10 სასარგებლო რჩევა ავტომობილის მფლობელთათვის

ალბათ, ყველას გეცოდინებათ, რომ ავტომობილი დროთა განმავლობაში ცვდება, რაც უარყოფითად აისახება როგორც მის საბაზრო ღირებულებაზე, ასევე უსაფრთხოების ნორმებზე.

გარდა იმისა, რომ ავტომობილის მართვა უნდა შეგეძლოთ შესაბამის დონეზე, ასევე აუცილებელია, რომ პერიოდულად ისეთ დეტალებს მიაქციოთ  ყურადღება, რომლებიც გარანტი იქნება იმისა,რომ თქვენი ავტოსატრანსპორტო საშუალება გემსახუროთ უფრო დიდხანს და უპრობლემოდ.

გიზიარებთ 10 რჩევას, რაც აუცილებლად ყურადსაღებია ავტმობილის მფლობელთათვის

რჩევა N1: პერიოდულად შეამოწმეთ და შეცვალეთ ჰაერის ფილტრი

ძრავის ჰაერის ფილტრი ერთ-ერთი ყველაზე მარტივად შესაცვლელი,  ავტომობილის იაფი , მაგრამ ამავდროულად ძალიან მნიშვნელოვანი დეტალია.

ძრავს მუშაობისთვის სჭირდება ჰაერის და საწვავის ერთობლიობა, აქედან გამომდინარე, როდესაც ავტომობილი დაქოქილია, ჰაერის ფილტრიც განიცდის ექსპლუატაციას. მოგეხსენებათ, ჰაერი არ არის 100% სუფთა, ამიტომ ფილტრის მოვალეობაა, არ გაატაროს მტვრის და ჭუჭყის ნაწილაკები, რომლებსაც ძრავში მოხვედრის შემთხვევაში შეუძლიათ გამოიწვიონ სერიოზული დაზიანება. დაბინძურებულ ჰაერის ფილტრს ამ წინაღობის შექმნის უნარი აღარ შესწევს, ამასთანავე, ძრავისთვის საკმარისი ჰაერის რაოდენობის გამტარობის უნარსაც კარგავს.

ასე რომ შეამოწმეთ თქვენი ჰაერის ფილტრი და დაბინძურების შემთხვევაში დაუყოვნებლივ შეცვალეთ. ასე თავს აარიდებთ გაცილებით დიდ პრობლემებს, რაც შესაბამისად უფრო დიდ ხარჯებთან არის დაკავშირებული.

რჩევა N2: პერიოდულად შეამოწმეთ და გაწმინდეთ აკუმულატორი

ალბათ, არ ჭირდება დიდი მიხვედრა იმას, რომ აკუმულატორი, რომელიც პასუხისმგებელია ელექტრონული სენსორების, განათების, სტარტერისა და სხვა მნიშვნელოვანი დეტალების მუშაობაზე, უნდა იყოს 100% მწყობრში, რათა თავიდან ავირიდოთ გართულებები!

აუცილებლად შეამოწმეთ აკუმულატორის კონტაქტები, რადგან ხშირია ამ ადგილებში კოროზია, რომელიც აფერხებს ავტომობილის გამართულ მუშაობას.

რჩევა N3: პერიოდულად შეამოწმეთ და დროულად შეცვალეთ ძრავის და კოლოფის ზეთი

ავტომობილის ძრავის, ისევე როგორც გადაცემათა კოლოფის გამართული მუშაობა და გამძლეობა, პირდაპირ კავშირშია ზეთის ხარისხთან. ზეთი პასუხისმგებელია ძრავის და კოლოფის შიდა დეტალების გაპოხვაზე, რაც თავის მხრივ უზრუნველყოფს გამართულ მუშაობასა და გამძლეობას. დროთა განმავლობაში ზეთი კარგავს სათანადოდ გაპოხვის უნარს, რაც შემდგომში იწვევს პრობლემებს,ამიტომ აუცილებელია, რომ პერიოდულად შემოწმდეს მისი მდგომარეობა და დონე, რათა აუცილებლობის (თუ ზეთი შავია ან/და ავტომ გაიარა მწარმოებლის მიერ ზეთის შემდგომი შეცვლისათვის რეკომენდირებული მანძილი) შემთხვევაში დროულად მოხდეს მისი შეცვლა

რჩევა N4: პერიოდულად შეამოწმეთ და შეცვალეთ ავტომობილში არსებული სითხეები

აქ საუბარია ზემოთ ხსენებული ძრავის და კოლოფის ზეთის გარდა სხვა და სხვა სითხეზე მაგ: საჭის ჰიდროგამაძლიერებლის სითხე,  ასევე სამუხრუჭე სითხე, ანტიფრიზი, ფრეონი და ა.შ,რომლებიც ძალიან მნიშვნელოვან როლს თამაშობს ავტომობილის გამართულად მუშაობაში

ამ ჩამონათვალის შემოწმება საკუთარი ძალებით შედარებით რთულია. ამიტომ უმჯობესი იქნება, თუ დახმარებისთვის პროფესიონალს მიმართავთ.

თუ მაინც გადაწყვეტთ, რომ თავად შეგიძლიათ ამ გამოწვევასთან გამკლავება, სათანადო ინფორმაციას მოიძიებთ ავტომობილის მწარმოებლის წიგნაკში.

რჩევა N5: შეცვალეთ მინის მწმენდები

წვიმიან და თოვლიან ამინდში გაუმართავი მინის საწმენდებით შეგეზღუდებათ ხილვადობა, რაც ძალიან სახიფათოა! გარდა ამისა,  გაცვეთილ და დაძველებულ მწმენდს შეუძლია დაგიკაწროთ საქარე მინა, ამ უკანასკნელის შეცვლა კი საკმაოდ სოლიდურ თანხებთანაა დაკავშირებული. ასე, რომ ჯობს თავიდანვე აირიდოთ ეს პრობლემა თავიდან და შეცვალოთ დაზიანებული ან დაძველებული მინის მწმენდი.

რჩევა N6: შეამოწმეთ წნევა საბურავებში

ყველა ავტომობილს გააჩნია რეკომენდირებული საბურავის წნევა, რომელსაც მწარმოებელი ამტკიცებს (ეს ინფორმაცია შეგიძლიათ მოიძიოთ მძღოლის კარის შიდა მხარეს არსებულ სტიკერზე ან ავტომობილის წიგნაკში).

საბურავის არასწორი დაბერვის დონე უარყოფითად მოქმედებს როგორც წვაზე, ასევე სავალ ნაწილზე, ამიტომ რეკომენდირებულია მისი შემოწმება მოხდეს მინიმუმ თვეში ერთხელ.

 ასევე გაითვალისწინეთ, რომ თუ თქვენ მანქანას აქვს სათადარიგო საბურავი, მასაც ჭირდება რამდენიმე თვეში ერთხელ შემოწმება

რჩევა N7: თვლების შეყრა (იგივე „რაზვალი“) 

თუ ავტომობილს სავალ ნაწილში ყველაფერი რიგზე აქვს და საბურავიც კარგი უყენია, წესით და რიგით თვლების შეყრაზეც პრობლემა არ აქვს, მაგრამ აუცილებელია წელიწადში ერთხელ მაინც პროფესიონალს შეამოწმებინოთ სატრანსპორტო საშუალება ამ კომპონენტზე.

თვლების შეყრის არევა შეიძლება გამოიწვიოს სავალი ნაწილის გაცვეთილმა დეტალმა, ავტომობილის მართვისას ორმოში ძლიერად ჩავარდნამ და სხვა ყოველდღიურმა მოვლენამ. არეული თვლებით ავტომობილს ექმნება უფრო მეტი პრობლემა: საბურავების არასწორი ცვეთა, საჭის დაუმორჩილებლობა და ა.შ.

რჩევა N8: პერიოდულად შეამოწმეთ და შეცვალეთ აალების სანთლები

 ყველა ავტომობილს ძრავის კუბატურიდან გამომდინარე, განსხვავებული რაოდენობის აალების სანთელი უყენია, მაგრამ დანიშნულება ყველას ერთი აქვს- დაეხმაროს ძრავს ბენზინის აალებაში.

მწყობრიდან გამოსული აალების სანთლების გამო ავტომობილს ემატება წვა, ძრავა მუშაობს ავარიულ რეჟიმში და დროთა განმავლობაში მივყავართ ფატალურ შედეგამდე, ამიტომ აჯობებს საჭიროების შემთხევაში დროულად შეცვალოთ.

რა თქმა უნდა ყველა ავტომობილზე ინდივიდუალურია, მაგრამ  საშუალოდ 40000 კმ-ში ერთხელ ჭირდება აალების სანთლებს შეცვლა.

რჩევა N9: გარეცხეთ მანქანა ხშირად

სასურველია, ავტომობილი გარეცხოთ 2 კვირაში ერთხელ მაინც, რათა გამორიცხოთ თქვენი ავტომობილის საღებავის დაზიანება მტვრის ნაწილაკებისგან.

რომ შეადაროთ იდენტური წლოვანების ორი მანქანა, ერთი რომელიც სისტემატიურად ირეცხებოდა და მეორე რომელსაც იშვიათად რეცხავდნენ, თვალნათელი იქნება მათში სხვაობა.

რჩევა N10: პერიოდულად შეამოწმეთ სამუხრუჭე ხუნდები

ავტომობილის გამართული სამუხრუჭე სისტემა უსაფრთხოების ნორმების ერთ-ერთი ყველაზე მნიშვნელოვანი ნაწილია. პერიოდულად შეამოწმეთ ხუნდები და სამუხრუჭე დისკები, რათა თავიდან აირიდოთ გამოუვალ სიტუაციაში აღმოჩენა.

ხუნდებმა რომ დიდხანს გაგიძლოთ, შეეცადეთ, თავი აარიდოთ სისტემატიურ მკვეთრ დამუხრუჭებას ( ეს არ ვრცელდება იმ შემთხვევაზე როდესაც მკვეთრი დამუხრუჭებით ავარიას ირიდებთ თავიდან), ასევე ხანგრძლივი სიარულის შემდეგ მოერიდეთ ავტომობილის გარეცხვას ან გუბეში გავლას, რადგან ამ დროს სამუხრუჭე დისკი გახურებულია და მასზე წყლის მისხმა იწვევს დაზიანებას.