პრაქტიკული აკადემია - აქ მეტი შესაძლებლობაა

პალიტრას პრაქტიკული აკადემია სასწავლო დაწესებულებაა, რომლის მიზანსაც განათლების ხელშეწყობა, ბიზნეს უნარების გამომუშავებაზე ზრუნვა და თეორიულ და პრაქტიკულ ცოდნაზე დაყრდნობით, სხვადასხვა სფეროში მაღალკვალიფიციური პერსონალის ჩამოყალიბება წარმოადგენს. პრაქტიკული აკადემია საქართველოს ბაზარზე 2014 წლიდან ოპერირებს და დაინტერესებულ პირებს სთავაზობს როგორც მოკლევადიან კურსებს, ისე პრაქტიკულ სწავლებასა და კორპორატიულ ტრენინგებს. აკადემიის კურსდამთავრებულებს კი პარტნიორ კომპანიებში დასაქმების და მეტი პრაქტიკული გამოცდილების დაგროვების შესაძლებლობა ეძლევათ. სექტემბრიდან პრაქტიკული აკადემია განახლებულ კურსებს შესთავაზებს მსურველებს, აკადემიის გეგმებისა და შემოთავაზებული კურსების შესახებ ss.ge -ს წარმომადგენელი პრაქტიკული აკადემიის დირექტორს - თეონა კუპატაძეს ესაუბრა.

-მოგვიყევით, პრაქტიკული აკადემიის გეგმების შესახებ, რა მიმართულებით სთავაზობს განვითარებას აკადემია დაინტერესებულ პირებს?

-პრაქტიკული აკადემია გთავაზობთ გრძელვადიან და მოკლევადიან ტრენინგ-პროგრამებს. ჩვენი მულტიმედია ჟურნალისტიკის პროგრამის დახმარებით, შეგიძლიათ იპოვოთ საკუთარი ადგილი მედიის სფეროში. მენტორის დახმარებით, ყველა შესაძლო პრატფორმა მოსინჯოთ, მიიღოთ გამოცდილება და შეძლოთ საკუთარი შესაძლებლობების რეალიზება.

ჩვენი ტრენინგები გამოირჩევა სამუშაო ადგილზე დაფუძნებული სწავლებით, მაქსიმალურად პრაქტიკულია და გამოცდილების მიღებაზეა ორიენტირებული. პროგრამის მონაწილეებს მასტერკლასებს უტარებენ და პრაქტიკის მანძილზე ეხმარებიან მენტორები/პროფესიონალები, რომლებსაც სფეროში მრავალწლიანი გამოცდილება აქვთ.

აკადემია ასევე გთავაზობთ ბიზნეს ტრენინგებს, რომელიც განკუთვნილია როგორც მენეჯერებისთვის, ასევე არამენეჯერული პოზიციებისთვის. ტრენინგები მოკლევადიანია და კონკრეტული უნარის განვითარებაზეა ორიენტირებული, მაგალითად უკუკავშირის გაცემა, მოლაპარაკების წარმოება, ბიზნეს კომუნიკაცია და ა.შ.

-რა პროგრამები გაქვთ დამწყებებისთვის და რა - შუა და მაღალი რგოლის მენეჯერებისთვის?

-გრძელვადიანი პროგრამები დამწყები პირებისთვისაა, ისინი მყარი (Hard) უნარების განვითარებაზეა ორიენტირებული, ეს პროგრამებია: მულტიმედია ჟურნალისტიკის პროგრამა, გაყიდვების მენეჯერების ტრენინგი და ა.შ.

მოკლევადიანი ტრენინგების მიზანი კი რბილი (soft) უნარების განვითარებაა, იმ უნარების რომელიც ყოველდღიურ საქმიანობაში, ბიზნეს პროცესების ეფექტურად წარმართვაში დაგეხმარებათ მაგალითად, უკუკავშირის ტრენინგი, ბიზნეს კომუნიკაცია და ა.შ.

-როგორია აკადემიის კურსდამთავრებულთა დასაქმების მაჩვენებელი პარტნიორ კომპანიებში?

-აკადემიის გრძელვადიანი პროგრამების მნიშვნელოვანი კომპონენტია დასაქმება, ჩვენი კურსდამთავრებულების 70 % დასაქმებულია პალიტრა ჰოლდინგის შვილობილ კომპანიებში და არამარტო. ხოლო იმ კანდიდატებისთვის, ვინც პირველ ეტაპზე ვერ დავასაქმეთ, შექმნილია  ფეისბუქ ჯგუფი, სადაც მათ მედიის სფეროში არსებულ  ვაკანსიებთან დაკავშირებით ინფორმაციის მიღების ექსკლუზივი აქვთ.

პრაქტიკული აკადემია სექტემბრიდან მულტიმედია ჟურნალისტიკის კურსზე ახალ ნაკადს მიიღებს და 15 სტუდენტს შესაძლებლობა ექნება 2 თვის განმავლობაში პროფესიონალებისგან მიიღოს თანამედროვე მულტიმედია ჟურნალისტად ჩამოყალიბებისთვის საჭირო თეორიული და პრაქტიკული ცოდნა.