პირველი და ბოლო სართულის უპირატესობები და ნაკლი

კორპუსში ცხოვრებისას, ბინის ინტერიერისა და შიდა კომფორტის გარდა, ასევე მნიშვნელოვან ნაწილს წარმოადგენს სართული, ხედი და კორპუსის გარე პერიმეტრი. სხვადასხვა მიზეზების გამო ადამიანები უპირატესობას დაბალ ან მაღალ სართულებს ანიჭებენ და ეს მიზეზები ყველასთვის ინდივიდუალურია. პირველი და ბოლო სართული განსაკუთრებული პლუსებისა და მინუსების მატარებელია.

ცხოვრება პირველ სართულზე

პირველ სართულზე ცხოვრება განსხვავდება ძველი და ახალი აშენებული ბინების შემთხვევაში. ახალი კორპუსების პირველ სართულებზე, ძირითადად, განლაგებულია საოფისე კომერციული ფართები და ძველისგან განსხვავებით, საცხოვრებელი პირველი სართული უფრო მაღალზე მდებარეობს, რაც შეამცირებს ქუჩიდან/ეზოდან შემოსული ხმაურის, გამონაბოლქვის და სხვა დისკომფორტებს. მიუხედავად იმისა, რომ მეტალო პლასტმასის კარ-ფანჯარას ხმის დამხშობი ეფექტიც აქვს გარკვეულწილად და ბინაში ხმაურს არ ატარებს, მუდმივად დაკეტილ მდგომარეობაში არ გვაქვს აივანი და ფანჯრები, შესაბამისად, პირველ სართულზე ყოველთვის უფრო მეტი ხმაური შემოდის, ვიდრე ზედა სართულებზე, გარდა ამისა მტვერიც მუდმივი პრობლემაა პირველ სართულზე მცხოვრებლებისთვის, დაბალი პირველი სართულის შემთხვევაში კორპუსის წინ ჩავლილი მანქანების გამონაბოლქვი ღია ფანჯრებში პირველ სართულზე მარტივად შედის, ასევე მნიშვნელოვანი პრობლემაა გადაწეული ან თხელი ფარდების შემთხვევაში გარედან თქვენი ბინის ინტერიერის დანახვისგან გამოწვეული დისკომფორტი. გარდა ამისა, პირველი სართულიდან არასდროს არ იშლება ლამაზი ხედი და მხოლოდ ეზოთი დატკბობა მოგიწევთ.

პირველ სართულზე ცხოვრებას შესაძლოა ჰქონდეს თავისი დადებითი მხარეებიც. მაგალითად ავეჯის შეტანის ან გამოტანის დროს პირველ სართულზე ნავიგაცია უფრო მარტივია, გარდა იმისა, რომ არ გჭირდებათ ლიფტი, ავეჯის შეტანა შესაძლებელია როგორც კარიდან, ასევე აივნიდანაც - თუ საუბარია დაბალ პირველ სართულებზე. ლიფტი ყველა ახალ კორპუსში ფუნქციონირებს, თუმცა რაიმე ტექნიკური ხარვეზის ან ელექტროენერგიის შეწყვეტის შემთხვევაში ფეხით მაღალ სართულზე ასვლა არავის უხარია. პირველ სართულზე ცხოვრება განსაკუთრებით კომფორტული ასაკოვანი ადამიანებისთვისაა სწორედ ამ უკანასკნელი მიზეზის გამო, მაღალ სართულზე სიარული, თუნდაც გამონაკლის შემთხვევებში, მათთვის რთულია.

ბოლო სართული

ბოლო სართულის უარყოფით მხარედ პირველი სართულის დადებითი მხარეები შეიძლება განვიხილოთ- ლიფტის ხარვეზის შემთხვევაში ფეხით სიარულში გავარჯიშება მოგიწევთ. ავეჯის გადაადგილებისასაც მხოლოდ სატვირთო ლიფტის გამოყენება და შესასვლელი კარიდან შეტანა-გამოტანას შეძლებთ. ასევე, გასათვალისწინებელია სახურავის მასალები, ზაფხულში, შესაძლოა ძალიან ცხელი იყოს თქვენი ბინა, ბუნებრივად სიგრილე ვერ შეინარჩუნოთ და აუცილებლად დაგჭირდეთ კონდიციონერი. საყურადღებო საკითხია ასევე ფასი უძრავი ქონების შეძენისას. ახალ, მშენებარე კორპუსებში ფასი სართულების პროპორციულად იზრდება და თუკი შეძენის მომენტში მყიდველისთვის უარყოფით მხარედ შეიძლება შეფასდეს ეს ფაქტორი, მისი გაყიდვის შემთხვევაში დადებითად გარდაიქმნება.

ყველაზე დიდი უპირატესობა პირველ რიგში არის ხედი, თუ კორპუსი შესაბამის ტერიტორიაზე მდებარეობს და ირგვლივ ქალაქის ხედი ჩანს. გარდა ამისა, ნაკლებად შეგაწუხებთ ხმაური და ქუჩის მტვერი, სარეცხის გაფენასაც თამამად შეძლებთ და დარწმუნებული იქნებით, რომ თქვენს თეთრეულსა და ტანსაცმელს მანქანის გამონაბონაბოლქვი არ გაჟღინთავს. ზოგიერთ შემთხვევაში, სახურავის გამოყენებასაც შეძლებთ, პროექტიდან გამომდინარე შესაძლოა დაშენების პერსპექტივაც გქონდეთ და თქვენი ბინა გააფართოვოთ, ან სახურავზე ზაფხულის საღამოები გაატაროთ მეგობრებთან ერთად და პარალელურად, ქალაქის ხედებით დატკბეთ. გარდა გარე პერიმეტრისა, ბოლო სართულის კიდევ ერთი მნიშვნელოვანი უპირატესობა ისაა, რომ არასოდეს შეგაწუხებთ ხმაური ზედა მეზობლისგან და არასდროს ჩამოგიშვებენ წყალს სააბაზანოსა თუ სამზარეულოში დარჩენილი ღია ონკანის გამო.