რა უნარებია საჭირო იმისთვის, რომ ბუღალტერი იყო

პროფესიაში წარმატებას გამოცდილების დაგროვებასთან ერთად ცოდნა და უნარები მნიშვნელოვანწილად განსაზღვრავს. იმისთვის, რომ ამა თუ იმ დარგში პროფესიონალად ჩამოყალიბდეთ, შესაბამის უნარებს უნდა ფლობდეთ და გარკვეულწილად თქვენი მოწოდებაც უნდა იყოს ამ საქმიანობის კეთება. ერთი სიტყვით, თავს ისე უნდა გრძნობდეთ, როგორც თევზი წყალში.

ბევრ პროფესიაში გარდა დაგროვებული ცოდნისა, ხასიათიც გადამწყვეტია ხოლმე, მაგალითად ვერ იქნები კარგი მასწავლებელი, თუ ბავშვები არ გიყვარს და სხვაზე ზრუნვა არ გსიამოვნებს. თუ კარგი პრეზენტაციის უნარი არ გაქვს და საუბარი არ გიზიდავს, მაშინ გაყიდვების სფეროში ვერ იქნები წარმატებული და ა.შ. ss.ge-ს დასაქმების კატეგორიაში გვექნება ახალი რუბრიკა, რომლის ფარგლებშიც ყოველთვიურად განვიხილავთ სხვადასხვა პროფესიებს და გირჩევთ, თუ რა უნარებია საჭირო იმისთვის, რომ მასში წარმატებას მიაღწიოთ და პროფესიონალად ჩამოყალიბდეთ. ამ თვის პროფესიად კი ბუღალტერი შევარჩიეთ, რომელიც ძალიან საპასუხისმგებლო საქმეს ასრულებს და გარდა იმისა, რომ თავისი საქმის მცოდნე და ყურადღებიანი უნდა იყოს, ბუღალტრად აუცილებლად სანდო ადამიანი უნდა შეარჩიოთ, რადგან მის ხელში იქნება თქვენი კომპანიის ფინანსების მართვა.

ბუღალტერი კომპანიაში ერთერთი ძალიან მნიშვნელოვანი ფიგურაა, თანამშრომლებისთვის ის ხელფასების გაცემასთან ასოცირდება, თუმცა გარდა იმისა, რომ ის თანამშრომელთა მობილურებზე „ჯადოსნური მესიჯის“ შემოქმედია, რომელიც ხელფასის ჩარიცხვას გვამცნობს ხოლმე, ბუღალტერს ევალება ძალიან ბევრი წვრილმანი და მნიშვნელოვანი გადარიცხვების შესრულება, რათა კომპანიამ სრულფასოვნად და კანონის ფარგლებში განაგრძოს ფუნქციონირება. ბუღალტერი ახორციელებს ანგარიშგებას როგორც კომპანიის მფლობელებთან და ინვესტორებთან, ასევე სახელმწიფოსთან დეკლარაციების სახით.

ბუღალტრად მუშაობა ნამდვილად არ არის მრავალფეროვანი, შესაძლოა რუტინულ საქმიანობადაც განვიხილოთ, რადგან მუდმივად ციფრებში ტრიალებს და მისი ძირითადი მოვალეობები ანგარიშს უკავშირდება. სწორედ ამიტომ, კარგი ბუღალტერი რომ იყოთ, უნდა გიყვარდეთ პირველ რიგში ციფრები და ანგარიში, იყოთ დეტალებზე ორიენტირებული, ყურადღებიანი, გქონდეთ რისკების შეფასების კარგი უნარი და სხარტი, ლოგიკური აზროვნება. ანგარიშის დროს დაშვებული პატარა, ერთი შეხედვით უმნიშვნელო შეცდომა შესაძლოა გადამწყვეტიც კი აღმოჩნდეს და სერიოზული პრობლემები გამოიწვიოს. სწორედ ამიტომ, ბუღალტრებისთვის მნიშვნელოვანია „ასჯერ გაზომე, ერთხელ გაჭერი“ პრინციპით მუშაობის სტილი. როგორც აღვნიშნეთ, გარდა იმისა, რომ ბუღალტერს უნდა ჰქონდეს შესაბამისი საბაზისო განათლება, ის მუდმივად უნდა ზრუნავდეს თავისი სტანდარტების ამაღლებასა და თვითგანვითარებაზე. არსებობს სხვადასხვა სტანდარტები, რომელიც მოითხოვება ამა თუ იმ სამუშაო სექტორში, მაგალითად ფინანსურ სექტორში დასაქმებისთვის სხვა სტანდარტების ცოდნაა საჭირო, არასამთავრობო ან საჯარო სექტორში სამუშაოდ კი - განსხვავებული.  ეს დამოკიდებულია იმაზე, თუ რა ტიპის ორგანიზაციაშია დასაქმებული ბუღალტერი და შესაბამისად სახელმწიფოსგან რა ტიპის გადასახადების გადახდის ვალდებულება აქვს ორგანიზაციას, რაც განისაზღვრება იმით, კომპანია შეზღუდული პასუხისმგებლობის საზოგადოებაა (შპს), სააქციო საზოგადოება (სს), არასამთავრობო (არაკომერციული) იურიდიული პირი (ააიპ) თუ სხვა. 

ბუღალტრისთვის ასევე, მნიშვნელოვანია ცვლილებებთან ადაპტირების უნარი, რადგან კანონმდებლობაში საკმაოდ ხშირად შედის გარკვეული ცვლილებები და აუცილებელია, რომ ბუღალტერი ამ სიახლეებს არ ჩამორჩეს. ბუღალტერის დატვირთულობა კომპანიის ბრუნვაზეა დამოკიდებული, აქედან გამომდინარე, თუ შედარებით მცირემასშტაბიან კომპანიაშია დასაქმებული, შეუძლია, რომ შეუთავსოს სხვა ანალოგიურად მცირე კომპანიებში მუშაობა და საბუღალტრო საქმიანობა ერთდროულად რამდენიმე კომპანიაში განახორციელოს.

ss.ge-ზე შეგიძლიათ იპოვოთ საბუღალტრო კურსები, თუ ფიქრობთ, რომ პროფესიის შეცვლა ან ფინანსური აღრიცხვის სფეროში ბედის ცდა გსურთ

ან თუ უკვე ხართ ბუღალტერი და თქვენი პროფესიით ეძებთ სამსახურს, ამაშიც დაგეხმარებათ ss.ge-ს ვაკანსიების კატეგორიაში განთავსებული განცხადებები.