როგორ უნდა შეარჩიო ბავშვისთვის უსაფრთხო ავეჯი

მყარი ავეჯი

მოუსვენარი პატარები ხშირად ეყრდნობიან ავეჯს ან მასზე ასვლას ცდილობენ, ასეთ დროს კი ავეჯის სიმყარე და სტაბილურობა აუცილებელია. კარადები, თაროები, მაგიდა, სკამები და ა.შ. მყარი მასალისგან უნდა იყოს დამზადებული, რათა მისი ადგილიდან დაძვრა რთული იყოს. საჭიროების შემთხვევაში, ზოგიერთი ავეჯი კედელზე უნდა იყოს დამაგრებული, რათა გადმოყირავება გამოირიცხოს. ბავშვის საცხოვრებელ სივრცეში ასევე უნდა მოერიდოთ მოძრავი სავარძლის ან მაგიდების გამოყენებას, ხოლო ტექნიკაც (მაგ. ტელევიზორი) უმჯობესია კედელზე იყოს დამაგრებული, რათა მსხვრევადი ზედაპირი საფრთხეს არ წარმოადგენდეს. 

მრგვალი კუთხეები

ბავშვები აქტიურად მოძრაობენ, თამაშობენ და სხვადასხვა მიმართულებით დარბიან, ამიტომ ბასრი და მკვეთრი კუთხეების მქონე ავეჯი საფრთხეს წარმოადგენდეს. თუ ახალი ავეჯის შეძენას გეგმავთ, შეარჩიეთ მოდელები, რომლებსაც მომრგვალებული კუთხეები აქვს. ეს განსაკუთრებით მნიშვნელოვანია ისეთი ავეჯისთვის, რომელიც ბავშვის სიმაღლისაა — მაგიდა, სკამი, კომოდი, საწოლი და სხვა. თუ სახლში ბასრი კუთხეები მქონე ავეჯი გაქვთ, შეგიძლიათ შეიძინოთ რეზინის ან სილიკონის სპეციალური დამცავები, რომლებიც კუთხეებს ფარავს. ასევე, შეგიძლიათ ავეჯის განლაგება ისე შეცვალოთ, რომ ბასრი კუთხეები კედლისკენ მოექცეს.

უსაფრთხო საკეტები

პატარები სამყაროს დიდი ინტერესით იკვლევენ და ხშირად ცდილობენ კარადებისა და უჯრების გახსნას, რაც მათთვის საფრთხის შემცველი შეიძლება აღმოჩნდეს. ამიტომ, მნიშვნელოვანია, დამცავი საკეტების გამოყენება იმ სათავსოებზე, რომლებშიც მედიკამენტები, სარეცხი საშუალებები, ბასრი ან მტვრევადი ნივთები ინახება. უსაფრთხო საკეტების გამოყენება აუცილებელია არა მხოლოდ ავეჯისთვის, არამედ შემოსასვლელი კარისთვისაც, რათა ბავშვი მოულოდნელად გარეთ ვერ გავიდეს. ასევე, მნიშვნელოვანია აივნის, ფანჯრებისა და სხვა გასასვლელების დაცვა ისეთი მექანიზმის მქონე საკეტებით, რომელთა გახსნაც პატარებისთვის რთული იქნება.

მარტივად გასაწმენდი მასალა

ბავშვისთვის უსაფრთხო გარემოს შესაქმნელად ისეთი ავეჯის შერჩევაც აუცილებელია, რომელიც ადვილად სუფთავდება. ჭამის, თამაშის, მოძრაობისა თუ სხვა აქტივობების შემდეგ ავეჯი მარტივად შეიძლება დაისვაროს, ამიტომ თავიდანვე ისეთი მასალა უნდა შეარჩიოთ, რომელიც მარტივად გაიწმინდება. მაგალითად, ლამინირებული ხე ნაკლებად იწოვს სითხეს, ტყავის გადასაკრავები ადვილად იწმინდება, ხოლო წყალგამძლე ქსოვილები დივნის ან სკამებისთვის იდეალური არჩევანია. მსგავსი ავეჯის გამოყენებით თავიდან აირიდებთ ბაქტერიებისა და მტვრის დაგროვებას, ყოველდღიურ რუტინას კი გაიმარტივებთ. ასე რომ, ჰიგიენური გარემოს შენარჩუნება გაცილებით გაგიმარტივდებათ, თუ ასეთი ზედაპირის მქონე მასალებს შეარჩევთ. 

ბარიერები

პატარებს ახალი ადგილების აღმოჩენა და შესწავლა ძალიან მოსწონთ, ამიტომ განსაკუთრებით აინტერესებთ აივანი, ფანჯარაში წარმოდგენილი ხედი, კიბის მიღმა დარჩენილი სივრცე და ასე შემდეგ. ამიტომ, განსაკუთრებული ყურადღება სწორედ ამ სივრცეების უსაფრთხოებას უნდა მიექცეს. აივნებსა და ფანჯრებზე ბარიერების დაყენება აუცილებელია, განსაკუთრებით იმ შემთხვევაში, თუ მაღალ სართულზე ცხოვრობთ. საფეხურებზე ასვლა ბავშვისთვის ერთ-ერთი საინტერესო გამოცდილებაა, ამიტომ ბარიერი კიბისთვისაც საჭიროა, რათა პატარამ სიმაღლეზე დამოუკიდებლად ასვლა არ გადაწყვიტოს. ასეთი ბარიერი საჭიროა საწოლისთვისაც, რათა პატარამ მთელი ღამე უსაფრთხოდ იძინოს.