რა მინიმალური ავეჯი დაგვჭირდება ბინის გასაქირავებლად

ბინის გაქირავება შემოსავლის გაზრდის საიმედო გზაა, თუმცა, როგორ მოვამზადოთ საცხოვრებელი ფართი, რათა სწრაფად და მომგებიანად ვიქირაოთ. რა მინიმალურ პირობებს უნდა აკმაყოფილებდეს ყველა ბინა, რომ ის მივიჩნიოთ მზად გასაქირავებლად.

დღევანდელი მოცემულობით, თბილისში ფაქტობრივად ნებისმიერი სახის ფართის გაქირავება მარტივად შეიძლება. დღეს, გაზრდილი მოთხოვნის გამო, საბინაო ბაზარზე თითქმის არ რჩება გასაქირავებელი ბინა 1 დღეზე მეტ ხანს, თუ ბინა ელემენტარულ საცხოვრებელ პირობებს აკმაყოფილებს. ეს მაშინაც კი, თუ ბინას ისეთი ღირებულება აქვს, რომელიც აქამდე არარეალურ ფასად მოგეჩვენებოდათ. ამჟამად დედაქალაქში ადვილად ქირავდება ისეთი ფართებიც, რომლებიც თავდაპირველად ავტოფარეხისთვის იყო განკუთვნილი და მხოლოდ დასაძინებლად თუ გამოდგება. მათი ნაწილი საშხაპითაც კი არ არის აღჭურვილი, რა დროსაც გამოსავალი თბილისის გოგირდის აბანოებით სარგებლობაა. თუმცა, რასაკვირველია ასეთი ფართი, ხანგრძლივ საცხოვრებლად არ გამოდგება და ხანმოკლე იჯარის შემთხვევაშიც, მხოლოდ ბინების უკიდურესი დეფიციტით არის განპირობებული.

რა მინიმალურ პირობებს უნდა აკმაყოფილებდეს გასაქირავებელი ბინა

შეამოწმეთ სანტექნიკა და ელექტრობა. ამოვარდნილი ჩამრთველები მაშინვე შეაშინებს მოიჯარეებს, არავის უნდა სხვის სახლში, მითუმეტეს დროებით საცხოვრებელში, თუნდაც მცირე რემონტის გაკეთება. პირველ რიგში, სანტექნიკა უნდა მუშაობდეს გამართულად. თუ ონკანები წვეთავს, ან საიდანმე წყალი ჟონავს, ამის სასწრაფოდ აღმოფხვრა აუცილებელია. ასევე, შეამოწმეთ რამდენად კარგად გაედინება ნიჟარიდან წყალი კანალიზაციაში.

ბინა ძველი ავეჯით. იმ შემთხვევაში ძველ აშენებულ კორპუსში აქირავებთ ბინას, რომელიც წლების განმავლობაში გამოიყენებოდა ოჯახისთვის საცხოვრებლად, აუცილებლად დაგროვდებოდა უსარგებლო ნივთები. ეს ძირითადად დაზიანებულ მასიურ ავეჯს შეეხება, რომლებსაც პრაქტიკულ დანიშნულებას ვეღარ მოუძებნი. ასეთი ავეჯი შეიძლება იყოს მისაღები ოთახის კედელი, რომელსაც საბჭოთა დროს ბროლის ჭურჭლის და სხვა სერვიზების შესანახად იყენებდნენ. მდგმურებს არ დააქვთ ძვირფასი ჭურჭელი და შესაბამისად, ასეთი გარნიტურები მხოლოდ ადგილს დაიკავებს. გაითვალისწინეთ რომ, იმის მიუხედავად, რა ფართობის ბინას აქირავებთ, სახლში თავისუფალი სივრცე ყოველთვის მნიშვნელოვანია და იქ არ უნდა იყოს უსარგებლო ნივთები. სჯობს, მისაღები ოთახის დაზიანებული კედელი, სამეული თუ სხვა მასიური ავეჯი გადაყაროთ და თუნდაც ყველაზე დაბალფასიანი, მაგრამ გამოსადეგი ავეჯი შეიძინოთ.

ბინა მინიმალური ავეჯით. როგორც უკვე აღვნიშნეთ, ზედმეტი უსარგებლო ავეჯი, პირიქით ხელისშემშლელი პირობაა და სივრცის გათავისუფლება სჯობს. თუმცა, არის გარკვეული ნივთები, რის გარეშეც უბრალოდ ვერ იცხოვრებს ადამიანი. მცირე ფართობის ბინაში, დასაძინებლად საუკეთესო ვარიანტი იქნება გასაშლელი დივანი, რომელიც ღამით საწოლად გადაიქცევა, ხოლო დღისით სხვა ფუნქციით დაიტვირთება. სამზარეულოში აუცილებელია ერთი ან ორი კარადა მაინც, ჭურჭლის შესანახად. ასევე, პატარა მაგიდა და ორი სკამი. მდგმურებს აუცილებლად დასჭირდებათ სარეცხის მანქანა, ხოლო ზაფხული მაცივრის გარეშე წარმოუდგენელია. ზამთარში კი გათბობის რაიმე საშუალება, ეს შეიძლება იყოს ბუნებრივ აირზე მომუშავე ან ელექტროგამათბობელი.

ბინა ავეჯის გარეშე. ყველაზე ცუდ შემთხვევაში, ავეჯის გარეშე ბინის გაქირავებისას, შეიძლება ფასის შემცირება მოგიწიოთ, ის მაინც გაქირავდება, მაგრამ ყველას უნდა მაქსიმალურად მეტი შემოსავალი მიიღოს უძრავი ქონებისგან. ბინა ავეჯის გარეშე ვერ იქნება ყველასთვის მისაღები, მდგმურებს უმეტესად თავად არ აქვთ ავეჯი, გარდა ამისა, ისინი შეიძლება ხშირად იცვლიდნენ საცხოვრებელს, ხოლო, ავეჯის ტარება ბინიდან ბინაში მოუხერხებელია, გადატანა აზიანებს ნივთებს და სატვირთოს თუ მუშების მომსახურებაც დანახარჯებთან არის დაკავშირებული.

იმ შემთხვევაში, თუ სრულად ცარიელია ბინა, გაითვალისწინეთ რომ რემონტის ყველა ნაკლი თვალსაჩინო გახდება. არ არის აუცილებელი რემონტის თავიდან გაკეთება, მაგრამ ბინის მოწესრიგება და სუფთა იერის მიცემა მნიშვნელოვანია. ასეთი ბინა მისაღები იქნება ახალგაზრდებისთვის, რომლებიც დამოუკიდებლად ცხოვრებაზე ოცნებობენ, აევე მათთვის, ვინც ხანგრძლივი დროით ქირაობს და უკვე იცის, როგორ მოირგოს თავის საჭიროებებზე ბინა. ამ სეგმენტში დიდი მოთხოვნაა ერთ ოთახიან აპარტამენტებზე, მაგრამ ეს ზოგადად ყველაზე პოპულარული ტიპის საცხოვრებელია. ასე რომ, ეს იმას სულაც არ ნიშნავს, თითქოს სამ ოთახიან ბინას ვერ გააქირავებთ ღირსეულ ფასად.


ბევრ ადამიანს სურს მხოლოდ თავის საწოლზე დაიძინოს, იმუშაოს კომპიუტერის საყვარელ მაგიდასთან კომფორტული სკამით, ან გამოიყენოს საკუთარი სარეცხი მანქანა.