ჭკვიანი სახლი - როგორ მივიღოთ მაქსიმალური კომფორტი ტექნოლოგიების დახმარებით

  „ჭკვიანი სახლი“  ერთერთი უახლესი ტექნოლოგიური მიღწევაა, რომელიც ადამიანებს უმარტივებს საყოფაცხოვრებო საკითხებს, უზოგავს დროსა და ენერგიას, უმცირებს უსაფრთხოების საკითხებთან დაკავშირებულ ნერვიულობას და ცხოვრებას დამღლელი ფაქტორებისგან ათავისუფლებს.

კომფორტული, მშვიდი და უსაფრთხო ცხოვრებისთვის, ჭკვიანი სახლის ფუნქციები რამდენიმე კატეგორიად იყოფა. სახლის „მართვა“ მობილურ ტელეფონში ჩაწერილი შესაბამისი აპლიაკციის დახმარებით, მთელი მსოფლიოს ნებისმიერი წერტილიდან არის შესაძლებელი, მას არ აქვს დისტანციის შეზღუდვა, ნებისმიერ დროს და ნებისმიერი ადგილიდან შეგიძლიათ შეამოწმოთ თქვენი სახლის მდგომარეობა: ხომ არ დაგრჩათ სადმე ანთებული შუქი, ჩართული ტექნიკა, ბუნებრივი აირი, ხომ არ ჟონავს წყალი და ა.შ. როდესაც დილით სამსახურში ვაგვიანებთ და ყველაფრის მოსწრება გვსურს, აღმოვაჩენთ რომ პერანგი, რომლის ჩაცმასაც ვაპირებდით დასაუთოვებელია, სწრაფად ვცდილობთ დაუთოვებას, საუზმეზე ყავისა და ტოსტის მირთმევაც უნდა მოვასწროთ და სახლი დროულად დავტოვოთ, შემდეგ კი გზაში აკვიატებული აზრის გამო რამდენჯერ მივბრუნებულვართ, ხომ არ დაგვრჩა უთო ჩართული, ხომ გავთიშეთ ტოსტერი ან ელექტრო ჩაიდანი და ხომ საგულდაგულოდ დავკეტეთ კარი? ამ შფოთვას სწორედ ჭკვიანი სახლი და მისი აპლიკაცია მოგვაშორებს, რომლის დახმარებითაც ჩვენი სმარტფონებით გავაკონტროლებთ, რომ დენის წყაროდან ყველაფერი გათიშული გვქონდეს და სახლის კარიც ჩვენს არყოფნაში საიმედოდ იყოს ჩაკეტილი.

უსაფრთხოება უპირველეს ყოვლისა

იმისთვის, რომ სახლი და მასში მყოფი ადამიანები დაცულები იყვნენ, უპირველეს ყოვლისა, უსაფრთხოებაა მთავარი. ჭკვიანი სახლის ფუნქციები უსაფრთხოების ნაწილში საკმაოდ დახვეწილია, მისი მეშვეობით შესაძლებელია დავაყენოთ კვამლის და ბუნებრივი აირის სენსორები, რათა არ მოხდეს სახლში CO-ს გაჟონვა, ჰაერში მისი კონცენტრაციის გაზრდისთანავე მობილურ ტელეფონზე მიიღებთ შესაბამის შეტყობინებას და ასევე ჩაირთვება ხმოვანი სიგნალიზაციაც. ასევე, შეგვიძლია ვაკონტროლოთ კარისა და ფანჯრების სენსორები და მოვახდინოთ სახლის მთლიანი მონიტორინგი მსოფლიოს ნებისმიერი წერტილიდან wi-fi კამერის დახმარებით. იმ შემთხვევაშიც კი, თუკი ჩვენს სახლს არასასურველი სტუმარი ეწვევა, შესაძლებელია წინასწარი პარამეტრების მითითებით, მოძრაობის სენსორის გააქტიურებით, აინთოს შუქი იმ ოთახში, სადაც ის გადაადგილდება, ასევე ჩაირთოს ხმოვანი სიგნალიზაცია და მოვიდეს შეტყობინებაც.

კომფორტი

გარდა უსაფრთხოებისთვის მიღებული ზომებისა, მნიშვნელოვანია საკუთარ სახლში მაქსიმალური კომფორტის შექმნა. ჭკვიანი სახლი ამაზეც იზრუნებს, მისი დახმარებით შეგიძლიათ აკონტროლოთ ტემპერატურა და განწყობის ასამაღლებლად ჩართოთ მუსიკა მხოლოდ ერთი მოწყობილობით და ამისთვის არც კონდიციონერის პულტის მოძებნა მოგიწევთ და არც მუსიკის ჩართვა სხვა რომელიმე ღილაკებიანი მოწყობილობიდან. ორივე მოქმედება შეგიძლიათ თქვენივე სმარტფონში განახორციელოთ. თუკი მთელი დღის განმავლობაში გარეთ იმყოფებოდით და სახლისკენ მიემართებით, შეგიძლიათ სახლში არსებული ტემპერატურა წინასწარ განსაზღვროთ და თქვენი მისვლისას ცივ ზამთარში თბილი სახლი დაიხვედროთ, ხოლო ცხელ ზაფხულში - გრილი კედლები. ჭკვიანი სახლის კიდევ ერთი გამორჩეული ფუნქცია ე.წ. „Door Bell” ფუნქციაა, რომლის დახმარებითაც, სტუმრის მოსვლისას ჭუჭრუტანაში გახედვა არ მოგიწევთ და როდესაც ის თვენს კარზე ზარს დარეკავს, ვიდეო ზარის სახით გამოსახულება შემოგივათ როგორც ტელეფონზე, ასევე სახლის დომოფონზე. მისი დახმარებით, სახლში თქვენი არყოფნის შემთხვევაშიც გაიგებთ, თუ ვინ გეწვიათ სტუმრად და შეძლებთ შეატყობინოთ, თუ როდის დაბრუნდებით სახლში, თუ რა თქმა უნდა თქვენთვის სასურველი სტუმარი აღმოჩნდება. კარის გაღებაც დისტანციურ რეჟიმშია შესაძლებელი.

დაზოგე ელექტროენერგია

გარდა უსაფრთხოებისა და კომფორტისა, ჭკვიანი სახლის მეშვეობით შესაძლებელია, რომ ელექტროენერგია დავზოგოთ და მეტად მიზნობრივად გამოვიყენოთ ის, რითაც გარდა იმისა, რომ  ენერგოეფექტურობას გავზრდით, ჩვენს პლანეტასაც გავუფრთხილდებით და ნაკლებად დავაბინძურებთ სინათლით. ასევე, გათბობა-გაგრილების სისტემების სწორად მართვის შემთხვევაში შესაძლებელია კომუნალური გადასახადების დაზოგვა დაახლოებით 40%-ით.

ჭკვიანი სახლი უფრო და უფრო პოპულარული ხდება ადამიანების გადატვირთული გრაფიკის გამო. წვრილმანებისთვის დროის გამონახვა სულ უფრო მეტად რთულდება და თუ ჩვენ მაგივრად ჭკვიანი სახლი შეძლებს, რომ ჩვენი ზედმეტი ძალისხმევის გარეშე გააკეთოს ყველაფერი, რაც კომფორტს შეგვიქმნის - გადაგვიწიოს ფარდები, ჩაგვირთოს განწყობის ასამაღლებელი მუსიკა, სახლში სასურველი ტემპერატურა შეინარჩუნოს და შეგვითბოს საჭმელი, როცა სახლში დაღლილი ვბრუნდებით, რატომაც არა? დროთა განმავლობაში იზრდება ჭკვიანი სახლის ფუნქციებიც და უამრავი ტექნოლოგიური კომპანიაა ჩართული შესაბამისი მოწყობილობების შექმნაში, რაც ადამიანების ცხოვრებას უფრო მარტივს, იაფს, უსაფრთხოსა და კომფორტულს გახდის.