.svg)
ამ სტატიაში საქსტატის ოფიციალურ მონაცემებს jobs.ss.ge-ზე გამოქვეყნებულ ვაკანსიებს შევადარებთ. გაიგებთ, რომელ პროფესიებია მოთხოვნადი, რა უნარები და გამოცდილებაა საჭირო და რომელ სფეროში შეიძლება მუშაობის დაწყება, თუ გამოცდილება არ გაქვთ.
რას ამბობს საქსტატი
საქსტატის მონაცემებით, 2025 წელს დაქირავებით დასაქმებულთა საშუალო თვიური ხელფასი 9.9%-ით გაიზარდა და 1,732 ლარი შეადგინა (იგულისხმება ხელზე ასაღები თანხა). 2026 წლის მეორე კვარტალში ამ მაჩვენებელმა დაახლოებით 1,911 ლარი შეადგინა. ქვემოთ მოცემულია იმ დარგების ხელფასები, რომლებიც jobs.ss.ge-ს პოპულარულ კატეგორიებს შეესაბამება.
| დარგი (საქსტატი) | jobs.ss.ge-ს კატეგორიები | საშუალო ₾ (გადასახადებამდე) | ხელზე ასაღები, ₾* | ქვეყნის საშუალოსთან | ცვლილება 2024 |
|---|---|---|---|---|---|
| საფინანსო და სადაზღვევო საქმიანობები | დაზღვევა, ბანკები | 4,124 | 3,216 | 190% | +12.1% |
| ტრანსპორტი და დასაწყობება | მძღოლი, კურიერი; ლოჯისტიკა, საწყობი | 2,249 | 1,754 | 104% | +14.0% |
| ჯანდაცვა და სოციალური მომსახურება | მედიცინა | 1,835 | 1,431 | 85% | +10.9% |
| საბითუმო და საცალო ვაჭრობა | გამყიდველი, მოლარე, კონსულტანტი; გაყიდვები, მარკეტინგი | 1,828 | 1,426 | 84% | +6.9% |
| ადმინისტრაციული და დამხმარე მომსახურება | დასუფთავება; დაცვა, უსაფრთხოება | 1,756 | 1,370 | 81% | +12.3% |
| განთავსება და საკვების მიწოდება | მზარეული, მცხობელი, დამხმარე | 1,636 | 1,276 | 76% | +9.4% |
| ქვეყნის საშუალო | 2,165 | 1,689 | 100% | +9.9% |
*საქსტატის საშუალოდან გამოკლებულია 20% საშემოსავლო გადასახადი და 2% საპენსიო შენატანი. ეს მიახლოებითი გამოთვლაა და არა საქსტატის მაჩვენებელი.
მეორე, ხელფასები ყველა ამ დარგში იზრდება, ყველაზე სწრაფად ტრანსპორტსა და დასაწყობებაში, ყველაზე ნელა კი ვაჭრობაში.
მესამე, საქსტატის მაჩვენებელი მთელი დარგის ხელფასების საშუალოა და მასში მენეჯერებისა და გამოცდილი თანამშრომლების მაღალი ანაზღაურებაც შედის. ამიტომ უნდა გაითვალისწინოთ, რომ დამწყებს, როგორც წესი, საშუალოზე ნაკლებს სთავაზობენ.
რას გვიჩვენებს jobs.ss.ge: რეალური ვაკანსიები
საქსტატი გვიჩვენებს, რამდენს იღებენ დასაქმებულები საშუალოდ, ვაკანსიები კი იმას, რასაც დამსაქმებლები დღეს ახალ თანამშრომლებს სთავაზობენ.
განვიხილოთ jobs.ss.ge-ის ექვსი პოპულარული კატეგორია: გამყიდველი, მოლარე, კონსულტანტი; მზარეული, მცხობელი, დამხმარე; დასუფთავება; გაყიდვები, მარკეტინგი; ლოჯისტიკა, საწყობი; მძღოლი, კურიერი. ციფრების წაკითხვისას ორი რამ უნდა გავითვალისწინოთ:
- ზოგ განცხადებაში ხელფასი დღიურია ან ცვლაზეა დამოკიდებული, ამიტომ ქვემოთ თვიურ მაჩვენებლებს ვადარებთ;
- მონაცემებში გათვალისწინებულია მხოლოდ ის ვაკანსიები, რომელზეც ხელფასია მითითებული.
როგორ იცვლება ანაზღაურება დამწყებიდან გამოცდილ პროფესიონალამდე
ყველა დარგში მსგავსი სურათია: გამოცდილების გარეშე დასაქმებულს, როგორც წესი, დარგის საშუალო ხელფასზე ნაკლებს სთავაზობენ, დაახლოებით 70-90%-ს. მაგალითად, მოლარე-კონსულტანტის ანაზღაურება საშუალოდ დაახლოებით 1,075 ლარია, ვაჭრობაში კი საშუალო ხელზე ასაღები ხელფასი, დაახლოებით 1,426 ლარია. საშუალო ხელფასს ან მეტს იღებენ კანდიდატები, რომლებსაც გამოცდილება აქვთ, მართვის მოწმობის სათანადო კატეგორია ან მმართველ პოზიციაზე მუშაობენ.
| სექტორი | ხელზე ასაღები საშუალო, ₾ | დამწყები, ₾ | გამოცდილი, ₾ |
|---|---|---|---|
| ვაჭრობა | 1,426 | მოლარე-კონსულტანტი, მოლარე, კონსულტანტი: 900–1,250 | უფროსი მოლარე, დარბაზის ადმინისტრატორი: 1,250–1,600 |
| კვება | 1,276 | მზარეულის დამხმარე, მცხობელის დამხმარე: 1,000–1,300 | მცხობელი, მზარეული: 1,500–2,500; კონდიტერი, მეშაურმე: 2,100–3,400 |
| დასუფთავება | 1,370 | დამლაგებელი, დიასახლისი: 800–1,500 | სასტუმროს დიასახლისი: 1,000–1,800 (სეზონურ სასტუმროებში საცხოვრებლით: 1,600–1,800) |
| ტრანსპორტი და დასაწყობება | 1,754 | საწყობის თანამშრომელი, მტვირთავი: 1,000–1,300 | დისტრიბუტორი: 1,500–2,300; საწყობის მენეჯერი: 1,300–1,700; შესყიდვების მენეჯერი: 2,300–2,600; ტრაილერის მძღოლი: 2,000–2,500 |
10 ყველაზე მაღალანაზღაურებადი სამუშაო jobs.ss.ge
ქვემოთ jobs.ss.ge-ზე გამოცხადებული ყველაზე მაღალი ანაზღაურების მქონე 10 პროფესიაა. ცხრილში ვაკანსიების სახელწოდებები ისეა მითითებული, როგორც განცხადებებში. ანაზღაურება ფიქსირებული ხელფასია, შემოსავალი ან ბონუსი, ამიტომ ეს სვეტიც დავამატეთ.
ტაქსის მძღოლისა და კურიერის შემთხვევაში მითითებულია შემოსავალი და არა ფიქსირებული ხელფასი. ხარჯებს (საწვავი, ავტომობილის მოვლა) მძღოლი და კურიერი თავად ფარავს. გაყიდვების მენეჯერისა და პრისეილერის ანაზღაურების დიდი ნაწილი ბონუსია.
ცალკე უნდა აღვნიშნოთ უძრავი ქონების აგენტის ვაკანსიები. ეს ვაკანსიები ყველაზე მაღალ შემოსავალს ჰპირდებიან (10,000–20,000 ლარამდე), მაგრამ ანაზღაურება მხოლოდ საკომისიოა. იმ რამდენიმე განცხადებაში, სადაც საშუალო შემოსავალია დასახელებული, ხელფასი 1,000–1,700 ლარია.
კვების სფერო: ვის ეძებენ ყველაზე ხშირად
კატეგორია „მზარეული, მცხობელი, დამხმარე" jobs.ss.ge-ზე ერთ-ერთი ყველაზე დიდია. ამ კატეგოროიაში განთავსებული განცხადებიდან 44% საცხობებსა და საკონდიტროებზე მოდის, 31% რესტორნების სამზარეულოებზე, 18% საშაურმეებსა და სწრაფი კვების ობიექტებზე, დანარჩენი კი საწარმოო პოზიციებზეა (მაგალითად, მეხინკლე, მეპილმენე).
დასუფთავების კატეგორიის ვაკანსიების დიდი ნაწილი, მათი დაახლოებით 45% რესტორნებს, კაფეებსა და საცხობებს ეკუთვნის, ყოველი მეექვსე კი სასტუმროებსა და აპარტამენტებს.
რა ზრდის ანაზღაურებას
- ხელობა. დამხმარედან გამოცდილ პროფესიონალამდე გზა დიდ სხვაობას იძლევა: მცხობელის დამხმარე და მზარეულის დამხმარე 1,000–1,300 ლარს იღებს, ლავაშის მცხობელი 2,100–2,400-ს, მეხაჭაპურე 2,200-ს, კონდიტერი 2,750–3,000-ს, მეშაურმე კი 3,400 ლარამდეც. ბევრი დამსაქმებელი პროფესიას ადგილზე ასწავლის.
- მართვის მოწმობის კატეგორია. B კატეგორიით დისტრიბუტორი ძირითადად 1,500–2,300 ლარს იღებს, C კატეგორიით სატვირთო ავტომობილის მძღოლი 1,600–2,000-ს, მობილური ამწის ოპერატორი კი 3,000–4,000-ს.
- გაყიდვები. გაყიდვების მენეჯერისა და პრისეილერის ანაზღაურების დიდი ნაწილი ბონუსია, ამიტომ შემოსავალი შედეგზეა დამოკიდებული.
- მმართველი პოზიცია და პროგრამების ცოდნა. უფროსი მოლარისა და დარბაზის ადმინისტრატორის (1,250–1,600 ლარი) ვაკანსიებში სავაჭრო ქსელში მმართველ პოზიციაზე მუშაობის გამოცდილებასა და საცალო ვაჭრობის პროგრამის (Apex) ცოდნას ითხოვენ. შესყიდვების მენეჯერისთვის (2,300–2,600) უმაღლესი განათლებაა სასურველი.
- უცხო ენა. ინგლისურენოვანი ქოლ-ცენტრის გაყიდვების აგენტისთვის 1,500–2,000 ლარია გამოცხადებული, მაშინ როცა მოლარე-კონსულტანტის ტიპური ანაზღაურება დაახლოებით 1,075 ლარია.
- გრაფიკი და საკუთარი ტრანსპორტი. 12-საათიანი ცვლები (მაგალითად, მეშაურმეს ვაკანსიებზე) და საკუთარი ავტომობილი ან სკუტერი (კურიერისა და პრისეილერის ვაკანსიებზე) ანაზღაურებას ზრდის, თუმცა ხარჯებიც იზრდება.
სად დაიწყოს დამწყებმა
ჩვენ მიერ გადამოწმებულ ვაკანსიებში გამოცდილება არ არის სავალდებულო კატეგორიაში „გამყიდველი, მოლარე, კონსულტანტი" ვაკანსიების 77%-ში, „გაყიდვები, მარკეტინგი"-ს 66%-ში, „ლოჯისტიკა, საწყობი"-ს 57%-ში და „დასუფთავება"-ს 55%-ში. კატეგორიაში „მზარეული, მცხობელი, დამხმარე" გამოცდილების გარეშე ან ერთ წლამდე გამოცდილებით იღებენ ვაკანსიების 66%-ს.
| სამუშაო | დაწყების ანაზღაურება, ₾ | შემდეგი საფეხური, ₾ |
|---|---|---|
| მოლარე-კონსულტანტი | 900–1,250 | უფროსი მოლარე, დარბაზის ადმინისტრატორი: 1,250–1,600 |
| საწყობის თანამშრომელი, მტვირთავი | 1,000–1,300 | დისტრიბუტორი: 1,500–2,300 |
| დამლაგებელი, დიასახლისი | 800–1,500 | სასტუმროს დიასახლისი: 1,000–1,800 |
| მზარეულის დამხმარე, მცხობელის დამხმარე | 1,000–1,300 | მცხობელი, მზარეული: 1,500–3,000 |
| კურიერი საკუთარი სკუტერით ან ავტომობილით | 1,700–4,500 (შემოსავალი) | მძღოლი-დისტრიბუტორი: 1,500–2,300 |
ვაკანსიის არჩევისას სამი კითხვა დაგეხმარებათ:
- რა ნაწილია ფიქსირებული და რა ბონუსი;
- ხელფასი დღიურია თუ თვიური;
- ასწავლის თუ არა დამსაქმებელი პროფესიას ადგილზე.
როგორ მოვძებნოთ სამუშაო jobs.ss.ge-ზე
jobs.ss.ge-ზე შეგიძლიათ ვაკანსიები გამოცდილების, გრაფიკისა და ქალაქის მიხედვით გაფილტროთ. ცალკე ფილტრი აჩვენებს მხოლოდ იმ ვაკანსიებს, სადაც ხელფასია მითითებული, ხოლო რუკაზე ძებნა გეხმარებათ სამუშაო სახლთან ახლოს მოძებნოთ.
მომსახურების სფეროში ხელფასი, ხშირ შემთხვევაში, ქვეყნის საშუალოზე დაბალია, თუმცა კონკრეტული სამუშაოების შემთხვევაში, ეს მაჩვენებელი საშუალოზე ორჯერ მეტია. ყველაზე მეტს ხელობა (მცხობელი, ყასაბი, მეშაურმე), მართვის მოწმობის სპეციალური კატეგორია და გამომუშავებაზე დამოკიდებული ანაზღაურება (გაყიდვები, კურიერობა) იძლევა. დაწყება კი გამოცდილების გარეშეც შეიძლება, 800–1,300 ლარიდან.
