როგორ მოვამზადოთ ბინა გასაქირავებლად?

ბინის გაქირავება ზოგიერთი ადამიანისთვის შემოსავლის წყაროა. გასათვალისწინებელია, რომ გარდა შემოსავლისა, ბინის მეპატრონეს რიგ შემთხვევებში სოლიდური ხარჯის გაღებაც უწევს ბინის მოსაწესრიგებლად და გასაახლებლად. რა ფაქტორები უნდა გავითვალისწინოთ, სანამ ბინას გავაქირავებთ და როგორ მოვამზადოთ ბინა, რომ პოტენციურ კლიენტს დავახვედროთ, რჩევების სახით ამ სტატიაში გაგაცნობთ.

პირველ რიგში, მოაწესრიგეთ ბინის ვიზუალური მხარე, შემოსასვლელი სივრცე იმდენად მნიშვნელოვანია, რამდენადაც ადამიანის პირველი შთაბეჭდილება სწორედ ამ სივრციდან იწყება. განსაკუთრებული ყურადღება მიაქციეთ, რომ სახლში სასიამოვნო სურნელი იყოს, გამოიყენეთ ჰაერის არომატიზატორები ან მოათავსეთ ბუნებრივი ყვავილები ლარნაკში, ეს სახლში სასიამოვნო სურნელსაც დაატრიალებს და სიმყუდროვის შეგრძნებასაც შექმნის. გაანიავეთ ხშირად, მოაწყვეთ ორპირი, რომ სუფთა ჰაერი ტრიალებდეს ბინაში. მიაქციეთ ყურადღება, რომ ბინაში არ იყოს მტვრიანი ზედაპირები და პოტენციურ კლიენტში მოუვლელი ბინის ასოციაცია არ გამოიწვიოს. გააკეთეთ კოსმეტიკური რემონტი, რომელიც არ ღირს ძვირი, მაგრამ ბინაში სისუფთავის შეგრძნებას ინარჩუნებს და აახლებს მას. გამოიყენეთ ნეიტრალური, ღია ფერები, რაც დაგეხმარებათ იმაში, რომ მეტი სივრცე გამოაჩინოთ და ასევე კომფორტული გარემო შექმნათ. ეცადეთ, რომ კონკრეტული სტილის დიზაინიც აირიდოთ თავიდან და მაქსიმალურად ნეიტრალურად დატოვოთ ბინა, რათა ყველა გემოვნების დამქირავებელს მისცეთ შანსი, რომ სათავისოდ მოირგოს თქვენი უძრავი ქონება.

თუ პატარა ბინა გაქვთ, სარკეები დაგეხმარებათ სივრცის გაზრდაში, მათი დახმარებით უფრო დიდად აღიქმება გარემო და სივიწროვის განცდას არ გამოიწვევს ადამიანში. ასევე გასათვალისწინებელია, რომ ზედმეტი ნივთები არ დატოვოთ ავეჯის ზედაპირებზე- არც მისაღებ ოთახში და არც სამზარეულოში, ბინა ასე უფრო კეთილმოწყობილი გამოჩნდება.  სწორად შეარჩიეთ განათება, თუკი არ გაქვთ ბინაში საკმარისი ბუნებრივი სინათლე, ნათურების დახმარებით შესაძლებელია, რომ სახლში არსებული მცირე ნაკლი ისე დაიფაროს, რომ შეუმჩნეველიც კი გახდეს.

ყურადღება მიაქციეთ ბინის ისეთ მხარეებს, რომლებიც რთულად გამოსაცვლელი და ძვირია. ასეთია ელექტრო გაყვანილობა და სანტექნიკა. ყოველი მობინადრის შეცვლის წინ შეამოწმეთ ბუნებრივი აირი და ბინაში უსაფრთხოების ზომები მიიღეთ, მაგალითად დააყენეთ დეტექტორი, რომელიც ბუნებრივი აირის გაჟონვის შემთხვევაში გამაფრთხილებელ სიგნალს მოგცემთ. მწყობრში მოიყვანეთ სველი წერტილები, გადაამოწმეთ რომ არ ჟონავდეს წყალი მილებიდან ან ონკანებიდან და გადაამოწმეთ ბინა, რომ არ იყოს ნესტიანი ადგილები რადგან ნესტის სოკოს გარდა ბინის ვიზუალის გაფუჭებისა, ჯანმრთელობის პრობლემების შექმნაც შეუძლია.

გაქირავებამდე გადაწყვიტეთ ბინას ავეჯით აქირავებთ თუ ავეჯის გარეშე. ცარიელ ბინაში დამქირავებელს შეუძლია თავისი გემოვნებით განალაგოს ავეჯი და ტექნიკა და სრულად მოირგოს საკუთარ საჭიროებებზე, თუმცა ხშირ შემთხვევაში, ბინები საბაზისო საჭიროების ავეჯთან ერთად ქირავდება. ეცადეთ, რომ გასაქირავებელ ბინაში ე.წ. „თავიდან მოსაშორებელი“ ან დაზიანებული ავეჯი არ შეიტანოთ. აგრძნობინეთ პოტენციურ კლიენტს, რომ მზრუნველი მეპატრონე ხართ და მის კომფორტსა და უსაფრთხოებაზე ზრუნავთ და ღელავთ. შეარჩიეთ გამძლე და ამავდროულად დახვეწილი ავეჯი, რადგან ის არაერთი ახალ დროებითი  პატრონის ხელში გაივლის და გამძლეობა ნამდვილად საჭირო მახასიათებელი იქნება.

იმისთვის, რომ ბინის დაქირავებით დაინტერესებული პირი ბინის სანახავად მოვიდეს, თავდაპირველად თქვენს ბინას განცხადების ტექსტითა და ტექსტზე თან დართული ფოტოების მიხედვით შეარჩევს. ამიტომ მნიშვნელოვანია, თუ როგორ ფოტოებს განათავსებთ განცხადებასთან ერთად. თვენი უძრავი ქონების განცხადების სწორად დადებისთვის რჩევებს ჩვენს წინა სტატიაში ნახავთ, ხოლო განცხადების განთავსებისთვის შეგიძლიათ ss.ge-ს პლატფორმა გამოიყენოთ.