როგორ გავყიდოთ ბინა - საკუთარი რესურსებით თუ რეალტორის დახმარებით?

უძრავი ქონების გაყიდვის გადაწყვეტილების მიღებისას, მხოლოდ განცხადების სწორად დადება არაა საკმარისი. სრულყოფილი განცხადების განთავსების შემდეგ იწყება დაინტერესებული პირების და პოტენციური კლიენტების ზარები და ბინის დათვალიერების მსურველთა შეტყობინებები. ამ პროცესისთვის მორალურად და ფიზიკურად მზად უნდა იყოთ, რადგან დაგჭირდებათ ძალიან ბევრი დრო იმისთვის, რომ ყველა მათგანს ინდივიდუალურად შეუთანხმდეთ ბინის დათვალიერების დროზე, მიიღოთ ისინი და უპასუხოთ მათ შეკითხვებს ამომწურავად.

ბინის გაყიდვის პროცესში ორი ალტერნატივაა: აიღოთ ის სრულად საკუთარ თავზე და თავად მართოთ პოტენციურ კლიენტებთან კომუნიკაციისა და მათთან შეხვედრების ორგანიზების პროცესი ან ითანამშრომლოთ რეალტორთან, რომელიც გარკვეული ანაზღაურების სანაცვლოდ იქნება თქვენი ბინის წარმომადგენელი დაინტერესებულ პირებთან და თავად დაამყარებს საჭირო კომუნიკაციას მათთან.

პირველი ვერსია დაგიზოგავთ ფინანსებს, მაგრამ არა დროს. როდესაც საკუთარი რესურსებით მართავთ ბინის გაყიდვის პროცესს, აუცილებლად უნდა გაითვალისწინოთ და მზად იყოთ იმისთვის, რომ ტელეფონზე შემოგივათ ბევრი ისეთი ზარი, რომლის მიღმაც უბრალოდ ცნობისმოყვარე ადამიანია და არა რეალურად დაინტერესებული კლიენტი, დაგისვამენ ბევრ კითხვას, რომლებიც შესაძლოა საერთოდ არ იყოს რელევანტური თქვენი ბინისთვის, ან შეიძლება საერთოდაც შეგითანხმდნენ ბინის სანახავად მოსვლაზე და შემდეგ გადადონ შეხვედრა რამდენიმე ხნით ან გაუფრთხილებლად აღარ მოვიდნენ. ამის გამო ეცადეთ, რომ თქვენი განცხადება მაქსიმალურად დეტალური და ინფორმატიული იყოს, რათა თქვენი დრო დაზოგოთ და შემოსულ ზარებს შორის მინიმუმამდე დაიყვანოთ ცნობისმოყვარე ადამიანების რაოდენობა და ამის ნაცვლად, რეალური კლიენტები გამოგეხმაურონ. განცხადების სწორად დადების შემთხვევაში კი ფინანსებთან ერთად დროსაც დაზოგავთ. თუმცა აუცილებლად აღსანიშნავია ისიც, რომ რეალურად დაინტერესებული კლიენტისთვის უფრო მეტად მნიშვნელოვანია ბინის ნახვა, სივრცის რეალურად აღქმა სურათების მიღმა და თქვენს გრაფიკში აუცილებლად უნდა გამოყოთ დრო, რომელსაც ამ საქმისთვის გამოიყენებთ და კლიენტებს ინდივიდუალურ ვიზიტებს დაუგეგმავთ თქვენს გასაყიდ ბინაში. ეს ვარიანტი მისაღებია ისეთი ადამიანებისთვის, ვისაც თავისუფალი დროის პრობლემა არ აქვს,  ადამიანებთან ურთიერთობა უყვარს და პრეზენტაციის კარგი უნარებიც აქვს.

რაც შეეხება მეორე ვერსიას - რეალტორთან თანამშრომლობა კომფორტულია დროის დაზოგვის მიზნით, თუმცა ეს კომფორტი ფინანსებთანაც არის დაკავშირებული და გასათვალისწინებელია, რომ თუკი თქვენი დროის სანაცვლოდ თქვენი ბინის გაყიდვის პროცესს სხვა ადამიანი უზრუნველყოფს, ამაში შესაბამისი ანაზღაურების გადახდაც მოგიწევთ. რეალტორის დახმარება იმ შემთხვევაში დაგჭირდებათ, თუკი ძალიან დაკავებული გრაფიკი გაქვთ სამსახურში ან ოჯახური საქმეების გამო ვერ ახერხებთ მუდმივ სატელეფონო კომუნიკაციას, იშვიათად იცლით იმისთვის, რომ სახლის დასათვალიერებლად წაიყვანოთ კლიენტები ან უბრალოდ გირჩევნიათ, რომ ეს საქმე თქვენზე მეტად გამოცდილ და პროფესიონალ ადამიანს მიანდოთ, ვისაც უკეთესი უნარები აქვს პრეზენტაციისთვის და კლიენტებთან ურთიერთობა მის ყოველდღიურ საქმიანობას წარმოადგენს.

საბოლოო შედეგი შესაძლოა ორივე შემთხვევაში ერთნაირი დადგეს, არჩევანი უძრავი ქონების მეპატრონის გასაკეთებელია თავისი პრიორიტეტების გათვალისწინებით. თითოეული ვარიანტის გადაწყვეტისას მთავარია მხედველობაში მიიღოს მათი უპირატესობები და ნაკლი და ამის მიხედვით შეაფასოს, საკუთარი რესურსებით გაყიდის თავის ბინას თუ რეალტორთან ითანამშრომლებს.