როგორ გავყიდოთ ბინა მის საბაზრო ღირებულებაზე მეტად?

უძრავი ქონების გაყიდვისას, მისი ღირებულების შეფასება ყველაზე კრიტიკული ეტაპია, რადგან ბინის ფასი დამოკიდებულია ბევრ ფაქტორზე. ამავდროულად, მეპატრონეს სურს, რომ ქონების გაყიდვის შედეგად მოგება მიიღოს, თუმცა გასაყიდი ფასის ადეკვატურობა შეინარჩუნოს. იმისთვის, რომ საბაზრო ღირებულებაზე მეტად შეაფასოთ თქვენი ბინა, სასურველია მისი შეფასების კრიტერიუმები რამდენიმე ნაწილად დაყოთ.

1.    დაადგინეთ თქვენი უძრავი ქონების საბაზრო ღირებულება

თავდაპირველად, ბინის შეფასებაში უძრავი ქონების საიტზე - ss.ge-ზე განთავსებული კალკულატორი დაიხმარეთ, რაც თქვენ მიერ შევსებული მონაცემების მიხედვით მსგავსი ბინების და ახლოს მდებარე უძრავი ქონების საშუალო ფასის მიხედვით შემოგთავაზებთ მიახლოებით ღირებულებას. ასევე, შეგიძლიათ დაუკავშირდეთ პროფესიონალს, რომელიც შეფასებაში და საბაზრო ღირებულების დადგენაში დაგეხმარებათ და ღირებულებას დაგიდასტურებთ. რაც შეეხება უშუალოდ სახლის ან გასაყიდი ფართის ვიზუალურ მხარეს, ეს ყველაზე მნიშვნელოვანი ნაწილია პოტენციური მყიდველისთვის, რადგან პირველ შთაბეჭდილებას სწორედ სახლის ვიზუალური მდგომარეობა და ატმოსფერო ქმნის.

2.    მოაწესრიგეთ ბინის ვიზუალური მხარე

ვიზუალურ მხარეზე ზრუნვისას გაითვალისწინეთ, რომ სახლს ჰქონდეს სუფთა და თბილი იერსახე, მიუხედავად იმისა, რომ შესაძლოა ბინას ავეჯის გარეშე ყიდდეთ, თქვენი ავეჯი და ნივთები გემოვნებიანად გადაანაწილეთ სივრცეში, რათა აღქმისა და სამომავლოდ ბინის მოწყობისთვის მარტივად მოახდინოს ვიზუალიზაცია მყიდველმა და შეძლოს წარმოიდგინოს, თუ როგორ შეიძლება მოაწყოს ბინა. აუცილებლად შეინარჩუნეთ სისუფთავე ბინაში და საჭიროების შემთხვევაში, მარტივი კოსმეტიკური რემონტიც გააკეთეთ მოვლილი იერსახის შესანარჩუნებლად. ასევე მნიშვნელოვანი ფაქტორია, რომ სახლში შეინარჩუნოთ სასიამოვნო სურნელი, მუდმივად გაანიავეთ ოთახები და გამოიყენეთ სახლის არომატული ჩხირები ან ჰაერის ავტომატური აეროზოლები, თუმცა არა ძალიან მძაფრი, არამედ ნეიტრალური სურნელის მქონე. შექმენით იმდენად მყუდრო და კომფორტული გარემო, რომ პოტენციურმა მყიდველმა სახლში შემოსვლისთანავე შინ იგრძნოს თავი, სხვა სახლებთან შედარებით უპირატესობა მიანიჭოს თქვენს უძრავ ქონებას, იგრძნოს მასში სიმყუდროვის განცდა და მომავალი ცხოვრების მასში გატარების სურვილი გაუჩნდეს.

3.    შეაფასეთ ნივთების ღირებულება

გარდა მყუდრო ატმოსფეროს შექმნისა, ისეთ შემთხვევაში, თუკი თქვენს ბინას ავეჯიანად ყიდით, შეაფასეთ თითოეული მათგანი ცალ-ცალკე, მისი მდგომარეობისა და ხარისხის გათვალისწინებით. მნიშვნელოვანია, რომ გარდა გარეგნული მახასიათებლებისა, სახლში კომფორტს ტექნიკა და ავეჯიც ქმნიდეს. თუ მაგალითად თქვენს უძრავ ქონებას ყიდით ჩაშენებული სამზარეულოთი და ტექნიკით, ეს ბევრად დაზოგავს მყიდველის რესურსს, როგორც დროის თვალსაზრისით - ვიდრე შეარჩევს სასურველ ტექნიკას, ასევე ფინანსურად - არ მოუწევს ყველაფრის შეკვეთა/ყიდვა და სახლში მოტანის საფასურის გადახდა, ყველაფერი ადგილზე დახვდება. ასეთ შემთხვევაში, ბინის ჯამური ფასი, რა თქმა უნდა, გაიზრდება, მაგრამ არც იმდენად, რომ მყიდველს ერთნაირი თანხის გადახდა დასჭირდეს ტექნიკიან ბინასა თუ ცარიელ ბინაში, სადაც ახალ ტექნიკას შეიტანს. ამ ასპექტში მნიშვნელოვანია ფასის ზომიერად და ადეკვატურად გაზრდა, ვინაიდან გასათვალისწინებელია, რომ მიუხედავად იმისა, რომ სრულად აღჭურვილ ბინას ყიდით, აღჭურვილობა მაინც მეორადია და მისი ცვეთაც უნდა გაითვალისწინოთ.

4.    გააკეთეთ ბინის ეფექტური პრეზენტაცია

კიდევ ერთი მნიშვნელოვანი ფაქტორი გასაყიდი ბინის პრეზენტაციაა. როგორ მიაწოდებთ მას პოტენციურ მყიდველს, რა მახასიათებლებს გამოყოფთ, რაც სხვა ბინებისგან გამოარჩევს თქვენს ბინას, სასურველია, თუკი ახალი რემონტის შემთხვევაში მიუთითებთ რამდენი ხნის გარემონტებული ბინაა, დაარეკლამებთ თქვენს განცხადებას და გაზრდით მისი ნახვების ალბათობას. განცხადების ტექსტში გამოხატეთ კეთილგანწყობა დაინტერესებული პირების მიმართ, განათავსეთ ხარისხიანი ფოტოები და წარმოაჩინეთ თქვენი ბინა საუკეთესო კუთხით. ჩამოთვალეთ ახლოს მდებარე სტრატეგიული ობიექტები იმის ხაზგასასმელად, რომ თქვენი ბინა ტერიტორიულადაც კომფორტულ ადგილზეა, მაგალითად მაღაზიები, აფთიაქები, მეტრო, საავადმყოფო, რეკრეაციული ზონები... ეს ჩამონათვალი გამოგადგებათ, რომ თქვენი ბინის ღირებულება შესაბამისად შეაფასოთ.

დაბოლოს, გამოიჩინეთ მოთმინება და ნუ იჩქარებთ ფასის დაკლებას განცხადებაზე. თუკი თქვენი უძრავი ქონების შესახებ გამოქვეყნებულ განცხადებაზე თავდაპირველ ეტაპზე გამოხმაურება ნაკლებია, ნუ დასწევთ ფასს ძალიან მალე, შესაძლოა პოტენციური მყიდველი არ გამოგეხმაუროთ იმ იმედით, რომ ერთხელ დაკლებულს კიდევ დააკლებთ. ამის მაგივრად, დაარეკლამეთ თქვენი განცხადება და შეფუთეთ ის შესაფერისი ტექსტით, დააინტერესეთ მყიდველი, რატომ ღირს ის სხვა მსგავს ბინებზე ძვირი და მას შემდეგ, რაც გახსნის თქვენს განცხადებას, მაქსიმალურად წარმოაჩინეთ თქვენი ბინის უპირატესობები.

უძრავი ქონების გაყიდვაში SS.GE-ს ფასიანი სერვისებიც დაგეხმარებათ, რომელთაგან თქვენთვის სასურველის შერჩევა აქ შეგიძლიათ.