როგორ ვაქციოთ ბიზნესად ჩვენი უძრავი ქონება

უძრავი ქონება ის კაპიტალია, რომლის ღირებულებაც მუდმივად მზარდია და რომელსაც მფლობელისთვის შემოსავლის მოტანა შეუძლია. გარდა იმისა, რომ უძრავი ქონების ყიდვა-გაყიდვა საკმაოდ პოპულარული საქმიანობაა, მისი გაქირავებაც საკმაოდ მომგებიანია. სახლების და აგარაკების გაქირავებაც რამდენიმე ტიპად შეიძლება დავყოთ: საცხოვრებლად გაქირავება, დასასვენებლად გაქირავება და დღიურად წვეულებებისთვის გაქირავება. ამჯერად ამ უკანასკნელზე შევჩერდებით, რადგან დამქირავებლებისგან საკმაოდ დიდ ინტერესს იწვევს და გამქირავებლების ფინანსურ მდგომარეობაზეც დადებითად აისახება.

რა უნდა გაითვალისწინოთ, როცა სახლის გაქირავებას გადაწყვეტთ

იმისთვის, რომ თქვენი უძრავი ქონება წარმატებით გააქირავოთ, უნდა განსაზღვროთ სეგმენტი, თუ ვინ შეიძლება იყოს თქვენი პოტენციური დამქირავებელი, რა მიზნებისთვის შეიძლება უნდოდეს სახლის ქირაობა და რამდენ ადამიანს დაიტევს თქვენი სახლი. ისეთი წვეულებებისთვის, როგორიცაა დაბადების დღეები, ხელის თხოვნის ცერემონიალები და მსგავსი, უპირატესობას ექსტერიერს ანიჭებენ და თუკი თქვენს სახლს საკმარისი ფართობის ეზო აქვს, შეგიძლიათ ლამაზად მოაწყოთ და დამქირავებელს შესაფერისი კუთხეების მოწყობის საშუალება მისცეთ. წვეულებებისთვის შერჩეულ სახლებს მომხმარებელი ირჩევს მაქსიმალური კომფორტის და ხედების მიხედვით. მსგავსი აგარაკები პოპულარობით სარგებლობს როგორც თბილისის შემოგარენში, ასევე დედაქალაქის ისეთ უბნებში, საიდანაც ლამაზი ხედი იშლება და სახლი შედარებით იზოლირებულია მეზობლებისგან. გასათვალისწინებელია ისეთი ფაქტორები, როგორიცაა ხელმისაწვდომი ინტერნეტი, ადგილზე არსებული ჭურჭელი და წვეულებისთვის საჭირო მინიმალური აღჭურვილობა, უამინდობის შემთხვევაში კი გადახურული სივრცე, სადაც წვეულების სტუმრები განთავსდებიან. როგორც გამქირავებლები აღნიშნავენ, ყველა სეზონზე თითქმის ერთნაირადაა მოთხოვნა, თუმცა შედარებით მცირდება აგვისტოს თვეში, ვინაიდან მოსახლეობის დიდი ნაწილი დასასვენებლად მიდის და ბინების ან აგარაკების ხანგრძლივი დროით დაქირავებაზე გადადის.

როგორ შევაფასოთ საკუთარი უძრავი ქონება

მომხმარებლისთვის, რა თქმა უნდა, პრიორიტეტულია ხელმისაწვდომი ფასები და მაქსიმალური კომფორტი, თუმცა სახლის მფლობელებმა ადეკვატურად უნდა შეაფასონ საკუთარი ქონება მისი პლუსების მიხედვით. უძრავი ქონების ფასები დამოკიდებულია მის ფართზე, ლოკაციაზე, კომფორტზე, რომელსაც ის მომხმარებელს სთავაზობს, რემონტის ხარისხზე, გეგმარებაზე, ხედზე და სხვა ბევრ ფაქტორზე. შესაძლებელია ბაზრის კვლევა, განცხადებების მიხედვით საშუალო ფასების დადგენა, უძრავი ქონების აგენტთან კომუნიკაცია და კონსულტაციები. ფასის განსაზღვრისთვის საჭირო უამრავი ეტაპის თავიდან ასაცილებლად, „სიტყვა და საქმე“ მარტივი ფუნქციონალის დახმარებით 1 წუთში მოგცემთ შესაძლებლობას, დაადგინოთ თქვენი უძრავი ქონების საორიენტაციო ღირებულება, რომელიც საიტზე არსებული ანალოგიური ობიექტების საშუალო ღირებულების მიხედვით გამოითვლება.

გამქირავებლების თქმით, მათი ყოველთვიური შემოსავლის საშუალო ოდენობა 500-600 დოლარს აღწევს დღიურად გაქირავების შემთხვევაში. ამავე ბინის ყოველთვიური გაქირავების შემთხვევაში კი შემოსავალი შემცირდებოდა და დაახლოებით 250-300 დოლარს გაუტოლდებოდა.

გამოწვევები სახლის გაქირავებისას

სახლის გაქირავებას შემოსავლის გარდა თან სდევს ხარჯიც, რომელიც აუცილებლად უნდა გაითვალისწინოთ და მთავარია ხარჯმა შემოსავალს არ გადააჭარბოს. სტუმრების გასვლის შემდეგ სახლის/ეზოს დასუფთავების და დალაგების სერვისი დაგჭირდებათ, თუ აღნიშნულს თავად არ უმკლავდებით, დამხმარეს აყვანისთვის უნდა გამოყოთ ფინანსები. მისი დაზოგვის მიზნით, უპრიანი იქნება თუ ერთ კონკრეტულ ადამიანთან ან სერვისთან გრძელვადიანად ითანამშრომლებთ და ერთჯერადი მომსახურებისთვის ყოველ ჯერზე ახალს არ დაიქირავებთ. ასევე, გასათვალისწინებელია რიგ შემთხვევებში ზიანის ალბათობა, გატეხილი ჭურჭელი, დაზიანებული ავეჯი, ცვეთადი მასალების ხარჯი, ტექნიკის განახლებისა თუ შეკეთების ხარჯები, კომუნალური გადასახადები და ა.შ. ზიანის ანაზღაურება მოლაპარაკების საგანია და წინასწარ ქირავნობის ხელშეკრულებით პირობების განსაზღვრაა შესაძლებელი. ხელშეკრულების შაბლონები და საკონსულტაციო საკითხები ასევე შეგიძლიათ „სიტყვა და საქმის“ ვებ-გვერდზე მოიძიოთ. ასევე, ზარალის ანაზღაურების მექანიზმად ბინის მეპატრონეები იყენებენ დამქირავებლის პირადობის მოწმობის ასლის დატოვებას, რათა შესაძლო ზიანის ან ზარალის დადგომის შემთხვევაში პიროვნების იდენტიფიცირება შეძლონ. საგულისხმოა ისიც, რომ ზარალის ალბათობა უფრო მეტია ბინის დღიურად გაქირავების შემთხვევაში, ვიდრე ხანგრძლივი პერიოდით გაქირავებისას იქნებოდა.

დაბოლოს, იმისთვის, რომ თქვენი სახლის შესახებ ინფორმაცია ბევრმა ადამიანმა ნახოს, განცხადებების საიტზე დადებული აღწერილობა უნდა იყოს სრულყოფილი, ფოტოები მაღალი ხარისხის და საკონტაქტო პირის ტელეფონის ნომერი ხელმისაწვდომი.