როგორ დავიწყოთ მუშაობა დისტანციურად

14042

10.05.2022 17:30:47

პანდემიამ განაპირობა დისტანციურ სამსახურებზე მზარდი მოთხოვნა. დამსაქმებლებმა შეცვალეს სტრატეგიები სამუშაო ბაზარზე არსებული ცვლილებების დასაკმაყოფილებლად. სამუშაო მოვალეობების შესასრულებლად სპეციფიკურ შესაძლებლობებსა და გამოცდილებასთან ერთად, დისტანციურად დასაქმებულ თანამშრომლებს უნდა ჰქონდეთ დამატებითი უნარები წარმატებული თანამშრომლობისთვის. სტატიაში გაეცნობით საჭირო ინფორმაციას დისტანციურად დასაქმებისთვის:

როგორ ვიპოვოთ დისტანციური სამსახური?

დასაქმების მსურველები აქტიურად ეძებენ სამსახურს სახვადასხვა დასაქმების პლატფორმებზე, სოციალურ ქსელებსა თუ პირად სანაცნობო წრეში. თუმცა დისტანციურად დასაქმება რთულია, რადგან ჯერ კიდევ ახლად დანერგილი პრაქტიკაა. დასაქმების პლატფორმა ss.ge/jobs დისტანციური სამუშაოს მაძიებლებს, კომპანიებსა და საგანმანათლებლო ცენტრებს სთავაზობს განათავსონ განცხადება და იპოვნონ მათთვის საინტერესო დისტანციური შეთავაზება.

როგორც ss.ge/jobs-ის მენეჯერი ანა ჩაჩანიძე გვეუბნება:

“საიტის ფილტრი ითვალისწინებს თანამედროვე მოთხოვნებს. დისტანციური სამსახურის, დისტანციური კადრისა თუ დისტანციური კურსების/ტრენინგების მაძიებლებს საიტზე შეუძლიათ მათთვის საინტერესო განცხადებების ნახვა და განთავსება. დიდი მოთხოვნიდან გამომდინარე საიტზე ფრილანსის განყოფილების შექმნა იგეგმება.”

კონტაქტი და კომუნიკაცია

დისტანციურ სამსახურში დასაქმებისთვის უნდა გამოიყენოთ ყველა თქვენი უპირატესობა. აჩვენეთ ნებისმიერი წინა სამუშაო გამოცდილება, რომელიც მსგავს გარემოში მიიღეთ. თუ წარსულში მუშაობდით ოფისში, მაგრამ თანამშრომლობდით დისტანციურად დასაქმებულ გუნდის სხვა წევრებთან, ამას ხაზი გაუსვით. დამსაქმებელთან კომუნიკაციისას უნდა გქონდეთ ორი მიზანი:

გაზარდოთ თქვენი უპირატესობა სხვა კანდიდატებთან შედარებით.
აჩვენოთ მზადყოფნა, გამოცდილება და დისტანციურ გარემოში კომუნიკაციის უნარი.

დისტანციურად დასაქმების ერთ-ერთი მნიშვნელოვანი წინაპირობა ძლიერი წერილობითი კომუნიკაციის უნარია. არასწორი კომუნიკაცია და შეტყობინებების სიცხადის ნაკლებობა კი კანდიდატს არაპრიორიტულს ხდის.

გასაუბრება

დისტანციურმა სამსახურებმა სამუშაო ადგილის გარდა გასაუბრების პროცესიც შეცვალა. ოფისში მიმდინარე გასაუბრება ჩაანაცვლა ვიდეო ზარმა. ცვლილებებმა გასაუბრების პროცესი უფრო კომპლექტური გახადა. აღნიშნული პროცესი მოითხოვს შედარებით მშვიდი ადგილის პოვნას და ინტერვიუს დაწყებამდე ტექნიკური ხარვეზების მთლიანად აღმოფხვრას. ამისათვის უნდა შეამოწმოთ აღჭურვილობა, აუდიო სისტემის გამართულობა და გაეცნოთ იმ პლატფორმებს, სადაც გაიმართება გასაუბრება.

ინტერვიუ კამერის საშუალებით ქმნის გარკვეულ ბარიერებს ინტერვიუერთან კავშირის დამყარებაში. ამიტომ, უნდა იყოთ პოზიტიურად განწყობილი და მაქსიმალურად ეფექტურად დაუკავშირდეთ დამსაქმებელს. შეინარჩუნეთ თვალის კონტაქტი ისე, როგორც გააკეთებდით არადისტანციურ ასპარეზზე.

თვალყური ადევნეთ თქვენს აპლიკაციებს. როდესაც დამსაქმებელი დაგიკავშირდებათ უნდა გახსოვდეთ კომპანიები და პოზიციები, რომლებსაც მიმართეთ. სამსახურის მაძიებლებისთვის ყველაზე დიდი შეცდომა სატელეფონო გასაუბრებისას დაკონკრეტების თხოვნაა, იმ პოზიციისა თუ კომპანიის შესახებ საიდანაც რეკავენ.

მოთხოვნები

ნებისმიერი კომპანიისათვის ეფექტური თანამშრომლობა პრიორიტეტულია. დისტანციური თანამშრომლობა კი მოითხოვს ონლაინ და ციფრული რესურსების ფართო გამოყენებას. ზოგიერთ პროფესიაში შესაბამისი ტექნოლოგიებით უზრუნველყოფა ძალიან მნიშვნელოვანია, რაც საჭიროების შემთხვევაში დამსაქმებელმა უნდა უზრუნველყოს.

დისტანციური მუშაობისთვის საჭირო უნარები

დისტანციურ მუშაობას მრავალი უპირატესობა აქვს თანამშრომლებისთვის მოქნილობა, დამოუკიდებლობა, გაზრდილი პროდუქტიულობა და გადაადგილების აუცილებლობის ნაკლებობა. მაგრამ დამსაქმებლები ეძებენ უფრო მეტს. მათ სჭირდებათ საიმედო თანამშრომელი, რომელიც საქმეს ყოველგვარი ზეწოლის გარეშე შეასრულებს. ამიტომ პიროვნება, რომელიც ეძებს დისტანციურ სამსახურს უნდა ჰქონდეს:

თვითმენეჯმენტი.

დისტანციური სამსახურის უარყოფითი მხარეა თანამშრომლებთან სწრაფი კომუნიკაციის ნაკლებობა. შესაბამისად, მნიშვნელოვანია ექსტრემალურ სიტყვაციაში დამოუკიდებლად გადაწყვეტილების მიღება. ხოლო სამუშაო განრიგის შედგენა დაგეხმარებათ კონცენტრირებასა და დავალების საჭირო დროის საზღვრებში შესრულებაში.

გუნდურად მუშაობა.

დისტანციურად დასაქმება გულისხმობს სახლში მუშაობას, თუმცა ეს არ ნიშნავს, რომ არ ხართ დიდი გუნდის ნაწილი. კომუნიკაციისა და თანამშრომლობის უნარი აუცილებელია. ეს გულისხმობს თქვენი მოვალეობების კარგად და დროულად შესრულების, ანგარიშვალდებულებას გუნდის სხვა წევრების წინაშე და მათ ინფორმირებას.