რა უნარებია საჭირო, რომ უძრავი ქონების აგენტი გახდე?

მიუხედავად იმისა, რომ ბოლო პერიოდში უძრავი ქონების აგენტობა პოპულარული საქმიანობა გახდა, საქართველოში ის, როგორც პროფესიული საქმე, ახლა იხვეწება. ადამიანები თავის უძრავ ქონებას სამართავად ანდობენ პროფესიონალს და ხშირად, არ ინტერესდებიან მათი პროფესიული გამოცდილებით თუ ლიცენზიის არსებობით. საერთაშორისო ბაზარზე, უძრავი ქონების აგენტი ლიცენზირებული და სპეციალური განათლების მქონე ადამიანია, რომელსაც სწორად შეუძლია ბაზრის ანალიზი, თქვენი უძრავი ქონების შეფასება და კეთილსინდისიერ და ხარისხიან მომსახურებას გთავაზობთ. საქართველოში ამ ეტაპზე არ არსებობს ოფიციალურად ლიცენზირების შესაძლებლობა ლოკალურად და რეალტორთა უმეტესი ნაწილი გამოცდილებაზე დაყრდნობით მუშაობს.

იმისთვის, რომ უძრავი ქონების აგენტი იყოთ, პირველ რიგში კარგად უნდა გაიცნოთ უძრავი ქონების ბაზარი, გქონდეთ ანალიზის უნარი და შეგეძლოთ სხვადასხვა ფაქტორებისა და გავლენების განსაზღვრა, რაც ამა თუ იმ პროცესზე მოახდენს ზეგავლენას. კომუნიკაციის უნარი არის ასევე ერთერთი უმნიშვნელოვანესი ასპექტი, რადგან კლიენტისთვის გადამწყვეტია, თუ როგორი ტიპის ურთიერთობას ამყარებს უძრავი ქონების აგენტი  მასთან. ხასიათის ფაქტორი ხშირ შემთხვევაში ყველაზე დიდ გავლენას ახდენს თანამშრომლობის დაწყების სურვილზე. თუკი პოტენციური კლიენტი ამჩნევს, რომ თქვენი საქმე მოგწონთ, გულით აკეთებთ და მხოლოდ მოვალეობის მოხდის მიზნით არ ურთიერთობთ მასთან, რწმუნდება, რომ თქვენგან სათანადო მომსახურებას მიიღებს და შესაბამისად, არჩევანს დიდი ალბათობით თქვენზე შეაჩერებს. კომუნიკაციის უნარის გარდა, მნიშვნელოვანია, რომ იყოთ ენერგიული ადამიანი და თქვენს შესრულებულ საქმიანობაში ტემპი იგრძნობოდეს.

ბევრი არასასიამოვნო შემთხვევის გამო დაიკარგა ნდობის ფაქტორიც კლიენტებსა და უძრავი ქონების აგენტებს შორის. სწორედ ამიტომ არის მნიშვნელოვანი საქმეში კეთილსინდისიერება, მოვალეობების მიმართ პროფესიონალიზმისა და პასუხისმგებლობის გამოვლინება. პროფესიონალ და სანდო ადამიანს კი გამოცდილებაზე დაყრდნობით რეკომენდაციას გაუწევენ კლიენტები და რეალური შედეგების მიხედვით გაიზრდება მოთხოვნა თქვენს კანდიდატურაზეც. ცნობადობის გასაზრდელად გამოიყენეთ სოციალური ქსელები. დღესდღეობით ინტერნეტი თვითპრეზენტაციისთვის ერთერთი ყველაზე მძლავრი და ეფექტური იარაღია. მისი დახმარებით შეძლებთ არამხოლოდ თქვენი მომსახურების შესახებ დეტალური ინფორმაციის განთავსებას, არამედ თქვენი კმაყოფილი კლიენტების შეფასებებისა და რეკომენდაციების გამოქვეყნებასაც.

უძრავი ქონების აგენტისათვის მნიშვნელოვანია ასევე, რომ პიროვნულად იყოთ აქტიური ადამიანი, ესწრებოდეთ თქვენს სფეროში სხვადასხვა ღონისძიებებს და იძენდეთ უფრო და უფრო მეტ ცოდნას თქვენი საქმიანობს შესახებ, ცოდნასა და პრაქტიკასთან ერთად კი ასევე შეუფასებელია ღონისძიებებზე დამსწრეთა შორის კონტაქტების შეძენა და ნეთვორქინგი, რაც განვითარებაში დაგეხმარებათ.