5 მნიშვნელოვანი რჩევა სანამ რემონტს დაიწყებ

თუ სპეციალისტებს რემონტის შესახებ რჩევას ჰკითხავთ, მათი კონსულტაცია ძირითადად მიმართული იქნება რემონტის მიმდინარე პროცესზე. თითოეული მათგანი ძალიან ფასეულია და კონკრეტულ დროს, შესაძლოა ძალიან გაგვიადვილოს სარემონტო პროცესი. თუმცა, ქვემოთ წარმოგიდგენთ 5 რჩევას, რომელთა ცოდნა ძალიან მნიშვნელოვანია რემონტის დაწყების წინ და შესაძლოა, ისინი ყველა სპეციალისტს გამორჩეს მხედველობიდან:

რჩევა 1 - შეიძინე 15-20%-ით მეტი მასალები

ხარჯთაღრიცხვისას, მნიშვნელოვანია ისეთი ფაქტორის განსაზღვრა, როგორიცაა გაუთვალისწინებელი ხარჯი. ეს შეიძლება იყოს, დანაკლისების დროს დამატებით წასვლა შენაძენებზე, რაც დროის კარგვასთან ერთად, რა თქმა უნდა დაკავშირებულია დამატებით ხარჯებთან.

ზოგიერთი მასალის შეძენა თავიდანვე მეტობით უნდა მოხდეს, რაც აგარიდებთ შემდგომში გაუთვალისწინებელ ხარჯებს და სხვა პრობლემებს - მაგ: კაფელ-მეთლახის მეტობით შეძენა საჭიროა, რადგან მუშაობის დროს, მაღალია მათი დაზიანების რისკი. ამასთან გასათვალისწინებელია, რომ კონკრეტული დიზაინის კაფელ-მეთლახი გარკვეული დროის შემდეგ რაოდენობა იწურება და გაყიდვაში აღარ არის. სათადარიგო მასალა გამოგადგებათ, კედლის შიგნით არსებული გაყვანილობის დაზიანების დროს, კედლის მოპირკეთების იგივე დიზაინით შესავსებად.

მეტობით შეძენა საჭიროა ასევე - ლურსმნების, თვითმჭრელების, გრუნტის, შპალერის, საღებავების და სხვა სახარჯი მასალების შემთხვევაში. საღებავებზე და იმ მასალებზე, რაც ფერს უკავშირდება, მათ ასარჩევად მნიშვნელოვანია იცოდეთ რას ნიშნავს ფერი და რა ნიუანსების გათვალისწინება გვჭირდება, სანამ რემონტს დაიწყებთ. რეკომენდირებულია, ზედმეტობით იანგარიშოთ, შესაძენი მასალის საშუალოდ  15-20%.

რჩევა 2 - გააკონტროლე ხარჯები

გახსოვდეთ, უშუალოდ თქვენი კონტროლის გარეშე, ხარჯები შესაძლოა გაგიორმაგდეთ. მიუდექით რაციონალურად ფასდაკლებებს. წინააღმდეგ შემთხვევაში, შესაძლოა ბევრი უსარგებლო სამშენებლო მასალის შეძენა მოგიწიოთ. ზედმეტობით შეძენა სწორი მიდგომაა, თუმცა სიიაფის გამო, ისეთი რამის შეძენა, რაც განსაზღვრული არ გქონიათ, არაგონივრულია.

ხარჯების გასაკონტროლებლად გამოიყენეთ შემდეგი 2 მიდგომა:

·     შეაგროვეთ ხარჯთან დაკავშირებული ქვითრები - საგადასახადო ქვითარზე, იგივე „ჩეკზე“, მიანიშნეთ თუ რა შეიძინეთ და რა რაოდენობით, გადაუღეთ ფოტო და შეინახეთ. თუ ქვითრების ფიზიკურად შენახვას გადაწყვეტთ გახსოვდეთ, რომ მას „ჩეკს“ მელანი მალე გადასდის. ასე, რომ მოათავსეთ ისინი ფაილში და შეინახეთ მშრალ ადგილას.

·     აწარმოეთ გადახდის ცხრილი ხელოსნებთან - შეადგინეთ მარტივი ცხრილი, რომელიც, როგორც მინიმუმ მოიცავს შემდეგ გრაფებს: 1. გადახდის თარიღი 2. გადახილი თანხის ოდენობა 3. თანხის გამცემი 4. თანხის მიმღები - ანაზღაურების ნაწილის, ყოველი გადახდის დროს, მოაწერეთ ორივე მხარემ ხელი. მეტი სამართლიანობისთვის, ცხრილის მეორე ასლი შესთავაზეთ ხელოსანს.

რჩევა 3 - რემონტი დაიწყე დღესასწაულების შემდეგ

რემონტის დაწყება არ არის რეკომენდირებული სადღესასწაულო დღეებში. არც მაშინ, თუ რემონტის მიმდინარეობის პერიოდში, რამოდენიმე უქმე დღე უწევს.

ეცადეთ, სარემონტო ჯგუფები დღესასწაულის მომდევნო დღეებში დაიქირავოთ, რის შედეგად ორმაგად მოგებული დარჩებით, კერძოდ: პირველი - დღესასწაულის მოლოდინის დროს, იკლებს სამუშაო მოტივაცია, რაც თქვენ შემთხვევაში სანერვიულო არ იქნება და მეორე - დღესასწაულების შემდგომ, ხშირ შემთხვევაში, მცირდება მომსახურების საფასური, რაც ასევე მნიშვნელოვანი სარგებელია.

რჩევა 4 - გააკეთე გეგმარების მონახაზი

ყოველთვის გონივრულია გააკეთო მინიმალისტური გეგმარება, სადაც მოცემული იქნება არსებული მდგომარეობა და დატანილი იქნება ყველა საჭირო ცვლილება.

თითოეული სამუშაო უნა შეათანხმოთ შესაბამის ხელოსანთან, რომლისთვისაც გასაგები იქნება გეგმარებაში მოცემული მინიშნებები  და ეცადეთ, შესრულებული სამუშაოები გააკონტროლოთ და გეგმარებას შეადაროთ, ყოველი სამუშაო დღის ბოლოს.

რჩევა 5 - გააფრთხილე ირგვლივ მცხოვრები მეზობლები

ეს მხოლოდ მეზობლების პატივისცემას არ ნიშნავს და არც წვრილმანი საკითხია. მეზობლების გაფრთხილება საჭიროა, რადგან მალე, ხმაურს დაიწყებთ და ყველა ისედაც გაიგებს და უსიამოვნო ეჭვებს დაბადებს.

გაფრთხილების შემთხვევაში, ისინი სარემონტო პროცესს უფრო მშვიდად შეხვდებიან, რაც აგარიდებთ სპეციალური სამსახურებიდან სტუმრებს და სხვა უსიამოვნო სიურპრიზებს. ეცადეთ, რომ ხმაურიანი სამუშაოები შეასრულოთ დღის მანძილზე 11:00 საათიდან - 18:00 საათამდე.