„სად ხედავ საკუთარ თავს 5 წლის შემდეგ?“ - როგორ ავირიდოთ კლიშეები გასაუბრების დროს

“სად ხედავ საკუთარ თავს 5 წლის შემდეგ?“ - ეს ის შეკითხვაა, რომელიც არცერთ კანდიდატს არ უყვარს, რადგან რთულია მას უპასუხო ისეთი კლიშე პასუხების გარეშე, როგორებიცაა „მინდა ვაკეთებდე საქმეს, რომელიც მიყვარს“ ან „არ ვიცი“. ასეა თუ ისე, აღნიშნული შეკითხვა მაინც აქტუალურია ხოლმე გასაუბრებებზე და შესაძლოა მის პასუხზე მნიშვნელოვანწილად იყოს დამოკიდებული კანდიდატის სამსახურში აყვანა. ამ შეკითხვის მიღმა, გამსაუბრებელი შესაძლოა ხვდებოდეს, თუ რამდენად გრძელვადიანი კარიერული ხედვა გაქვთ, რამდენად კარგად იცით რა გსურთ და როგორ განსაზღვრავთ წარმატებას. არსებობს რამდენიმე ასპექტი, რაზე ყურადღების გამახვილებაც რეკრუტერის გულის მოგებაში დაგეხმარებათ, როცა ამ შეკითხვას უპასუხებთ.

იყავით ამბიციური, თუმცა რეალისტი

დამსაქმებელს ყოველთვის იზიდავს ამბიციური თანამშრომელი, მას არასდროს სურს ჰყავდეს კომპანიაში ისეთი ადამიანი, რომელიც აპათიურია თავისი საქმის მიმართ. რეალისტურად მიუდექით თქვენს შესაძლებლობებს და კარიერული ზრდის საკითხს. მაგალითად, თუკი გასაუბრებაზე აღნიშნავთ, რომ გსურთ 3 წელიწადში 20 ადამიანისგან დაკომპლექტებული გუნდი მართოთ, ეს კი კომპანიის კორპორატიული კულტურიდან გამომდინარე 10 წლიანი გეგმის ნაწილია, თქვენი პასუხი საკმაოდ აროგანტულად აღიქმება და თქვენც ცუდად მომზადებულად ჩაითვლებით. თავიდან რომ აიცილოთ არარეალური პასუხის გაცემა, წინასწარ პატარა კვლევა ჩაატარეთ იმ ორგანიზაციის შესახებ, რომელშიც მიდიხართ. გადაამოწმეთ კომპანიის ვებგვერდი და თანამშრომლების ლინკდინის პროფაილები, რათა მიიღოთ ინფორმაცია შიდა ორგანიზაციული კარიერული პროგრესის შესახებ.

ისაუბრეთ მიღწევებსა და პასუხისმგებლობებზე

კანდიდატების მხრიდან ზემოთ ხსენებულ შეკითხვაზე პასუხისას ხშირად დაშვებულ შეცდომათა შორის არის თანხასა და კომპანიის ბენეფიტებზე საუბარიც. მაგალითად, როდესაც კანდიდატი ამბობს, რომ 5 წლის შემდეგ წარმოუდგენია რომ მისი წლიური შემოსავალი შეადგენს X თანხას, ეყოლება პირადი მძღოლი და ექნება დაზღვევის საუკეთესო პაკეტი. ამ პასუხის მოსმენა დამსაქმებლისთვის არც თუ ისე სახარბიელოა, რადგან ჩანს, რომ კანდიდატი მხოლოდ საკუთარ კომფორტზე ფიქრობს და არა კარიერაზე. ამის ნაცვლად, ფოკუსირდით პროფესიულ განვითარებაზე, ისაუბრეთ იმ უნარებზე, რომელიც გინდათ, რომ გამოიმუშავოთ ამ 5 წლის მანძილზე, გამოცდილებებზე, რომელიც დაგეხმარებათ წინსვლაში და პასუხისმგებლობებზე, რომელიც გსურთ, რომ კომპანიაში მუშაობის პერიოდში შეიძინოთ.

იყავით კონკრეტული, თუმცა მოქნილი

დამსაქმებელს სურს იცოდეს, თუ რა გინდათ. კანდიდატის მოძიება, შერჩევა, აყვანა, მისთვის ტრენინგების დაფინანსება და განვითარება კომპანიისთვის ფინანსურად საკმაოდ ძვირი პროცესია, შესაბამისად ჩადებული რესურსის მიმართ კანდიდატის და უკვე თანამშრომლის მხრიდან ლოიალურობას მოელის და თუ ის 6 თვეში კომპანიას დატოვებს, ორგანიზაციისთვის დაკარგული დრო და ფინანსები იქნება. თქვენი სამომავლო გეგმების შესახებ, რა თქმა უნდა, გულწრფელი უნდა იყოთ, თუკი განიხილავთ, რომ თქვენი კარიერული გზა შეცვალოთ და გსურთ სხვა სფეროშიც მოსინჯოთ ძალები, დამსაქმებელს ეს სწორი პერიფრაზით უნდა მიაწოდოთ. მაგალითად, ვიდრე ეტყვით, რომ „3 წელიწადში თუ არ დაწინაურდებით, იმედგაცრუებული იქნებით“, ჯობს სწორად მიაწოდოთ დამსაქმებელს თქვენი სათქმელი და უთხრათ, რომ „ისურვებდით, მომდევნო 3-5 წლის განმავლობაში მეტი პასუხისმგებლობა დაგკისრებოდათ და კომპანიის უფრო მაღალ რგოლებთან აქტიურ შეხებაში გემუშავათ“. პირველი პასუხის შემთხვევაში, დამსაქმებელი ჩათვლის, რომ თუკი თქვენს ამბიციას ვერ შეასრულებს, სახეზე ეყოლება თანამშრომელი დაბალი სამუშაო კმაყოფილებით, ხოლო მეორე პასუხის შემთხვევაში, თქვენი მხრიდან მეტად დამთმობ ხასიათს თუმცა კარიერული ზრდის სურვილს დაინახავს.      

ისაუბრეთ თქვენს პროფესიულ და არა პირად ამბიციებზე

თუკი პოტენციური დამსაქმებელი თქვენს პირად გეგმებზე არ გისვამთ კითხვას, ყველაზე იოლი გამოსავალია, რომ თქვენით არ დაიწყოთ მასზე საუბარი. იმაზე საუბარი, რომ გსურთ თქვენი ოცნების ქვეყანას ესტუმროთ, სპორტულ წარმატებებს მიაღწიოთ ან ოჯახი შექმნათ, დამსაქმებლისთვის მეორეხარისხოვანია. მას აინტერესებს თქვენი კარიერული ამბიციები და მიზნები. შესაბამისად, კითხვაზე თუ სად იქნებით 5 წლის შემდეგ, თუკი უპასუხებთ რომ იქნებით დაოჯახებული და შვილებთან ერთად იაპონიაში იმოგზაურებთ, ეს პასუხი გასაუბრებისთვის ცუდად მომზადებულად წარმოგაჩენთ.

ხაზი გაუსვით, რა სარგებლობის მოტანას შეძლებთ ორგანიზაციისთვის

ერთი შეხედვით „5 წლიანი“ კითხვა თქვენი ამბიციებისა და სურვილების გამოცდაა, თუმცა გასაუბრების დროს ეს შანსი არ უნდა გაუშვათ და აუცილებლად უნდა აღნიშნოთ, თუ რისი გაკეთება შეგიძლიათ ორგანიზაციისთვის თქვენ, ეს შესაძლოა ინტერვიუს ერთგვარი შეჯამება იყოს, სადაც იტყვით, თუ რამდენად მნიშვნელოვანია თქვენთვის, თქვენი წვლილი შეიტანოთ კომპანიის კარგი რეპუტაციის შენარჩუნებაში, მოუტანოთ მას სარგებელი, ზრდა და წარმატება.