რა ღირს დასვენება საქართველოში?

სამუშაო წლის შემდეგ, ზაფხულში დასვენება მნიშვნელოვანია როგორც ფიზიკური, ასევე მენტალური ჯანმრთელობისთვის. გარემოს შეცვლა, ზღვის თუ მთის ჰაერზე ყოფნა, თავისუფალი დროის გატარება ოჯახის წევრებთან ან მეგობრებთან ზუსტად ის ანტისტრესია, რომელსაც მთელი წლის განმავლობაში ველოდებით ხოლმე. თუმცა უნდა გვახსოვდეს, რომ შვებულების დაგეგმვა და დასვენებისთვის სახლის შერჩევა დასვენებამდე ბოლო ეტაპია, რაც ჩვენი ენერგიის და რესურსის დახარჯვას მოითხოვს. ამიტომ ვეცდებით გაგიმარტივოთ აგვისტოში დასვენების დაგეგმვა და მიმოვიხილავთ სად როგორ შეძლებთ დასვენებას.

ზღვისპირა კურორტები

საქართველოში ზღვისპირეთში დასვენება მუდმივად აქტუალურია და აჭარა არასდროს უჩივის ადგილობრივი დამსვენებლებისა და ტურისტების ნაკლებობას. აქტიური დასვენების მოყვარულებისთვის ბათუმი და ქობულეთი ის წერტილებია, სადაც შესაძლებელია გართობა და დასვენება ერთმანეთს შეუთავსოთ, შეარჩიოთ თქვენთვის სასურველი სასტუმროები ან ბინები. სასტუმროში დასვენება უფრო კომფორტულია, განსაკუთრებით თუკი კვებაც შედის და ამაზე ზრუნვა თქვენით არ მოგიწევთ, თუმცა ბინისგან განსხვავებით სასტუმრო სამჯერადი კვებით ან საუზმით, უფრო ძვირი დაგიჯდებათ. ბათუმში ერთოთახიან ბინაში ერთი კვირით (7 ღამე) დასვენება საშუალოდ 700-დან 900 ლარამდე დაგიჯდებათ. საფასური შეიცვლება იმის  მიხედვით, თუ რამდენოთახიანი ბინა გჭირდებათ, რამდენი ხნით და რა სპეციალური მოთხოვნები გაქვთ. ბინის ფასს საკურორტო ზონაში განსაზღვრავს მისი ხედი, მნიშვნელოვან ობიექტებთან სიახლოვე და რაც ყველაზე მნიშვნელოვანია ზღვისპირეთში დასვენებისას - ზღვასთან ახლოს ყოფნა. გარდა ამისა, მნიშვნელოვანი ფაქტორებია ბინაში არსებული ტექნიკა, ავეჯის მდგომარეობა. ბინის საფასურის გარდა, დამსვენებელს ხარჯის გაწევა უწევს როგორც გზისთვის, ასევე ადგილზე კვების ობიექტებისა და გართობისთვის. ბათუმი აჭარაში გამოირჩევა მრავალფეროვანი გასართობი ადგილებით და ყველა გემოვნების დამსვენებლისთვის მორგებული კვების ობიექტებით, თუმცა არც ისე ხელმისაწვდომია ყოველ ჯერზე გარეთ კვება. ამ ხარჯების დასაზოგად გირჩევთ ქსელურ მარკეტებს მიაშუროთ, სადაც ფიქსირებული ფასია ყველა ქალაქში და ლოკაციების მიხედვით არ განსხვავდება პროდუქციის ღირებულება, პროდუქტების ნაწილს სახლში მოიმარაგებთ და გარეთ კვებაზე შედარებით ნაკლები ხარჯი გექნებათ. რაც შეეხება ტრანსპორტირებას, თბილისიდან ყველაზე კომფორტული ტრანსპორტი მატარებელია, რომლის ფასიც ზრდასრული ადამიანისთვის ამ ეტაპზე 35 ლარს შეადგენს, შეღავათები კი დაწესებულია სტუდენტებზე და 10 წლამდე ბავშვებზე. თვითმფრინავით ნატახტარის აეროპორტიდან ბათუმში გაფრენა 120 ლარი ღირს, რომელშიც თბილისიდან ნატახტარამდე ტრანსპორტირებაც შედის. ასევე, შესაძლებელია დანიშნულების ადგილზე სამარშრუტო ტაქსით ან მინივენით მგზავრობა, რომლის საფასურიც მძღოლის მიერ არის დადგენილი ძირითად შემთხვევებში და საშუალოდ 25 ლარს შეადგენს.

ბათუმთან შედარებით ხელმისაწვდომია დასვენება ქობულეთში, აქ 7 ღამის ღირებულება ბინის დაქირავების შემთხვევაში დაახლოებით 600 ლარს შეადგენს და ამ ღირებულებაში შესაძლოა ორ-ოთახიან ბინაში დარჩენაც მოახერხოთ. თუკი მანქანით მოგზაურობას აპირებთ, ქობულეთიდან შეგიძლიათ ბათუმში ვიზიტიც დაგეგმოთ, ხოლო დასარჩენი ქობულეთში გქონდეთ თანხის დაზოგვის მიზნით. ქობულეთიც, მსგავსად ბათუმისა, აქტიური დასვენების მოყვარულების კურორტია, თუმცა შეხვდებით ოჯახებსაც, პატარა ბავშვებთან ერთად. ბავშვებისთვის დასასვენებელ ზღვისპირა კურორტად ითვლება ასევე, ურეკი. შედარებით პასიური დასვენების და იდილიის მოყვარულებს, ან მათ, ვისთვისაც მნიშვნელოვანი მხოლოდ ცურვა და ხედებით სიამოვნების მიღებაა და არა გართობა, ციხისძირში დასვენებას ვურჩევდით, ასევე - გონიოში ან შეკვეთილში.

დასვენება მთაში

საქართველოში გვაქვს ფუფუნება, რომ ავირჩიოთ - ზღვის სანაპიროზე გვირჩევნია ჩვენი შვებულების და არდადეგების გატარება თუ მთაში, რადგან დასასვენებელი კურორტები ორივეში მრავლად გვაქვს. მთის რეკრეაციულ ზონებს შორის ისეთი ლოკაციები სარგებლობს პოპულარობით, სადაც ლამაზი ხედებიც იშლება და ზაფხულის აუტანელი სიცხისგან გაქცევაც შესაძლებელია. ასეთია, მაგალითად სვანეთი, სადაც არაჩვეულებრივი ხედებით დატკბობა, ადგილობრივი კერძების დაგემოვნება და დასვენებაა შესაძლებელი. ბათუმის მსგავსად, მესტიაში წასვლა თვითმფრინავითაც არის შესაძლებელი ნატახტარის აეროპორტიდან, მისი ღირებულება 90 ლარს შეადგენს. ალტერნატივა არის ასევე სამარშრუტო ტაქსები ზუგდიდამდე და შემდეგ კვლავ ზუგდიდიდან სვანეთის მიმართულებით სხვა სამარშრუტოში გადაჯდომა ან თბილისი-ზუგდიდის მატარებლით სარგებლობა და შემდეგ სამარშრუტო ტაქსი. მესტიასა და მესტიასთან ახლომდებარე სოფლებში ძირითადად საოჯახო ტიპის და სტანდარტული სასტუმროები და ქოხებია განთავსებული, სადაც ტურისტსა თუ დამსვენებელს შეუძლია დარჩენა. ფასები იმის მიხედვით მერყეობს, თუ რომელში გადაწყვეტთ დარჩენას. სვანეთი გამორჩეულია ხედებით, რომელიც ყველა მხარეს იშლება, შესაბამისად მნიშვნელობა არ აქვს სად დარჩებით, პანორამა თქვენს თვალწინ უთუოდ გადაიშლება. სასტუმროში განთავსება კომფორტულია, თუმცა საოჯახო სასტუმროზე ძვირი: აგვისტოს თვეში სასტუმროების ღირებულება ერთი ღამე საშუალოდ 120 ლარიდან იწყება. ქოხების ალტერნატივას თუ განიხილავთ, კვების გარეშე ერთ პერსონაზე საშუალოდ 35 ლარია ერთი ღამის გათევა, კვება შეგიძლიათ თავად უზრუნველყოთ ან მასპინძელთან შეათანხმოთ და ამისთვის ცალკე ხარჯები გამოყოთ.

დასავლეთ საქართველოში ასევე პოპულარული მხარეა რაჭა, სადაც პოპულარობით კოტეჯები სარგებლობს. დამსვენებელს რაჭაშიც მრავალფეროვანი სანახაობა ელოდება, შაორის ზურმოხტოვანი ტბა, სიმწვანეში ჩაფლული კურორტები, სამონასტრო კომპლექსები და სხვ. რაჭაში მოხვედრა თბილისიდან ჩვენთვის უკვე ნაცნობი თვითმფრინავითაც არის შესაძლებელი, რომლის ღირებულებაც 50 ლარს შეადგენს ნატახტარის აეროპორტიდან ამბროლაურამდე. კოტეჯების საშუალო ღირებულება კი 1 ღამე 100 ლარიდან იწყება და 250 ლარამდე ადის, ფასი დამოკიდებულია მის მდებარეობასა და სტუმრების რაოდენობას. ასევე რაჭაში ქირავდება აგარაკები, საოჯახო სასტუმროები, რომელთა საფასურიც განსხვავდება დღიურად და თვის მანძილზე ქირაობის შემთხვევებში. ერთ პერსონაზე ერთი ღამის ფასი საშუალოდ 50 ლარიდან იწყება მაგალითად შოვსა და უწერაში.

შედარებით ახლოს დასასვენებელი კურორტებია სურამი, ბორჯომი და ბაკურიანი, სადაც დამსვენებლებს შორის ყველაზე მეტად მცირე ასაკის შვილებიანი ოჯახები გამოირჩევიან. სამივე კურორტზე ხელმისაწვდომია სტანდარტული და საოჯახო ტიპის სასტუმროებიც.  აღნიშნულ კურორტებზე, საოჯახო სასტუმროში ერთი ღამის საფასური ერთ ოთახში დაახლოებით 40 ლარიდან იწყება და ფასი დამოკიდებულია ოთახს აქვს თუ არა დამოუკიდებელი სველი წერტილი, სამზარეულო საზიაროა თუ არა და ა.შ.

მათ, ვისაც თბილისთან ძალიან ახლოს დასვენება აქვს გადაწყვეტილი და საჭიროების შემთხვევაში დედაქალაქს მარტივად და მოკლე დროში დაუბრუნდება, კოჯორს, საბადურების ტყის მიმდებარე კოტეჯებს ან ბაზალეთის ტბის შემოგარენში დასვენებას ვურჩევდით.

შეარჩიეთ თქვენთვის სასურველი კურორტი და აღმოაჩინეთ საქართველო თავიდან. ბინის პოვნაში ss.ge-ს კატეგორია „დაისვენე საქართველოში“ დაგეხმარებათ, გაგვიზიარეთ თქვენი ზაფხულის არჩევანი.