როგორ მოვაწყოთ ინტერიერი მოდერნის სტილში

მოდერნი ინტერიერში მეოცე საუკუნის დასაწყისში გაჩნდა და დიზაინერების შთაგონების შეუცვლელი წყარო იყო პოსტმოდერნიზმისა და კონტემპორარის გამოჩენამდე. უკანასკნელი წლების განმავლობაში ვიზუალურ ხელოვნებაში, ასევე, აქტიურად მოიკიდა ფეხი პოსტკონტემპორარიმ რეპრეზენტაციული ფერწერის, ფოტოგრაფიის, ქანდაკებისა და შერეული მედიის ფორმით. შემდეგ ბლოგ-პოსტებში აღნიშნულ მიმდინარეობასაც შევეხებით, თუმცა ახლა მოდერნის გულშემატკივრებს დავეხმაროთ სახლის მოწყობაში.

რა არის მოდერნული დიზაინი

ინტერიერის დიზაინის ამ სტილისთვის დამახასიათებელია ფერების მონოქრომული პალიტრა, მკაფიო ხაზები, მინიმალიზმი, ნატურალური მასალა და მას ასევე უყვარს ოთახის ბუნებრივი განათება. მოდერნი თანამედროვე დიზაინის კონკრეტული მიმდინარეობაა, რომელიც წარმოადგენს ისტორიულ ესთეტიკურ მოძრაობას და სახელწოდების გამო არ უნდა შეგვეშალოს ზოგადად თანამედროვე ხელოვნებაში.

მოდერნის მოკლე ისტორია

მოდერნს ფესვები გადგმული აქვს მოდერნიზმში, ეს მოძრაობა, როგორც უკვე ვთქვით, წინა საუკუნის დასაწყისში ჩაისახა და ხასიათდება აბსტრაქტული აზროვნებით, პრაქტიკულობით და მკაცრი, უბრალო ფორმებით.

გერმანული და სკანდინავიური ფესვები

ჩვენ შეგვიძლია დავაკვირდეთ გერმანული ბაუჰაუსის და სკანდივიური დიზაინის გავლენით როგორ ჩაისახა და ვითარდებოდა მოდერნი. ბაუჰაუსი, ასევე ცნობილია Staatliches Bauhaus-ის სახელით და ის დიზაინის გერმანული სკოლის ნაყოფია, რომელიც  შერწყმულია მეოცე საუკუნის დასაწყისის სხვა მხატვრულ მოძრაობებთან. აქ ვიზუალურ არტში სახვითი ხელოვნება შესანიშნავ სინთეზს ქმნის გამოყენებით ხელოვნებასთან, ხოლო დეკორატიულობა აისახება არქიტექტურაში.  ბაუჰაუსის სკოლის მოდერნული დიზაინის ესთეტიკა აერთიანებს მინიმალიზმსა და ფუნქციონალურობას, რომლისთვისაც ასევე დამხასიათებელია ფორმის გამოხატვის ახლებური მცდელობები.

სიახლეები მოდერნისგან

მოდერნის სტილის სახლის დიზაინი მოდერნის არტისტული საწყისებით საზრდოობს, რომელმაც ვიქტორიანული დიზაინის მაქსიმალისტური ტენდენციები განდევნა და დაამკვიდრა ფილოსოფია - ფორმა ეფუძნება ფუნქციონალურობას. 1920-50-იანი წლების არქიტექტურასა და ინტერიერის დიზაინზე, ასევე დიდი გავლენა იქონია იმ დროისათვის ახალმა ტექნოლოგიებმა, ინდუსტრიალიზაციამ და ისეთ სამშენებლო მასალებზე ადვილმა ხელმისაწვდომობამ, როგორებიც არის ფოლადი და ბეტონი. აღნიშნულის წყალობით, ამ ეპოქაში, წამყვანი სტილი გახდა მკვეთრი ხაზები, იატაკიდან ჭერამდე გაზრდილი ფანჯრები, ღია საცხოვრებელი სივრცეები და გადახურვის ბრტყელი გადაწყვეტა.

მემკვიდრეობის განდევნა

მეორე მსოფლიო ომის დამთავრებისთანავე ახალგხაზრდა არქიტექტორებმა და დიზაინერებმა დაიწყეს მინიმალიზმის მკაცრი ბუნების კრიტიკა. 60-იანი წლებიდან  მინიმალიზმი გზას უთმობს ორნამენტების ხელახალ აღორძინებას და პოსტმოდერნიზმს. მიუხედავად ამისა, მოდერნი უხვად გვხდება მეოცე საუკუნის საკულტო ნაგებობებში, მისი გარკვეული ელემენტები დღემდე რჩება თანამედროვე დიზაინერების შთაგონების წყაროდ და გამოიყენება როგორც სახლის დიზაინში, ასევე არქიტექტურაში.

რა განსაზღვრავს მოდერნის დიზაინს

თუ გსურთ სახლი მოდერნის სტილში მოაწყოთ, გაეცანით რამდენიმე იდეას.

მკაფიო ხაზები. მოდერნული სახლები მკაფიო და სწორი ხაზებით არის დამშვენებული, სადაც მინიმუმადეა დაყვანილი ორნამენტები და ფიგურები.

სახლის მინიმალისტური დეკორი. არსებული სივრცე, მოდერნში, თავისუფალია ზედმეტი ნივთებისგან, უწესრიგობისგან და თვალშისაცემი მოკაზმულობისგან. აქ ფუნქციონალურობა მეფობს.

ნეიტრალური ფერები. მოდერნი თავისი არსით გაურბის მკვეთრ ფერებს და ადგილს უთმობს ფერების მონოქრონულ პალიტრას. ჯობს აირჩიოთ თეთრი, ნაცრისფერი, რძისფერი, შავი და პასტელის ფერები.

ღია დაგეგმარება. სივრცის გამიჯვნისთვის მყარი კედლების ნაცვლად, შეგიძლიათ ავეჯით გადატიხვრის მეთოდი გამოიყენოთ. მაგალითად, მოაწყოთ სამზარეულოს მცირე კუნძული და ამ ხერხით გამიჯნოთ ის სასადილო ოთახისგან, ხოლო მისაღები ოთახის ვიზუალური განცალკევებისთვის, შესაძლებელია გასაშლელი დივნის გამოყენება.

დაბალი და გრძელი ავეჯი. იატაკზე დაბლა განლაგებულ გრძელ ავეჯს შეუძლია თქვენს სახლს მოდერნის იერსახე მისცეს, მითუმეტეს თუ ისინი ბუნებრივი მასალისგან - შეუღებავი ხისგან ან ლითონისგან იქნება დამზადებული. გარდა ამისა, მოდერნისთვის დამახასიათებელია ბეტონის, მინის, ქრომის, ფოლადის მოპირკეთება და ტყავისა თუ ქსოვილის გადასაკრავები.

რა განასხვავებს მოდერნს კონტემპორარისგან

როგორ განვასხვავოთ მოდერნი კონტომპორარისგან? მოდერნის დიზაინი წარმოადგენს კონკრეტული ისტორიული მომენტის ესთეტიკურ სტილს, ხოლო კონტემპორარი არის მუდმივად განვითარებადი. კონტემპორარი არ მოიცავს დიზაინის რომელიმე ერთ ფილოსოფიას, არამედ ის არის ზოგადი ტერმინი, რომელიც მოცემულია დღევანდელი ინტერიერის დიზაინის ტენდენციების აღსაწერად.