთ საკუთარი თავის პერსონალური მენეჯერი.