რის მიხედვით შევარჩიოთ საოფისე ფართი თბილისში

საოფისე საქმიანობისთვის ერთერთი მნიშვნელოვანი ასპექტი კომერციული ფართის ქონაა, რომელიც მორგებული იქნება თქვენი ბიზნესის საქმიანობაზე და შეგიქმნით კომფორტულ გარემოს როგორც თანამშრომლებისთვის, ასევე ბიზნეს შეხვედრებისთვის. თქვენი საქმიანობის სპეციფიკიდან გამომდინარე, სასურველია შეარჩიოთ მაქსიმალურად მასზე მორგებული ოფისი.

პირველ რიგში, განსაზღვრეთ ის სამიზნე ჯგუფი, ვისთვისაც იარსებებს ოფისის საჭიროება, თუკი თქვენი ბიზნესი ან საქმიანობა მოიცავს კლიენტებთან ურთიერთობას, აუცილებლად გასათვალისწინებელია მისი მდებარეობა. ასეთ შემთხვევაში, კომერციული ფართი უნდა იყოს ადვილად მისაგნებ და ადვილად მისადგომ ადგილზე, სასურველია ქალაქის ცენტრალურ უბნებში, სადაც ტრანსპორტითაც და ავტომანქანითაც მარტივად განახორციელებს ვიზიტს დაინტერესებული პირი. თუკი ოფისის დაქირავება მხოლოდ იმისთვის გჭირდებათ, რომ თანამშრომლებმა საერთო სივრცეში იმუშაონ და თქვენი საქმიანობა დისტანციურ მომსახურებას ან კლიენტებთან/პარტნიორებთან არაპირდაპირ ურთიერთობას ითვალისწინებს ვიზიტების გარეშე, შეგიძლიათ ფართი შეარჩიოთ არა ცენტრალურ ქუჩაზე, არამედ შედარებით მოშორებით, არახალხმრავალ ტერიტორიაზე, რაც ფინანსებსაც დაგიზოგავთ.

რაც შეეხება ფინანსურ საკითხს, კომერციული ფართების საფასური განსხვავდება მისი მდებარეობის, სიდიდისა და რემონტის მიხედვით. მისი შერჩევა დაკვირვებით უნდა მოხდეს, რათა ნაქირავებ ფართში გქონდეთ ყველა ის დეტალი, რაც თქვენს საჭიროებებს მოერგება: საკონფერენციო ოთახი საჭიროების შემთხვევაში, რომელიც უნდა იყოს დიდი და ნათელი, აუცილებლად ჰქონდეს ფანჯრები, რათა ხალხმრავლობის შემთხვევაში მარტივად იყოს შესაძლებელი მისი განიავება; მცირე შეხვედრების ოთახი საქმიანი ზარების ან ერთი ერთზე შეხვედრებისთვის; საერთო სამუშაო სივრცე, სამზარეულო და სველი წერტილი. ფართის კვადრატულის ფასი საცხოვრებელი ბინის მსგავსად განსხვავდება მისი მდგომარეობისა და მდებარეობის მიხედვით. თუკი თქვენი საქმიანობა, როგორც აღვნიშნეთ, კლიენტებზე ორიენტირებულია, მნიშვნელოვანი ასპექტია მისი ფასადი, რომელიც აუცილებლად ქუჩის მხარეს უნდა იყოს თუკი მაგალითად საცხოვრებელი კორპუსის პირველ სართულზეა. უმჯობესია, თუკი შესასვლელი ექნება პირდაპირ შენობის ფასადის მხრიდან და არა სადარბაზოდან, რათა კარგად გამოჩნდეს თქვენი კომპანიის დასახელება და ლოგო, მიიქციოს ვიზიტორების ყურადღება. განსხვავდება ასევე ფართები, რომელიც ფიზიკური პირისგან ქირავდება და ფართები, რომლებიც ბიზნესცენტრებშია განთავსებული. ბიზნესცენტრებს შესაძლოა ჰქონდეთ ფიქსირებული ფასები კონკრეტული ფართებისთვის, ხოლო ფიზიკურ პირთან შესაძლებელია მოლაპარაკების წარმოება. თუკი მაგალითად სასწავლო დაწესებულებისთვის გჭირდებათ ფართის დაქირავება, დაგჭირდებათ იზოლირებული ოთახები, სადაც მოსწავლეების ჯგუფების მიღება კომფორტულად იქნება შესაძლებელი.

საოფისე ფართის დაქირავებამდე ასევე კარგად უნდა გქონდეთ დაგეგმილი ავეჯის განლაგება, ცარიელ კედლებს ავეჯი იმდენად ამდიდრებს, რომ სრულიად შეიძლება შეუცვალოს იერსახე და გარემოს ისეთი ვიზუალი შეუქმნას, რაც თქვენი საქმიანობის სფეროს მიხედვით იდენტობას შესძენს სივრცეს, მაგალითად, გარდა აუცილებელი ავეჯისა, გამოიყენეთ თემატური, კორპორატიული აქსესუარები და თქვენი კომპანიის შესაბამისი ფერები. სასურველი კომერციული ფართი კი შეგიძლიათ ss.ge-ს უძრავი ქონების კატეგორიაში შეარჩიოთ შესაბამისი ფილტრების მითითებით.