რა ხდება უძრავი ქონების ბაზარზე – თბილისში გასაქირავებელი ბინის ფასი კვლავ გაიზარდა

მიუხედავად იმისა, რომ ექსპერტები გასაქირავებელი ბინის ფასის კლებას ვარაუდობდნენ, ის მაინც კვლავ გაიზარდა. თუმცა, შემცირებულია უძრავ ქონებაში ტრანზაქციები არ გაზრდილა. მეტიც, თბილისში ბინების გაყიდვები შემცირდა, ასევე მცირედით გაიაფდა თბილისის ცენტრში ახალაშენებული ბინების ფასიც.

თიბისი კაპიტალის კვლევის მიხედვით, რომელიც 25 აგვისტოს გამოქვეყნდა, 2023 წლის ივლისში თბილისში 3,336 ტრანზაქცია დაფიქსირდა, რაც წინა წლის იმავე პერიოდის მაჩვენებელზე 2%-ით ნაკლებია. ამავე კვლევის შედეგების მიხედვით, საშუალო გასაყიდი ფასი წინა თვესთან შედარებით ფაქტობრივად უცვლელი დარჩა და 1,164 $/კვ.მ შეადგინა, ხოლო წლიურ ჭრილში 22%-ით გაიზარდა.

მნიშვნელოვანია რომ, აღნიშნულის მიუხედავად გასაქირავებელი ბინის ფასი 13.1 $/კვ.მ-ს გაუტოლდა, რაც წინა თვესთან შედარებით 5%-ით, ხოლო 2022 წლის ივლისთან შედარებით 48%-ით მაღალია.

commersant-ის ინფორმაციით, რომელსაც გამოცემა 17 აგვისტოს აქვეყნებს, 2023 წლის ივლისში თბილისში გასაყიდი ახალაშენებული ბინების საშუალო შეწონილი გასაყიდი ფასი 9%-ით გაიზარდა გარეუბნებში, ფართო ცენტრსა და ქალაქის ცენტრში კი 5%-იანი კლება დაფიქსირდა. მიუხედავად მცირედი ცვლილებისა, არსებითი მდგომარეობა დაახლოებით იგივე რჩება, როგორც უძრავი ქონების ყიდვა-გაყიდვის, ასევე გაქირავების მაჩვენებლებით.

იმავეს ამტკიცებს Colliers Georgia-ს​ მონაცემებიც, რომლის მიხედვითაც 2023 წლის ივლისში თბილისში ძველი ბინების საშუალო შეწონილი გასაყიდი ფასი 4%-ით გაიზარდა როგორც გარეუბნებში, ასევე ფართო ცენტრსა და ქალაქის ცენტრში.

2022 წლის ანალოგიურ პერიოდთან შედარებით, გაყიდვები 7%-ით შემცირდა. ასევე 7%-ით, 189 მლნ დოლარამდეა შემცირებული ბაზრის ზომა.

2023 წლის ივლისში, თბილისში 3 540 საცხოვრებელი ბინა გაიყიდა. ინფორმაციას Colliers Georgia-ს კვლევაზე დაყრდნობით, კომერსანტი ავრცელებს.

უძრავი ქონების გაყიდვები მცირედით შემცირებულია, თუმცა აღნიშნული შესაძლოა ზაფხულის სეზონზე დაბალი აქტიურობით იყოს განპირობებული. კიდევ ერთი გამოცემა BM.ge, რომელიც ასევე Colliers Georgia-ს​ კვლევას ეყრდნობა, იუწყება რომ ამ პერიოდში ახალ პროექტებში ტრანზაქციების 3%-იანი ზრდა ფიქსირდება. ძველ პროექტებში კი 2022 წლის ივლისთან შედარებით მაჩვენებელი 27%-ით შემცირდა.

თბილისში ახალაშენებულ მედიუმსეგმენტის ბინებზე მოთხოვნა 10%-ით, ეკონომსეგმენტში კი 2%-ით გაიზარდა; პრემიუმ სეგმენტის შემთხვევაში ტრანზაქციების რაოდენობა 7%-ით 191 ერთეულამდე შემცირდა.

აღნიშნულის საფუძველზე შეგვიძლია ვივარაუდოთ, რომ შიდა და გარე ფაქტორების ზემოქმედების შედეგად, თუ ეს გავლენა მომავალში არ გაიზარდა, ფასის მატების ტენდენცია კვლავ გაგრძელდება. ეს განსაკუთრებით ეხება თბილისში გასაყიდ უძრავ ქონებას, რაზეც გარე პოლიტიკური ფაქტორების გარდა, ასევე მნიშვნელოვან გავლენას ახდენს სამშენებლო მასალების ფასის ზრდა და სხვა ეკონომიკური ფაქტორები. 

ქვეყანაში მიგრაციის მოცულობა უძრავი ქონების გასაყიდ ფასზე, შედარებით ნაკლებად ახდენს გავლენას, ვიდრე გასაქირავებელი ბინების შემთხვევაში. გასაქირავებელი უძრავი ქონების ფასი გრძელვადიან პერსპექტივაში, სავარაუდოდ  სტაბილურ ნიშნულს შეინარჩუნებს მომავალშიც, თუმცა ფასის მნიშვნელოვანი კლების ტენდენცია არც გასაქირავებელი ბინებზე არ არის მოსალოდნელი.