როგორ კადრებზეა მოთხოვნა სასტუმროში? - ინტერვიუ „სასტუმრო 1740-ის“ დამფუძნებელ ლიკა ტოგონიძესთან

სასტუმროს დამფუძნებელი და მმართველი, ლიკა ტოგონიძე გვიზიარებს საკუთარ შეხედულებასა და გამოცდილებას ჰორეკა სექტორში არსებულ ვითარებაზე, უნარებზე, რომელიც აღნიშნულ სფეროში დასაქმებულებს უნდა ჰქონდეს და გვთავაზობს ამჟამად სასტუმროში არსებულ ვაკანსიებს:

• თავდაპირველად შეაფასეთ ჩვენი ქვეყნის ჰორეკა ბიზნესის მზაობა, განსაკუთრებით მიმდინარე სეზონზე, როცა  გაზრდილია სამთო მიმართულებებზე მოთხოვნა.

 დღეს ჩვენს სექტორში ერთ-ერთი ყველაზე დიდი გამოწვევა კადრების დეფიციტია. აღნიშნულს ემატება  ინფრასტრუქტურული საკითხებიც - უკეთესი გზები, კეთილმოწყობილი პარკები და დამატებითი რეკრეაციული ზონები მნიშვნელოვნად გაამარტივებდა ყაზბეგის, როგორც კურორტის განვითარებას და სტუმრებს რეგიონში უფრო დიდხანს დარჩენას უბიძგებდა.

სასტუმრო 1740 ყაზბეგის მაგალითზე ჩანს, რომ სწორად შერჩეული მდებარეობა, მაღალი სტანდარტები და სტუმარზე ორიენტირებული მიდგომა პირდაპირ ახდენს დატვირთულობაზე გავლენას. ჩვენი კონცეფცია - მყუდრო, ხარისხიანი და ოჯახური გარემო - ზუსტად პასუხობს იმ ნიშურ მოთხოვნას, რომელსაც ყაზბეგში ჩამოსული სტუმრები ეძებენ.

• ზოგადად, რა გამოწვევებია ახლა თქვენს სფეროში დასაქმებისა და ხარისხიანი სერვისის მიწოდების კუთხით, რატომ და რა საპასუხო ნაბიჯები შეიძლება გადაიდგას?

ჰორეკა სექტორში მთავარი ღირებულება სერვისია, ხოლო სერვისის ხარისხი მთლიანად პერსონალზეა დამოკიდებული.  ამ ეტაპზე ყველაზე სერიოზული დაბრკოლება სწორედ პერსონალის საკითხია: ყაზბეგში რთულია სტაბილური და კვალიფიციური თანამშრომლების მოძიება. ბევრს უჭირს მთაში ცხოვრებასთან ადაპტაცია, მიუხედავად იმისა, რომ თანამშრომლებს საცხოვრებლით სრულად უზრუნველვყოფთ და აღნიშნული შეთავაზება მუდმივად ძალაშია.  შედეგად, ხშირად გვიწევს ნაკლებად გამოცდილ კადრებთან მუშაობა, მათი გადამზადება კი დამატებით დროისა და ფინანსურ რესურსს მოითხოვს. ასევე, რთულია მათი ხანგრძლივად შენარჩუნება - სეზონურობა და გადინება პროცესს კიდევ უფრო ართულებს.

• როგორ ფიქრობთ, როგორ შეიძლება აღნიშნული პრობლემა დაიძლიოს? რას სთავაზობს სასტუმრო 1740 ყაზბეგი დასაქმების მსურველებს?

ამ გამოწვევების დაძლევის ერთ-ერთ მნიშვნელოვან გზად მესახება კონკურენტული ანაზღაურების შეთავაზება. თბილისთან შედარებით, რეგიონში კვალიფიციური კადრის მოსაზიდად ანაზღაურება გაცილებით მაღალი უნდა იყოს. მაგალითად, თუ დედაქალაქში დიასახლისის ხელფასი დაახლოებით 1500 ლარია, მთაში კვალიფიციური თანამშრომლის მოზიდვა ხშირად 2000 ლარსა და მეტს საჭიროებს. მცირე ბიზნესისთვის ასეთი ბალანსის შენარჩუნება საკმაოდ რთულია.

ამიტომ ძალიან მნიშვნელოვანია სახელმწიფოს მხარდაჭერა, განსაკუთრებით საშემოსავლო გადასახადებზე შეღავათებისა და რეგიონული დასაქმების  სახით. ადგილობრივი კადრები პრაქტიკულად არ არის, ხოლო რეგიონებიდან თანამშრომლების მოზიდვა დიდ ფინანსურ რესურსს მოითხოვს. სახელმწიფოს დახმარება  გააძლიერებდა მცირე სასტუმროებს და ხელს შეუწყობდა მთის კურორტების განვითარებას.

• ახდენს თუ არა ინფრასტრუქტურული პრობლემები გარკვეულ ზეგავლენას ერთი მხრივ, კადრების და მეორე მხრივ, სტუმრების მოზიდვაზე?

რა თქმა უნდა, პირდაპირ გავლენას ახდენს. ყაზბეგის მიმართ ინტერესი მაღალია, სეზონურადაც არ განვიცდით ვიზიტორების სიმცირეს, თუმცა ვფიქრობ, ინფრასტრუქტურული საკითხები მაინც მოქმედებს, როგორც კადრების მოძიებაზე, ასევე  შიდა ტურიზმზე, ისე უცხოელ სტუმრებზე. მაგალითისთვის, მნიშვნელოვანია მოგვარდეს უსაფრთხო გადაადგილების, ტრანსპორტირების, ტურისტული საგზაო ნიშნებისა და სხვა მსგავსი საკითხები. 

ამასთან, ადგილობრივი ბიზნესის წარმომადგენლებს  მიგვაჩნია, რომ ყაზბეგიდან გერგეთის მიმართულებით არსებული ძველი საბაგიროს აღდგენა და მისი ფუნქციის დაბრუნება განსაკუთრებით მნიშვნელოვანი ნაბიჯი იქნება. ეს ინიციატივა არა მხოლოდ ღირსეულად გააგრძელებს ისტორიულ მემკვიდრეობას, არამედ ახალ ენერგიას შესძენს რეგიონს, მნიშვნელოვნად გაზრდის მის ტურისტულ მიმზიდველობას და სტუმრებისთვის კიდევ უფრო მრავალფეროვან და დასამახსოვრებელ გამოცდილებას შექმნის.

გულწრფელად გვჯერა, რომ საბაგიროს რეაბილიტაცია დადებითად აისახება როგორც ადგილობრივი ბიზნესების განვითარებაზე, ისე მთლიანად რეგიონის ეკონომიკურ და ტურისტულ გაძლიერებაზე.

სასტუმროში ახლაც გვაქვს ვაკანსიები და როგორც აღვნიშნე, დასაქმებულს საცხოვრებელსაც ვთავაზობთ. 

გიზიარებთ რამდენიმე მათგანს: ადმინისტრატორი, მზარეულის დამხმარე, დიასახლისი.